香港特別行政區 訴 堵偉根 KING

HCCC73/2009

香港特別行政區

高等法院

原訟法庭

刑事案件2009年第73號

------------------

判刑
以下內容乃法庭數碼錄音謄本

官：被告早於裁判法院承認過一項販運危險藥物罪，涉及嘅毒品係凈含毒量71.80克嘅海洛英，而家交由我懲處。

情節方面，好簡單嘅啫，就係警方喺涉案單位外面埋伏，伺機進入，結果發現被告同單位裡面嘅毒品。

背景方面，被告剛滿29歲，香港出生，並受教育至中四，之後做過多份藍領性質嘅散工，被捕嗰時係無業。此外，佢結過兩次婚，育有兩名子女，案發嗰時同雙親、妹妹同自己嘅子女就同住，現任太太則為內地居民。

最後，被告有一次共五項定罪紀錄，全部同本案無關，同毒品無關。

求情嘅時候，律師話佢係因為家中需要錢而犯下本案，不過呢個明顯唔係求情嘅理由。

反之，本案涉及71.80克可卡因，量刑起點就應該喺八年半，被告認罪可得三分一嘅扣減，就下調至五年零八個月，不過之後就再冇減免嘅理由。換言之，被告需要為本案入獄五年零八個月。