香港特別行政區 訴 陳俊興

HCCC 462/2015

香港特別行政區

高等法院

原訟法庭

刑事案件2015年第462號

----------------

----------------------

判刑
以下內容乃法庭數碼錄音謄本

----------------------

官：　

  被告人陳俊興被控一項販運危險藥物罪，違反香港法例第134章《危險藥物罪條例》第4（1）（a）及（3）條。

  罪行詳情指，陳俊興於2015年5月27日，在香港新界粉嶺華明路22號雍盛商場銀龍餐廳外，非法販運危險藥物，即內含1,346克氯胺酮的1,707克粉末。喺佢承認嘅案情撮要就係咁講：

（1）2015年5月27日，警方在粉嶺雍盛苑進行掃毒行動。

（2）15：35時，警方看見16歲的被告人與另外兩名男子（楊仲然及張嘉榮）一起從雍盛商場行入雍盛苑雍薈閣，於是在雍薈閣外面埋伏。

（3）15：38時，被告人與楊仲然離開雍盛苑雍薈閣，行往雍盛商場，在粉嶺華明路22號雍盛商場銀龍餐廳外被警務人員截停。警務人員搜查被告人的背囊，搜獲一個白色膠袋，內有7個透明膠袋，載有內含1,346克氯胺酮的共1,707克粉末。楊仲然身上沒有搜獲任何違禁品。

（4）被告人被拘捕，在警誡下說「阿Sir，因為我冇錢使，屋企又攞綜援，所以幫人運『K仔』，賺啲錢畀阿媽使。」

（5）被告人進行錄影會面，在警誡下說了一些事情，其中包括：「K仔」是指危險藥物氯胺酮；本案發生的之前約兩個月，他在長沙灣一間網吧認識阿偉，他告訴阿偉家人靠綜援過活，自己也需要金錢。阿偉於是把被告人的流動電話號碼交給「師兄」，為他找份工作；其後，「師兄」打電話叫他運送氯胺酮，報酬是港幣600至700元；2015年5月27日12時左右，他收到「師兄」來電，叫他乘的士往雍盛苑；他約了楊仲然前往油麻地購買，當收到「師兄」來電時，他正與楊仲然在深水埗，他叫楊仲然陪他；他與楊仲然接著乘的士往深水埗，從深水埗往雍盛苑；他們到達雍盛苑後，「師兄」叫他前往雍盛商場對面樓宇（相信是雍薈閣）15樓的梯間拾起一包氯胺酮；他前去拾起氯胺酮時，楊仲然在雍薈閣15樓的升降機大堂等他；楊仲然對涉案毒品毫不知情；他拾起涉案毒品後放進背囊，並離開樓宇，他打算乘坐的士，然後致電「師兄」，聽取運送毒品的指示，但被警務人員截停；涉案毒品零售市值估計為港幣218,496元。

  被告現年17歲，被捕嘅時候係16歲，當時佢冇刑事紀錄，亦都冇工作經驗。被告人雖然年青，但係犯案嘅年紀係16歲，卻並非喺販運危險藥物呢個嚴重罪行之中，可被視為極度年輕或者獲輕判嘅因素，而被告人佢本身及家庭狀況喺販運毒品呢個嚴重嘅罪案之中，對輕判或者扣減刑罰亦都並不起作用。

  根據律政司訴許守城（[2008] 3 HKC 332頁）一案，裡面上訴法庭訂下嘅關於販運氯胺酮嘅判刑指引，涉及販運嘅氯胺酮重量超過1,000克者，判刑應為14年以上嘅監禁。本案涉及1,346克氯胺酮，適當嘅量刑基準應該係15年監禁。

  代表被告人嘅馬大律師替被告人向本席求情，佢指出，被告人自幼喪父，然而喺學校嘅成績不差，品行亦都不壞，以致學校嘅中四班主任同埋學校嘅社工都肯為佢寫信向法庭求情，而被告人亦都係從來未有犯罪嘅前科，今次只係因為家貧而受人引誘，乘虛而入，佢所以最終係替人帶毒品，希望法庭係處以較寬鬆嘅刑罰。

  馬大律師又援引兩件案件，一件就許仲文（譯音），係HCCC 305/2014嘅案件，就係2014年9月19日嘅判決，係未經彙編。第二件就係張玉嬋（譯音）嘅案件，就HCCC 508/2014年，係2015年2月13日嘅判決，係未經彙編。喺嗰兩件案件，原訟法庭對認罪嘅被告人，而被告人喺一件案件係17歲、一件案件係16歲，都作出咗額外嘅扣減。

  考慮對被告人以上我所提出、我所陳述嘅情況，本席係採取15年監禁為量刑基準，但係因為被告人以上嘅情況，本席係願意扣減1年，以反映本案被告人係年輕、冇紀錄，同埋家境嘅情況，所以本席採取嘅量刑基準係14年監禁，而本席係給予被告人因為認罪嘅刑期扣減，係三分一扣減，扣減之後，刑期得為九年零四個月監禁。

  基於上述原因，本席係判處被告人入獄九年零四個月。