[2025] HKCFI 896
HCCC 300/2023
香港特別行政區
高等法院
原訟法庭
刑事案件2023年第300號
________________________
判刑 以下內容乃法庭數碼錄音謄本
官：
被告人樊梓健喺本席席前承認咗一項盜竊罪，即當時係第三項罪名，違反香港法例第210章《盜竊罪條例》第9條。咁當時將嗰個案情讀咗畀被告人聽，佢承認咗個案情之後，本席就裁定被告人罪名成立嘅。 咁講番嗰個案情喇，其實就好簡單下嘅，就案情顯示喺2022年7月21號，當時被告就喺街遇到X喇，佢係一個性工作者嚟嘅，咁就同X嗰陣時係--即係喺2022年7月21號下晝大概3點鐘喥就跟咗X，就去咗X嗰個做生意樓宇嗰度喇。咁大概係下晝4點45分喥，X就離開咗嗰個樓宇，就後屘落咗去樓下搵嗰個看更幫手咁喇，咁而跟住被告就攞咗X個手袋，手袋入面就有銀包、現金同埋有啲卡嘅，即係包括身分證咁喇，同埋另外攞咗X嘅手提電話，被告離開嗰個樓宇嘅時候攞咗呢啲嘢喇，咁佢後屘就將個手袋就連埋嗰個銀包喇，就連埋嗰啲卡，就喺嗰個大廈嘅不同樓層後樓梯度抌咗，就攞咁啲錢嘅，就同埋攞咗個電話，咁佢攞咗幾多錢呢？就係攞咗151蚊嘅現金。咁就跟住就係因為後屘警方搵番嗰啲物品嘅時候，就發覺係--即係攞番晒啲物品喇，即係銀包、卡都攞番晒，除咗4張銀行卡係搵唔到嘅，其他都攞番㗎喇。咁當時跟住拉咗被告喇，咁被告已經就同警察講，就話因為佢同X關於個性交易嗰啲錢銀方面有爭拗，咁就所以佢就攞走咗80蚊，就同埋將其他嘢抌晒喺垃圾桶㗎喇，咁佢亦都話將嗰個手提電話拎咗去鴨寮街就賣咗四百幾鈫，咁後屘警方去攞番嗰個電話，發覺賣就賣咗係450鈫喇，咁而X亦都係話，即畀番個電話佢睇，佢話嗰個係佢電話，基本上呢啲就係承認咗嘅事實。 背景同埋求情方面，咁背景睇到被告人就係1973年出世，而家51歲喇，咁就係未婚，獨身嘅，咁係有個仔，就係同個前女友生嘅，而家12歲㗎喇，咁被告就話其實嗰個細路係BB幾個月見過，一路都冇再見過㗎喇。咁被告就未拉之前就係做呢一個跟車喇，即係運輸工人喇，咁同埋亦都係有收呢個綜援嘅。咁就被告睇番個案底都有相當嘅案底喇，其中有十三次係同盜竊有關，即係同而家嗰個罪行係相符喇。 喺求情嘅時候，羅大律師都提過呢個係一個順手牽羊嘅情況，因為當時X唔在場，咁就順手攞咗佢啲嘢，仲有就係話被告搞錯咗一啲情況，就以為認罪要認晒三條，連嗰兩項嘅強姦罪都要認埋，所以就冇一早認到罪，咁但係喺後屘清楚情況之下都有認到罪，但係就比較遲咗喇。另外，因為即係被困咗咁耐喇，拉咗之後一路都冇得保釋吖嘛，成兩年幾，咁喺呢段時間就變咗冇咗嗰個公屋，咁就同埋返番出去之後就希望可以攞番間公屋喇，同埋因為亦都知道個老闆，即係以前嗰個老闆一樣有做緊生意，就希望可以出番去之後，就個老闆會請番，做番呢個跟車工人，咁呢啲就基本上係求情說話喇。 本席喺考慮呢個恰當嘅判刑嘅時候，本席亦都係考慮到，呢個好明顯就係被告當時就係趁機，即係趁X唔在場嘅時候就順手牽羊，攞咗佢個手提電話同埋攞咁嗰啲錢嘅，就唔係話一早去有晒周詳計劃咁去偷呢啲嘢嘅，咁而偷到嘅錢亦都相對係少，即係百零鈫。咁當然喇，因為X有4張bank卡（即係銀行卡）搵唔番，咁對佢嚟講都有某程度上嘅不便，咁同埋個電話因為洗晒啲資料吖嘛，鴨寮街收咗佢之後畀450鈫畀被告你嘅時候，咁亦都會係對X係構成啲不便嘅。 本席考慮晒呢個案件嘅整體情況之後，本席就認為以審訊嚟計，審訊之後，8個月嘅刑期就係恰當㗎喇。咁因為被告係有呢個先前嘅相同紀錄個緣故，本席就認為係一個加重刑罰嘅因素，就加多兩個月，咁變咗係10個月。咁因為被告係喺件案件排咗期之後但係喺審訊之前已經認罪，本席就畀番你四分之一嘅刑期扣減，咁有呢個扣減之後，用10個月嚟計，扣減咗呢個四分一，等於七個半月嘅監禁喇。
被告人樊梓健喺本席席前承認咗一項盜竊罪，即當時係第三項罪名，違反香港法例第210章《盜竊罪條例》第9條。咁當時將嗰個案情讀咗畀被告人聽，佢承認咗個案情之後，本席就裁定被告人罪名成立嘅。
咁講番嗰個案情喇，其實就好簡單下嘅，就案情顯示喺2022年7月21號，當時被告就喺街遇到X喇，佢係一個性工作者嚟嘅，咁就同X嗰陣時係--即係喺2022年7月21號下晝大概3點鐘喥就跟咗X，就去咗X嗰個做生意樓宇嗰度喇。咁大概係下晝4點45分喥，X就離開咗嗰個樓宇，就後屘落咗去樓下搵嗰個看更幫手咁喇，咁而跟住被告就攞咗X個手袋，手袋入面就有銀包、現金同埋有啲卡嘅，即係包括身分證咁喇，同埋另外攞咗X嘅手提電話，被告離開嗰個樓宇嘅時候攞咗呢啲嘢喇，咁佢後屘就將個手袋就連埋嗰個銀包喇，就連埋嗰啲卡，就喺嗰個大廈嘅不同樓層後樓梯度抌咗，就攞咁啲錢嘅，就同埋攞咗個電話，咁佢攞咗幾多錢呢？就係攞咗151蚊嘅現金。咁就跟住就係因為後屘警方搵番嗰啲物品嘅時候，就發覺係--即係攞番晒啲物品喇，即係銀包、卡都攞番晒，除咗4張銀行卡係搵唔到嘅，其他都攞番㗎喇。咁當時跟住拉咗被告喇，咁被告已經就同警察講，就話因為佢同X關於個性交易嗰啲錢銀方面有爭拗，咁就所以佢就攞走咗80蚊，就同埋將其他嘢抌晒喺垃圾桶㗎喇，咁佢亦都話將嗰個手提電話拎咗去鴨寮街就賣咗四百幾鈫，咁後屘警方去攞番嗰個電話，發覺賣就賣咗係450鈫喇，咁而X亦都係話，即畀番個電話佢睇，佢話嗰個係佢電話，基本上呢啲就係承認咗嘅事實。
背景同埋求情方面，咁背景睇到被告人就係1973年出世，而家51歲喇，咁就係未婚，獨身嘅，咁係有個仔，就係同個前女友生嘅，而家12歲㗎喇，咁被告就話其實嗰個細路係BB幾個月見過，一路都冇再見過㗎喇。咁被告就未拉之前就係做呢一個跟車喇，即係運輸工人喇，咁同埋亦都係有收呢個綜援嘅。咁就被告睇番個案底都有相當嘅案底喇，其中有十三次係同盜竊有關，即係同而家嗰個罪行係相符喇。
喺求情嘅時候，羅大律師都提過呢個係一個順手牽羊嘅情況，因為當時X唔在場，咁就順手攞咗佢啲嘢，仲有就係話被告搞錯咗一啲情況，就以為認罪要認晒三條，連嗰兩項嘅強姦罪都要認埋，所以就冇一早認到罪，咁但係喺後屘清楚情況之下都有認到罪，但係就比較遲咗喇。另外，因為即係被困咗咁耐喇，拉咗之後一路都冇得保釋吖嘛，成兩年幾，咁喺呢段時間就變咗冇咗嗰個公屋，咁就同埋返番出去之後就希望可以攞番間公屋喇，同埋因為亦都知道個老闆，即係以前嗰個老闆一樣有做緊生意，就希望可以出番去之後，就個老闆會請番，做番呢個跟車工人，咁呢啲就基本上係求情說話喇。
本席喺考慮呢個恰當嘅判刑嘅時候，本席亦都係考慮到，呢個好明顯就係被告當時就係趁機，即係趁X唔在場嘅時候就順手牽羊，攞咗佢個手提電話同埋攞咁嗰啲錢嘅，就唔係話一早去有晒周詳計劃咁去偷呢啲嘢嘅，咁而偷到嘅錢亦都相對係少，即係百零鈫。咁當然喇，因為X有4張bank卡（即係銀行卡）搵唔番，咁對佢嚟講都有某程度上嘅不便，咁同埋個電話因為洗晒啲資料吖嘛，鴨寮街收咗佢之後畀450鈫畀被告你嘅時候，咁亦都會係對X係構成啲不便嘅。
本席考慮晒呢個案件嘅整體情況之後，本席就認為以審訊嚟計，審訊之後，8個月嘅刑期就係恰當㗎喇。咁因為被告係有呢個先前嘅相同紀錄個緣故，本席就認為係一個加重刑罰嘅因素，就加多兩個月，咁變咗係10個月。咁因為被告係喺件案件排咗期之後但係喺審訊之前已經認罪，本席就畀番你四分之一嘅刑期扣減，咁有呢個扣減之後，用10個月嚟計，扣減咗呢個四分一，等於七個半月嘅監禁喇。