|
HCCC 299/2018
[2019] HKCFI 659
香港特別行政區
高等法院
原訟法庭
刑事案件2018年第299號
----------------
----------------
| 出席人士： |
律政司高級檢控官黃澄小姐，代表香港特別行政區 |
|
李祖詒先生，由法律援助署委派的包建原律師事務所延聘，代表被告人 |
| 控罪： |
[1] 管理煙窟（Managing a divan） |
|
[2] 販運危險藥物（Trafficking in dangerous drugs） |
---------------------------------------
判刑
以下內容乃法庭數碼錄音謄本
---------------------------------------
官：
被告承認一項管理煙窟罪，違反香港法例第134章《危險藥物條例》第35（1）（a）及（2）條，以及一項販運危險藥物罪，違反香港法例第134章《危險藥物條例》第4（1）（a）及（3）條。
案情指，被告同另外一個人步出單位嘅時候被警員截停，警員其後喺個單位內發現另外十人，以及單位內有毒品、吸食工具，而喺被告嘅斜孭袋度亦都搜出不同種類嘅毒品，喺佢嘅褲袋搜出現金，而斜孭袋入面亦都有另外嘅現金及人民幣。
所有嘅毒品經過化驗之後，證實為6.13克嘅混合劑內含5.23克海洛英鹽酸鹽，以及內含22克甲基苯丙胺鹽酸鹽嘅22.60克晶狀固體，及九片內含0.11克咪達唑侖嘅片劑。
被告承認佢係個煙窟嘅負責人，佢向顧客提供毒品，以及招待佢哋喺單位內吸食毒品。被告表示，只係喺該處工作咗一日，有人答應畀佢1,000鈫一日嘅酬勞，但係佢未獲取過任何嘅報酬。
被告現年係40歲，有七項嘅刑事紀錄，但係全部同毒品冇關。最後一次係喺1995年因為毆打罪，而被判到教導所服刑。
大律師求情嘅時候指被告已婚，太太喺內地，雖然未能夠嚟香港探望佢，仍然給予被告支持。另外，大律師又指被告因為事發嘅時候無業，需要賺快錢先會鋌而走險，干犯本案，就大律師希望本席考慮兩項控罪嘅量刑整體性，予以輕判。
本席喺量刑嘅時候，考慮咗本案嘅案情、大律師嘅求情、毒品嘅種類、重量、有關嘅量刑指引，亦都考慮咗被告認罪。
本席涉及三類嘅毒品，包括咗海洛英鹽酸鹽、「冰」毒同埋咪達唑侖。5.23克嘅海洛英鹽酸鹽應該係納入10克以內嘅界別，即係兩年至五年嘅量刑基準，22克嘅「冰」毒納入10至到70克嘅界別，即係7至到10年嘅量刑基準，最後，0.11克嘅咪達唑侖約為6個月嘅量刑基準。咁本席亦都根據陳旭亮案，作以下三項嘅測試，得出嚟嘅結論係第一項歸謬法，即係將所有嘅毒品總重量假定全為本案中案毒性最高嘅「冰」毒，咁應該嘅量刑基準係八年兩個月；至於換算法，本席得出嚟嘅量刑基準亦都係八年兩個月；最後用比例法，咁即係話本案三類嘅毒品嚟分配，總重量27.87克嘅毒品，海洛英佔0.19，「冰」毒佔0.8，而咪達唑侖佔0.004，咁賦予所有嘅毒品27.37克，分別係海洛英、「冰」、咪達唑侖嘅起刑點應該係如下：6年、8年同埋6個月，然後之後將各自嘅比例賦予上述嘅量刑基準，再全數加起上嚟，本席得到嘅結論係8年嘅量刑基準。
咁以上述三種唔同方式測試過之後，本席認為就住本案，第二項控罪嘅量刑基準應該係8年。而控罪一嘅量刑基準應該係18個月。由於被告喺第一時間已經承認控罪，可以獲得三分之一嘅量刑扣減，兩項控罪判處如下：控罪一係12個月，控罪二64個月。
考慮到量刑整體性，本席下令控罪一中嘅8個月同控罪二嘅刑期分期執行，總刑期72個月，即係6年。
|