HCCC 166/2016
香港特別行政區
高等法院
原訟法庭
刑事案件2016年第166號
----------------
----------------------
判刑 以下內容乃法庭數碼錄音謄本
官：
陪審團對呢三個控罪，有兩個控罪話你罪名不成立。
而第一項控罪係強姦罪，呢個係一個好嚴重嘅罪行嚟，如果你係罪成，最少嗰個起點係判刑5年。如果有其他加刑嘅因素，譬如好似打個受害人等等嘅嘢，或者恐嚇佢，或者攞把刀出嚟嗰啲嘢，會判刑就加重啲添。
嗰個第二項控罪同埋第三項控罪都係妨礙司法公正嘅罪，但係第三項控罪，陪審團亦都係一致贊成你冇罪。但係第二條控罪，佢哋係五比二係贊成你有罪。本席判你嘅刑係要好忠誠咁樣反映陪審團嘅意思，即是當你係，而亦都係真，就係你強姦罪不成立。但係第二項控罪，即是話你喺2016年1月某日，你係向X，同X傾咗偈，根據證據嚟講，大約個半鐘頭，然後喺個對話期間係以誘因，想誘使佢對你強姦罪個控罪個法律程序係唔畀證據。當時因為你係強姦罪唔成立，你嗰個心理最緊要就係希望上庭冇事，但係亦都你有多少係心裡係被冤枉嘅情緒，所以你係大吐苦水，但係又驚怕要經過法庭審訊你件案件，因為你係喺國內嘅人，你留喺香港又要租屋住、又要冇咗工作，係比較其他人係辛苦，又要離開你嘅家人，咁你父母都向我寫咗啲求情嘅信，都係有好多辛酸。
呢啲咁嘅罪行係冇判刑指引，我睇嗰啲法律嚟講，大約普通係判刑1年。但係最重要，就係本身你係妨礙嗰個司法公正嗰個程序係因為乜嘢嘅法律程序，喺本案嚟講係因為強姦嘅法律程序，咁應該係1年左右監禁嘅判刑係合適。但係本席考慮到你自2015年11月24日之後開始就係被拘捕，雖然畀咗保釋你，但係你都要被逼留喺香港，所以就失去你嘅工作，所以就喺香港係人生路不熟，留咗喺香港，咁都係一個相當嘅懲罰嚟嘅。同埋你以往係未犯過罪，所以本席都可以網開一面，所以本席係判你8個月監禁。