香港特別行政區 訴 張雯惠

HCCC 496/2014

香港特別行政區

高等法院

原訟法庭

刑事案件2014年第496號

----------------

----------------

----------------------

判刑
以下內容乃法庭數碼錄音謄本

----------------------

官：　

被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，警員到達一個單位之外，睇到被告同一名男子步出單位，將兩人截停，跟住帶佢哋返去單位內搜查，從一個電視櫃上發現一個膠盒，內有大概三十多袋嘅毒品，另外一個膠盒內則有一個電子磅、一支金屬嘅匙羹同埋一沓可再封膠袋、一本啡色記事簿及內有一張紙張。

毒品經化驗之後證實係內含11.25克甲基苯丙胺盬酸盬嘅11.54克晶狀固體，內含0.37克可卡因嘅0.91克固體以及十八片內含0.09克甲基苯丙胺嘅片劑，有關嘅毒品當時嘅總市值係港幣5,765元。被告喺警誡下承認，佢係數月之前以2,000元購入毒品，打算喺派對中請朋友服用。

被告現年25歲，過往並冇刑事紀錄。大律師喺求情嘅時候表示，被告喺2006至07年開始吸食毒品，但係喺2008年婚後已經冇再吸食。不過喺2012年離婚之後因為心情欠佳，先至重新沾染此不良嘅嗜好。大律師亦都指，本案嘅部分毒品係佢自用嘅，被告喺求情書入面亦表示，佢喺扣押期間已經深切反省感到內疚，希望本席輕判，好讓佢早日與佢現年只有6歲嘅兒子重聚。

本席喺量刑嘅時候考慮咗本案嘅案情，牽涉毒品嘅種類、重量、有關嘅量刑指引、被告係喺案中案之後認罪、大律師嘅求情，亦都閱讀咗被告、佢母親同埋佢阿姨、佢嘅兒子同埋朋友所撰寫嘅求情信。

本案係牽涉三種毒品，即係「冰」毒、可卡因以及甲基苯丙胺片劑，所有嘅毒品總重量係11.71克，而本案嘅主要係「冰」，但係「冰」同可卡因根據案例嚟講係可以被視作可相若處理嘅毒品，案例係香港特別行政區訴鄭日明（CACC 455/2006），而現時多數係以組合量刑方法處理（combined approach），而三種毒品嘅總重量計算係納入10至到70克7至到11年嘅量刑基準。不過，上訴庭喺其他嘅案例亦指，販運多於一種毒品存在住令案情情節嚴重嘅因素。至於大律師求情嘅時候指，部分嘅毒品係被告自用，本席考慮咗所有毒品嘅市值、袋數，毒品係喺一個單位內搜獲嘅，而單位內係有包裝毒品嘅工具，亦都有懷疑係出售毒品嘅紀事冊。除咗被告自稱佢係毒品使用者之外，並冇其他呢方面嘅證據，反之佢喺被拘捕下係即時表示毒品係佢打算請朋友服用嘅，本席唔認為本案嘅證供可以顯示本案大部分嘅毒品係被告自用㗎。

綜合上述，本席認為一個8年嘅起刑點係適合嘅，被告喺案中案之後認罪，只可以獲得四分之一嘅認罪扣減，判刑6年。