DCCC 470/2009
DCCC470/2009
香港特別行政區
區域法院
刑事案件2009年第470號
----------------
主審法官：
區域法院法官容耀榮
日期：
2009年8月5日上午11時54分
出席人士：
律政司檢控官Ms Sezen Chong，代表香港特別行政區 Mr Chan Pak Kong，由法律援助署委派的羅國貴律師事務所延聘，代表被告
控罪：
販運危險藥物（Trafficking in a dangerous drug）
判刑理由書
1. 代表你嘅大律師正確指出你嘅個人背景，係唔構成到任何嘅求情理由。睇你以往嘅紀錄，你改過自新機會就全係靠你自己，唔係靠今次嘅判刑嘅方法，或者監禁嘅長短，即係換句話講亦都構成唔到求情理由。
2. 正如代表你嘅大律師指出，販運呢一個數量、呢一種嘅毒品個量刑起點係5年至8年，咁應該係近5年抑或近8年呢？第一個要睇嘅就係呢個毒品嘅數量，亦都要睇其中有幾多會好大機會傳咗畀第二個人，咁我接納你大律師所講有一部分係你會自己食，因為你自己都係有毒癮，但係本席認為大部分你都係圖利。始終你藏有咁嘅份量，咁大份量嘅毒品，主要原因都係圖利，可以讓畀朋友。我接納你大律師所講嘅，都係賣番畀相熟嘅。朋友呢，係咪朋友呢，朋友會唔會出賣你呢？咁你自己先知，總言之係唔係朋友唔緊要，都係大家群埋一班都係毒癮，已經係有癮嘅癮君子，咁喺某個程度上嘅比較，向冇毒癮嘅人兜售毒品冇咁嚴重，綜觀嚟講亦都係一般常見嘅販毒方式，自己買一大部分毒品出嚟，自己食小部分，其他部分用呢個朋友嘅網絡銷售。
3. 考慮到各項因素，判刑起點法庭應該認為係6年。咁頭先講過上訴庭嘅判案規例，無論對你嘅證據幾強都好，如果你肯認罪嘅，最少有三分一寬免，所以本席亦都係跟呢個上訴庭嘅指引減24個月。仲有一樣嘢，正如你大律師所講，你同警方坦白承認，當然，警方為咗安全啲，都有搜集證據，但係無可否認你係坦白承認，坦白承認，無論因為後悔，抑或係咩嘢原因都好，事實上某程度上慳咗警方嘅警力，調查你自己本身呢件案件，當然，如果你能夠更加協助警方，咁會更多求情因素，但係呢啲係你個人嘅選擇。關於呢件案件你係肯向警方坦白承認，如果你肯喺法庭認罪，法庭一定要畀三分一，咁我認為同樣邏輯，如果你向警方承認，事後又冇反口嘅，上到嚟法庭都係認罪嘅，應該有額外嘅寬免，如果唔係，有個被告同你完全一樣，但係佢由頭至尾都唔認，由頭至尾不同警方合作，要費好大警力，到到法庭先認罪，如果大家都係得三分一，你一早向警方認罪又係三分一，佢由頭至尾都唔向警方招認，直至到上法庭先至招認又係三分一減刑，咁變咗邏輯上講唔通。對肯一早同警方合作嘅被告亦都唔公道，所以法庭認為應該有額外嘅寬免，當然，要睇好多情形，睇下你個招認同實際環境有冇個關係，同指證你嘅證據等等，法庭亦都要考慮到，法庭已經畀咗三分一寬免畀你，所以法庭認為畀多一個月寬免你就已經足夠，所以你嘅判刑起點係6年，寬免24個月，減一個月，即係三年零十一個月。而家法庭判你監禁三年十一個月。