香港特別行政區 訴 梁永健

HCCC 360/2014

香港特別行政區

高等法院

原訟法庭

刑事案件2014年第360號

----------------

----------------------
判刑
以下內容乃法庭數碼錄音謄本
----------------------

官：　

被告人承認一項販運危險藥物罪。

本席喺判處嘅時候考慮咗整體情況，包括案件嘅性質同埋情節，尤其是涉案嘅危險藥物嘅種類同埋份量、被告人嘅個人背景，同埋辯方大律師嘅求情陳詞。

本案嘅案情可以簡述如下：當被告人從住所落樓嘅時候，被警員截停，警員喺佢身上搜獲八包氯胺酮，被告人承認佢係等錢使，先至幫人派「K仔」。之後警員喺被告人嘅屋企搜獲十包氯胺酮，被告人承認，佢替別人管有呢一啲「K仔」，為咗運送畀其他人賺錢。佢協助嘅人叫做大華，酬勞係數百元，佢仲未收到呢啲酬勞。

被告人現年28歲，未婚，中五學業程度，佢曾經從事麵包學徒、餐廳侍應同埋運輸工人，喺案發時候無業。被告人並非係初犯，2006年曾經因為傷人罪被判感化，2007年因為管有危險藥物罪，被判進入更生中心。

辯方黃大律師指出，被告人係一名孝順、顧家嘅人，佢嘅父親喺佢年幼嘅時候已經離開家庭，佢同埋家姐由母親獨力撫養，十分吃力，唸中學嘅時候，被告人到咗舅父同埋阿姨嘅屋企居住，中學畢業之後，被告人開始工作，初時同母親居住，後嚟為咗讓家人居住好一啲，就獨自搬出嚟自己住，但係一直都有從萬多元嘅收入裡面交出大約3,000元畀母親。被告人今次犯案，純粹係因為想賺啲快錢，讓家人改善環境，而受他人利用。黃大律師請法庭顧及被告人係初次干犯販運危險藥物罪，而且只係一個跑腿嘅角色。辯方呈遞咗被告人同埋母親嘅信件，喺信裡面，被告人表示悔意，被告人嘅母親亦都自責對被告人疏於管教。

喺本案，被告人販運嘅係內含4,941.72克嘅氯胺酮嘅9,061.19克嘅粉末，上訴法庭喺律政司司長訴許守城（[2009] 1 HKLRD 1）訂下咗販運氯胺酮嘅量刑指引，指出若果毒品純含量係超過1公斤嘅話，應該考慮判處超過14年嘅監禁。之後上訴法庭喺香港特別行政區訴單松健（CACC 458/2011）一案中指出，若果販運嘅氯胺酮嘅份量超過3公斤嘅話，量刑基準可以超過20年。單松健一案雖然並非訂下量刑指引，但係具有參考作用。本席亦都謹記，雖然喺販運危險藥物嘅案件，毒品份量係重要嘅考慮因素，但係必須要避免單純嘅數學計算，法庭必須考慮整體情況，亦都應該考慮嘅因素，包括上訴法庭喺英皇訴劉德明（[1990] 2 HKLR 370）一案中所述。

考慮咗整體情況，本席認為應該採用21年作為量刑基準，被告人承認控罪，應該得到三分一嘅刑期扣減，顧及辯方大律師嘅求情陳詞，本席認為呢個就係被告人應得嘅刑期扣減幅度。

被告人，請起立，基於上述理由，本席判你就本案嘅控罪監禁14年。