DCCC 1045/2009
DCCC1045/2009
香港特別行政區
區域法院
刑事案件2009年第1045號
----------------
主審法官：
區域法院法官容耀榮
日期：
2010年3月11日上午10時12分
出席人士：
律政司檢控官Mr Cheung Wai-Sun，代表香港特別行政區 Mr HUI Wai-chun Sammy，由法律援助署委派的林文傑律師事務所延聘， 代表被告人
控罪：
販運危險藥物（Trafficking in a dangerous drug）
--------------------
判刑理由書
1. 本席認為唔需要押後判刑，等候呢個背景報告，既然你律師都曾經提出嘅求情理由就係唔浪費公帑，咁押後再調查你背景作報告就會花費公帑，而作用我睇唔到，你亦都冇講，你律師亦都冇提，所以法庭就今次聆訊得知嘅背景，作為判案嘅參考。
2. 正如你律師指出，判刑指引起點係4年至6年。當然，個毒品份量就唔係應該一定係成直線比例，要睇其他情況，當然毒品份量會影響判刑嘅輕重，亦都係判刑輕重嘅主要考慮因素。
3. 本席睇過你喺呢個販運藥品扮演嘅角色，只係非常低嘅層次，冇乜嘢特別嘅因素令到案情比一般嘅販毒案嚴重，所以判刑輕重最主要都係睇個份量，本席認為呢個起點應該係5年。上訴庭規定喺法庭認罪就一定要畀三分一寬免，未必好似你律師咁講話你後悔，就算你唔後悔，只要你提出認罪，本席可以講係冇酌情權，一定要畀三分一寬免，所以畀三分一寬免，你唔需要多謝本席。
4. 至於有冇其他求情因素，本席睇到有三個可以考慮。你家庭嘅背景，尤其是你係最近結咗婚，同埋你屋企係需要你嘅幫助，但係呢啲對於減輕刑期嘅作用係好細好細嘅啫。
5. 仲有一樣嘢，你就係剛剛出獄，正如你律師所講，未暫穩陣腳，重投入社會，咁好耐以前呢個都係一個求情因素，但係我可以講畀你聽，喺香港嚟講，個作用唔係好大。
6. 另外一樣嘢，無論你係後悔又好，乜都好，本席認為你同警方係合作，合作意思就唔係話你供出其他「犯罪鏈」、指使你嘅人等等等等，而係你對自己本身嘅控罪你係坦白承認，唔多唔少一定係慳番啲警方就你呢件案就你本身罪行，慳咗好多嗰個警力。有個問題就係，如果嚟到法庭先認罪，既然有三分一寬免嘅，本席認為你同警方合作，一早同警方合作，免咗警方浪費喺調查你本身呢件罪行嘅時間，你亦都應該有寬免嘅。點解呢？假如兩個同案罪犯，一個由頭至尾都唔認罪，浪費咗好多警察調查工作，然後先至成到案，嚟到法庭認罪，另一個一早已經認咗罪，咁嚟到法庭，兩個都係如果只係得三分一減免嘅，咁對另外嗰個一早向警察認罪，一早慳番警察時間嘅罪犯係唔公道，亦都唔合常理。所以法庭認為，你向警方認自己嘅罪行，法庭應該考慮畀額外嘅豁免，當然法庭亦都要考慮到已經畀咗三分一嘅寬免，咁所以亦都唔能夠作出太大嘅寬免。
7. 咁呢三個求情因素，法庭認為係應該畀多3個月嘅寬免你。56個月減咗三分一，再減3個月嘅寬免，如果冇計錯數係37個月。