被告L.M.妳就認咗四項控罪嘅，喺裁判官席前，咁當然就係因為妳認咗罪，所以就係交嚟呢個高等法院呢一度判刑喇。
咁第一項控罪就係話--等我睇番啲字眼先，就應該係製作色情嘅物品，妳等我一等。係製作兒童色情物品，違反《防止兒童色情物品條例》，第579章，咁呢個就第一項控罪喇，嗰個控罪嘅係第3（1）條。第二同第三項控罪，就係向16歲以下兒童係做出猥褻嘅行為，違反香港法例第200章 《刑事罪行條例》嘅第146（1）條。咁而最後嗰條第四條，就係協助教唆另一個人去猥褻侵犯（即係非禮）另一人嘅，咁呢個亦都係違反香港法例第200章《刑事罪行條例》嘅122（1）條，同埋係《刑事訴訟程序條例》第221章嘅89條。
咁講講案情，匪夷所思呀，我已經講咗。L.M.就係兩個細路，兩個女嘅生母嚟嘅，X就喺2007年嘅5月30號出世，Y就2005年嘅3月18號出世，即係爭兩年喥喇。咁L.M.妳就同呢兩個細路嘅生父喺2014年離咗婚，咁跟住妳就同兩個女就喺呢個葵涌一個公屋度居住嘅。咁後屘L.M.妳就同L.C.就結咗婚，就喺2015年，咁L.C.就喺雲南嚟嘅，即係大陸人嚟嘅。咁L.C.嚟親香港嘅時候，就會同妳屋企人就住喺呢個葵涌嗰個公屋喇。咁啱啱喺被拘捕之前，L.C.啱啱攞到單程證，可以嚟香港長住㗎喇。
咁樣講番就喺2019年嘅11月6號，X喺學校就畀學校發覺到佢就有𠝹手，𠝹手臂。咁當時就即刻將呢件事件就通知學校社工喇，咁去跟進，點解佢會𠝹手呢咁。咁喺學校--即係喺社工跟進嘅時候，咁就有見佢面喇，咁佢當時就同社工講，就話喺2019年嘅4月、5月呢段期間，咁佢就去瞓覺喇，咁就瞓覺就同媽媽，即係L.M.妳喇，就同埋繼父L.C.就瞓同張床。L.M.就係撳咗佢喺床度，就除咗佢嘅底褲，咁而呢個L.C.就用口去舔佢個私處，同埋又用佢嗰個陽具去踫呀、掂呀呢個X嘅私處。咁就當時因為X畀阿媽撳住吖嘛，咁就喐唔到，亦都太驚唔敢出聲。咁佢做完晒呢啲程序之後，咁佢哋兩個就離開咗嗰個房喇，咁X就即刻去沖涼，咁跟住就將件事話咗畀佢家姐（即係Y）聽。
咁當社工聽到件咁嘅事，梗係即刻報警喇。咁報咗警，咁於是警察就嚟見X，就見埋Y，咁樣先至發覺到原來就呢個一連串嘅事件，就係阿媽就同埋呢個嘅老公喇，即係佢哋嘅後父係對呢兩個細路係有性侵嘅。
咁認咗第一控罪嘅詳情係點呢，就係話有一段嘅錄影片段，就睇到X就係除晒啲衫，除到佢就係完全赤裸裸喇，咁呢條片段就喺L.M.嗰個手提電話度搵到嘅。咁而睇到當時喺嗰個片段度顯示嘅日子，就係2017年3月3日。咁喺錄影會面喇，即係拉咗被告妳之後，L.M.妳就話因為妳離咗婚之後就迷信，所以就用個iPhone就拍呢啲X嘅祼照，相信咁會令到X嘅身體就會健康啲。咁妳就喺個警誡之下嗰陣時講，就話會將呢啲咁樣嘅X嗰啲祼照就送去畀個神婆，咁然後就會--關於話同妳睇相咁上下呢啲嘢喇，咁就已經將嗰啲相後屘就係刪除晒喇咁，呢個就係控罪一嗰個妳承認咗個內容。
咁控罪二喇。控罪二就X記得，Y就唔記得喎，反而。X就記得就喺2018年至到2019年3月呢段期間，就喺番屋企喇，即喺葵涌屋企喇，咁阿媽就話「我教妳兩個點樣避孕，點樣就會有BB嘅」，咁於是就叫「嗱，你哋睇喇」咁。於是兩個就睇住喇，喺個房入面，就睇住被告妳就同個老公就係完全赤裸係喺床上性交，呢個第二項控罪。
咁第三項控罪係咩呢？妳承認嘅案情，今次就輪到阿Y記得，就係X唔記得喇喎。咁Y記得就喺2018年嘅7月至到2019年3月嘅其中有一晚，咁就喺間屋入面喇，咁阿媽妳就話要教佢哋兩個性教育，就點樣呢有性行為嘅。咁於是就叫兩個入房，咁佢入咗你哋個房喇，咁跟住阿Y就見到當時後父已經赤裸裸瞓喺床㗎喇。咁阿媽就除晒啲衫，咁然後阿媽就同呢一個後父就係喺個床上性交，咁X同Y就坐喺床邊度睇。咁一路做緊嘅時候，即係佢哋性交嘅時候，阿媽仲示範「嗱，咁樣就係手淫喇，咁樣就係口交喇」。咁然後做晒呢啲喇，X同Y就離開嗰個房間，佢哋性交完，就離間房間。
咁喺錄影會面嘅時候，即係警察錄影會面嘅時候，L.M.妳（被告人）妳就話因為X同Y對於性就好有好奇，咁所以你哋喺佢哋嘅面前就示範點樣同自己嘅老公係進行性行為。佢話示範過幾次㗎喇，不過都唔係好記得啲日期幾時喇。咁妳仲話就教佢哋嘅時候，佢仲有叫X同Y「嗱，妳摸下後父嗰個性器官喇」，同埋就做畀佢哋睇點樣性交嘅，咁呢個就係第三項控罪。
好喇，最後一項控罪，即係第四項控罪喇，嗰個詳情係點呢。就喺2019年嘅4月22號喥喇，就係夜晚嘅，咁就喺個屋企入面喇。咁當時X就係瞓緊覺嘅，即係佢就同妳同埋妳老公喇，佢後父喇，就瞓喺張床度嘅。X突然間就覺得有人就伸隻手入去佢個衫嗰度，就即係衫下面呀，上衫下面，去摸佢個胸部。有人就係將佢嗰件衫就揭起咗，然後就聽到阿媽妳就用雲南話講話「你睇下喇」咁。咁X就想喐佢自己身體喇，咁發覺阿媽就撳住佢對腳，唔畀佢喐，仲有就將佢嘅面褲同底褲都除晒，仲有就用雲南話就講話「快啲喇，快啲喇」咁。咁於是跟住就阿媽就叫個老公「嗱，妳去舔佢個下體喇」，咁呢個嘅老公就照做。咁跟住呢個老公就點呢，就係用手揸住佢嘅陽具，就喺X嗰個私處嗰度就掂下掂下，上上下下咁摸。咁X就想喐動佢嘅身體嚟唔好畀呢個後父喐到佢喇，但係因為佢喐唔到喇，同埋佢已經好驚呀，都唔敢出聲呀。咁跟住就完咗事之後，呢個阿媽就幫X著番褲，咁跟住X就返番去佢本來同家姐同住嗰個房度，佢就話咗畀家姐聽呢件事。
咁就呢一個控罪，承認呢個案情，L.M.妳喺警誡之下就講，就話喺互聯網度睇到有啲咁樣嘅訊息，就話如果妳想兩個女乖乖地呀，身體又好，妳就要畀自己個男人（即係老公喇）去𡃶妳個女嘅私處。咁喺2019年4月嘅晚黑，當時X就瞓緊覺嘅，就同佢同埋老公喇，咁佢就承認佢係有除咗X嘅底褲同面褲，咁就亦都叫醒老公喇，就叫佢去舔嗰個女嘅性器官，即係X嘅性器官。咁然後跟住咁L.C.就返番去瞓覺喇，咁X就返番去自己間房。咁當時問佢，佢同差人咁講喇，話當時個老公問佢「喂，點解要叫我咁做呀？點解叫我去舔個女個私處呀？」咁佢話佢就同個老公講話「你總之跟我嘅指示照做喇」，咁就當時佢自己都覺得就X，即係個女，就好唔開心，有喊嘅。咁佢就有同個女解釋話「呢啲為妳好㗎咋，為身體好㗎咋」，咁同埋就話「妳咁樣做咗，妳同阿Y先至會乖女嘅」咁，呢啲就係妳承認咗嘅案情。即係接唔接納另計，呢啲係妳同差人講嘅啫。
咁就背景喇，同埋求情陳詞。被告妳就1980年喺內地出世嘅，咁而家即係42歲喇。咁就喺1992年嚟咗香港，讀書都讀到中二㗎噃，唔係話冇識之士喎，都讀到中二，咁今次事件之前係冇案底嘅。咁以前又做過啲咩工作呢？喺1997年至99年就做呢個所謂sales喇，即係營業員。咁然後1999年至2013年係做呢一個美容師嘅，2004年結咗婚，咁就結咗婚之後就生咗兩個女喇，X同Y喇。咁2014年就同老公離咗婚，咁跟住就同兩個女喺呢個公屋住，咁就係靠綜援嚟過活喇。咁喺2015年就嫁咗畀呢位L.C.，咁L.C.就喺雲南嚟嘅，咁L.C.因為佢係內地人喇，佢嚟親香港就會住喺呢一個葵涌嘅公屋。
咁喺求情方面，林大律師--即係當然係代表被告嘅林大律師喇，佢陳詞就係話被告對於犯咗呢啲咁嚴重嘅罪行，尤其係對佢自己嘅細路犯咗啲咁嚴重罪行就非常之懊悔喇。咁點解佢會影X，即係用嗰個錄影去影X呢？咁佢就話同--又叫X同Y睇住佢同自己個老公去進行性行為呢，又叫自己個老公去𡃶呀，或者係舔嗰個X嘅私處呢？呢啲全部都係因為佢迷信，就相信呢啲咁嘅師傅呀，嗰啲就話做咗啲咁嘅嘢，係會令到佢自己嗰啲細路嘅身體會好啲，又令到佢哋會乖啲。咁而家佢都知道就咁樣令到佢兩個細路去睇佢同個老公進行性行為係完全錯嘅，就算啲細路仔係對呢個性有好奇，都唔可以用啲咁錯誤嘅方法去教佢嘅。
咁林大律師亦都係陳詞，就話被告之所以干犯呢啲咁嚴重嘅罪行，某程度上因為佢嗰個教育水平低，同埋就係又加上係當時離咗婚之後，係因為結咗婚十年之後就離婚喇，咁就變咗係單親，咁就唔知點樣係去教導自己呢兩個細路。咁亦都林大律師就提到，喺法庭度有好多性侵嘅案例喇，咁就已經提出咗話判刑嗰個原則，就係話當一個人如果係犯呢個性侵係對兒童犯嘅話，咁嗰啲一系列嘅案件。咁我唔喺呢度特別提嗰啲案件喇，最主要嗰個情況就係話，睇咗呢啲案例之後，林大律師話被告人妳都--清楚同妳解釋咗喇，坐監就坐梗㗎喇，因為法庭一定係要保護呢一啲嘅細路仔喇，同埋法庭係都會考慮呢啲令到案件嚴重嘅情況。喺呢件案件，當然係令到案件更加嚴重嘅情況，包括當時兩個細路都係未成年人喇，就係嚴重違反誠信喇，因為妳係佢阿媽嚟㗎嘛。仲有就係話有成四次，喺兩年嘅期間，即係一連串嘅四次去性侵呢個細路喇。仲有就係話對呢個細路仔所影響嘅傷害，令到佢哋受到創傷。
咁林大律師就建議第一項控罪，就6個月至12個月嘅刑期應該都已經係可以反映到呢個罪行嘅嚴重性，同埋呢一個罪責㗎喇。因為睇到就一來被告妳係冇案底喇，二來錄影嘅時候X就9歲，咁睇就睇到佢係除晒啲衫，但係就喺呢一個話色情嗰個範疇係屬於最低嗰步喇。咁而根據被告妳嘅講法，去錄影就唔係話去搵錢呀，或者係再作任何商業或者係非商業用途嘅，咁而只不過係因為X妳就係迷信，咁所以做呢樣咁嘅嘢。
咁而第二、第三項控罪，林大律師個陳詞就係話被告人當時因為係畀X同Y去睇妳同妳自己嘅先生，或者老公喇係進行性行為㗎嘛，所以係呢個性侵喇，咁而當時仲要叫兩個細路又去摸妳老公嗰個陽具添。咁佢陳詞就係話，雖然有咁樣做到，但係呢個係同一個嗰啲有呢個色情狂，去畀錢人去摸佢個性器官，相對之下係冇咁嚴重嘅，有一件案件嗰個譯音叫做李國偉（譯音）嘅，就係咁嘅案件。情況就係嗰個被告係畀錢畀人去摸佢嗰個性器官喇，就係呢個係可以講係話對呢個兒童就特別有侵略性嘅。咁而佢就係喺嗰件案件，就係林大律師嗰個陳詞，就係話以呢兩項嘅控罪，量刑起點兩年至三年都係應該足夠㗎喇，就考慮到當然嗰個案情係有嚴重性喇。又另外一方面，就係被告妳係冇先前案底，同埋當時亦都係冇用任何嘅恐嚇呀，或者係啲利誘嚟令到X同Y係屈服嘅。咁亦都冇用到任何係不當或者係嚴重嘅武力去傷害X或者係Y嘅。咁仲有被告就要X同Y去睇妳同妳個老公進行性行為，都只係幾分鐘嘅時間嘅啫，就摸就摸過一次，咁呢啲係求情說話喇。
咁林大律師就都接納呢個咁樣嘅性侵，即係最後嗰個性侵，被告妳幫個老公嗰個性侵係嚴重嘅。咁佢就係話嗰件係3年嘅起點應該都足夠㗎喇，咁就提咗一件案件就係叫做L.C.M.嘅。咁喺嗰件案件，上訴庭就係話3年嘅起點，即係嗰個因為係一個人去非禮一個15歲嘅女仔，即係又𡃶佢個胸部呀，又用手去摸佢個下體呀咁樣，咁就嗰個都係--就係3年。咁林大律師就話，被告妳撳住個女，夾硬除咗佢嘅底褲，都係比較嚟都唔係話好嚴重嘅武力行為。咁就同埋就嗰個老公用脷去舔嗰個X嘅私處都只不過係幾秒，十秒喥嘅時間嘅啫咁。咁林大律師就話，當然被告因為認罪，係應該得到三分之一嘅刑期扣減。咁林大律師就話喺呢件案件係有一個獨特嘅情況，係令到話除咗三分一之外，係更加可以多啲嘅減刑，咁係乜嘢呢？就係話咁樣警察嚟到拉嘅時候，就非常之合作喇，咁又認晒喇，然後就又認罪，咁又唔使嗰兩個女上嚟畀口供喇，咁同埋就覺得困咗咁耐，變咗就唔能夠對X同Y做出咗自己作為媽媽應該照顧佢哋咁喇，就希望快啲可以出番嚟照顧兩個細路，咁呢啲就係構成咗話特別嘅情況，可以令到嗰個個刑期扣減係多過三分一。
咁而除咗林大律師，我已經提咗被告妳嘅求情陳詞，我就睇到被告個女--嗱，我睇到淨係X喎，我就睇唔到Y有寫信嚟，咁我唔知點解Y冇喇，總之而家就係X寫封信上嚟。咁就話求情嘅，咁同埋被告妳嘅家姐都寫信嚟，基本上就係希望輕判喇，話快啲放妳咁樣喇。個女就直情話雖然阿媽有做錯，不過就原諒咗阿媽喇。咁嗰個被告嘅家姐就話被告係好媽媽嚟㗎，就又係孝順女嚟㗎，咁而家被告已經知錯喇，咁就兩個女都好掛住阿媽咁。
咁啱啱喺而家判刑之前，我就攞到呢個就X喇，有一份嘅心理專家，臨床心理學嘅報告喇，咁我當然唔會將嗰啲詳情講出嚟喇，因為呢個都係涉及佢嘅私隱。咁就呢個報告都相當新嘅，係今年嘅1月17號嘅啫。但係可以睇到好明顯呢個細路女係受到呢個創傷嘅後遺症。仲要其實呢件事件之所以揭發，就因為佢𠝹手吖嘛，咁所以妳亦都可以睇到佢係有自殘嗰個嘅跡象，就係話呢件事件困擾到佢咩程度喇。咁而佢同心理學家都講到，佢話阿媽應該係保護佢嗰個人，不單只唔保護佢，仲要係幫埋人哋手嚟去咁樣性侵佢，就所以令到佢係非常之困擾。佢仲要報咗警之後，喺2020年仲曾經因為試過自殘係要送咗去醫院嘅。咁好明顯到而家，佢都係唔能夠話完全釋懷喇。咁亦都其實冇呢個報告，其實我都可以想像到一連串呢啲嘅事件對佢--尤其咁細個一個細路女喇，嗰個影響係大到點。
咁好喇，咁關於話喺呢四宗罪行，嗰個判刑嗰方面嗰個原則係乜嘢呢？咁我好多謝林大律師，因為林大律師都好盡力係畀咗相當多關於呢四項控罪嗰啲嘅案例。咁首先就講講就係話關於兒童色情物嗰方面喇，咁最重要就當然係一個叫做萬廣材嘅案件，同埋另外一件就叫做--譯音喇，葉定芬喇。咁而關於性侵，不論係話猥褻侵犯，或者係對16歲以下嘅兒童作出呢一個猥褻行為，都有相當多嘅案例。咁其中譬如包括周遠輝（譯音）喇，同埋呢個嘅曾超德（譯音）喇，或者係同一個李漢華嘅案件。
咁好喇，首先睇番製作兒童色情物品呢個罪行，即係控罪一喇，咁呢個控罪如果一經從呢個公訴程序定罪，罰款可以去到$2,000,000同埋監禁8年嘅。咁喺萬廣材一案，上訴庭已經係將呢啲兒童色情物品係分咗四類喇，咁而呢件案件就應該係屬於第一類嘅，即係話內容係刻畫祼體兒童作出色情成份嘅姿勢，即係嗰四類𥚃面係最低嗰一個嘅。咁而就嗰個量刑方面，萬廣材講話就第一類，因為如果係數量少，感化令呀，社會服務令嗰隻罰款，都可能已經係到咗適合㗎喇，但係如果數量大，就或者係描畫得非常之引人聯想，就一個月至到六個月嘅監禁係較為適合嘅。
咁而喺頭先講過嗰個叫做葉定芬嗰件案件，上訴庭就話係製造呢一個色情物品係比管有更加嚴重嘅，咁呢個大家都可以明白喇，普通管有同呢個製造當然係兩回事喇。
咁而係另外嗰三項性侵嘅罪行就涉及性侵兒童嘅罪行係冇量刑指引嘅，妳睇番周遠輝嗰件案都係咁講，同埋呢個李漢華嗰件案件都係咁講，話其實都好明顯睇到點解會冇呢一個量刑指引呢，因為件件案唔同㗎嘛。咁而喺一件叫做侯其聰嘅案件，當時楊振權法官就已經指出，性侵兒童嘅案件，因為每件案件案情唔相同，犯案手法呀，嚴重程度，犯案嘅期長短，犯罪嗰個人，同埋受害人嘅背景關係，冚𠾴唥都係有分別嘅，所以呢一啲嘅案件就咁睇個先例去話作呢個指導，其實嘅作用唔係好大嘅。
咁喺另外一件案件叫做吳岳威嘅，咁當時上訴庭都同意侯其聰呢個講法，即係呢個講嘅原則喇，不過就加多句話就喺公平，公正嘅原則之下，法庭應該都避免話對嚴重程度差唔多嘅案情係判處不一致嘅刑罰。
咁而上訴庭喺李漢華呢件案件，其實就係就與年齡在21歲以下嘅男子作出肛交，同埋就係向年齡喺16歲以下嘅兒童作出猥褻行為罪係判刑，法庭要考慮嘅因素，即係嗰件案。咁有關嘅因素，喺另外一件案件係叫做李國偉（譯音）嘅，就係亦都畀法庭接納。咁當然呢件案件唔涉及肛交喇，但係就有關嘅原則，因為講番李漢華嘅嗰件案件，都係有向年齡在16歲以下兒童作出猥褻行為罪有關㗎嘛，咁所以我認為嗰個有關嘅原則都係適用於喺呢件案件嘅。
咁嗰啲因素係咩呢，係包括咗第一，呢個被告人同受害人年齡嗰個差距。第二，被告人同埋受害人嗰個關係，即係包括被告人係咪有利用佢嘅職位，或者佢嘅身份去犯案，同埋犯案嘅時候係唔係有破壞到呢個人哋對佢嘅誠信喇。第三，就係被告人有冇用威逼或者利誘呢個受害人，令到受害人就範嘅，供佢淫慾喇。第四，就係犯案次數嘅多少，犯案時段長短。第五，犯案嘅時候係咪有涉及不當或者不必要嘅暴力，或者係咪有對受害人造成傷害或者係不適。第六，就係犯案嘅時候有冇採取到適當嘅安全措施，係咪有對受害人或者大眾嘅衛生安全造成危害。第七，罪行係咪對受害人造成身體，或者嘅傷害，或者心靈嘅創傷。第八，就係罪行對受害人嘅家人有冇影響。第九，就係被告人有冇涉及其他不當嘅行為，譬如或者邀請，或者容許他人在場觀看呀，或者係拍照呀，錄影呀咁樣。最後就係被告人係咪有心理失衡，或者係戀童嘅癖好，就重犯機會高低等。咁呢啲就係嗰個原則喇。
咁好喇，跟住就係我係點樣考慮呢件案件嘅判刑喇。咁首先就提番，啱啱講出嗰啲嘅元素喇。咁最嚴重嘅一點，就係被告妳係阿X同阿Y嘅媽媽，妳不單只唔去保護佢哋，反而係令到佢哋受到性侵，受到傷害。仲要唔係單一事件，係一連串嘅事件。其實睇到--當然呢個你唔在場，因為L.C.另外喺高等法院嘅案件2022年嘅73號，即係啱啱琴日完咗嗰件案件，就當時阿Y係有畀口供嘅。不過Y當時就同法庭點講呢，佢就話佢唔覺得阿媽妳對佢做呢啲嘢係構成性侵，即係佢話阿媽要佢睇阿媽同繼父進行性行為，阿媽教佢點樣戴避孕套，阿媽向佢示範口交同埋呢一個手淫，阿Y自己唔覺得係性侵嚟嘅，呢個妳可以想像到嗰個傷害係點，因為嗰個係佢阿媽，所以佢唔覺得係性侵。L.C.自己同佢做嗰啲嘢就係性侵，但係阿媽在場就唔係性侵喇，咁妳可想而知妳對個女造成嘅傷害去到乜嘢嘅程度。咁當然，受害人唔覺得自己係受到性侵，唔等於唔係性侵喇，好明顯係性侵喇，因為妳都認咗罪喇。我只係話所以顯示到，妳自己做呢啲咁樣咁錯誤嘅情況，嗰個影響係去到咩程度。
咁好喇，仲有就係當然我有X嘅關於佢心理方面嗰個報告喇，阿Y我就冇嘅。咁但係雖然佢大個少少，大兩年，但係都一樣係喺咁樣嘅情況之下嚟受到呢一個嘅性侵，對佢影響會係點呢，係咪？咁好喇，當然對佢嚟講，就喺呢個控罪𥚃面嘅一條喇，即係四條𥚃面嘅一條係叫佢睇喇。咁好喇，控罪一。咁我頭先其實都已經講咗喇，喺妳嘅代表律師同妳求情嘅時候妳已經講咗喇，一個現代嘅女性，讀書都讀到去中二喎，唔係話完全冇讀過書㗎喎，又做過售貨員喇，又做過呢一個美容師，居然話畀我聽相信用個電話喇，影咗個女嘅祼照，會係對個女身體好啲？我覺得難以置信喇，我真係唔知點解妳會做啲咁嘅嘢。
另一方面，我亦都接納冇證據話被告妳咁影咗係愛嚟賺錢嘅，或者係賣畀人呀，商業用途，唔係嘅，就都冇呢方面嘅資料。咁亦都接納--即係頭先都講咗喇，其實係喺呢個萬廣材嗰件案件所講嘅四個類別，係最低嗰個類別。咁但係都仍然唔係硬照喎，係一個video嚟㗎喎，係個錄影片段嚟㗎喎，咁梗係更加嚴重喇，仲要係妳自己影㗎喎。咁雖然話被告妳唔係去--人哋幫妳影咗畀妳呀，而係妳自己去影添，所以係更加嚴重吖嘛。咁我認為呢個量刑起點6個月係啱嘅，okay？咁呢個第一項喇，起點嚟嘅，6個月。
第二同第三項控罪，我亦都認為係好難接受被告人妳做嗰啲嘢就係話係性教育，我根本唔可以想像個阿媽會咁樣自己親身示範性教育畀兩個女，就仲更加唔可以接受，就係話仲要係為佢哋身體好喎。咁我考慮晒頭先已經講咗嗰啲嘅情況喇，就被告妳係佢兩個嘅阿媽喇，又唔保護佢哋，仲要係將佢哋--喺佢哋嘅面前係令到佢哋受到性侵咁多嘅情況喇，就仲有妳自己仲差嘅，仲話要教佢哋去掂嗰個老公嘅性器官。雖然係冇用到暴力，即係唔算係好暴力喇，但係都可以想像兩個細路女，阿媽叫佢做嘅，會唔會係冇壓力呢，梗係有壓力喇，阿媽叫到咪做囉，咁所以都唔可以係話完全一啲咁多嘅壓力都冇㗎嘛。咁兩個女好明顯亦都係有受到呢啲事件呢一個創傷喇，所以就呢兩個--等我睇番先，就應該係用兩年同埋兩年半作為量刑起點。
咁好喇，到最後嗰項控罪喇，咁其實林大律師都同意喇，呢件就其實真係好嚴重嘅，被告妳就幫妳個老公去非禮妳個女X，咁就仲要係--睇下先，仲要就係好嚴重嘅非禮嚟嘅。咁仲有就係妳又唔去保護佢喇，仲要係幫手撳實佢，除咗佢嘅面褲、底褲，好明顯係露出佢嘅私處喇，然後就等妳個老公去咁嚴重非禮，嘩，好難想像一個男人去用個舌頭去舔一個細路女嘅私處，用佢個陽具去喺嗰個細路女嘅私處出面嗰度咁嚟喐動。而係個阿媽撳住個女，畀個老公咁做，真係非常之非常之嚴重。其實都可以想像到，當時X嗰個受震驚，同埋嗰個受創傷嘅程度會去到點呀，好明顯就係因為呢件事就所以報警喇，後屘，因為佢要𠝹手吖嘛，所以先至會又喺學校發覺到喇。咁呢個我就認為3年嘅量刑起點先至係適合嘅。
咁好喇，咁被告妳認罪喇，咁認罪當然係喺--因為妳喺最早嘅時候已經認罪喇，可以得到三分之一刑期扣減。咁雖然林大律師已經好盡量咁幫妳求情喇，但係我完全唔同意呢件案件有乜嘢獨特嘅情況係話除咗三分之一嘅刑期扣減要加多啲，我話冇嘅。咁所以就呢四項嘅控罪，喺有咗呢個刑期扣減之後，第一項控罪就4個月喇，6個月減到4個月。第二項控罪就16個月，即係兩年減到16個月。第三項控罪就20個月，即係兩年半減到20個月。第四項控罪就24個月，咁就係話三年就減到兩年喇。咁加加埋埋就係64個月，即係五年零四個月，加埋晒。咁當然我要考慮刑期整體性喇，唔可以就咁判妳去五年四個月監禁喇。咁我考慮晒之後，就認為3年係一個恰當嘅，即係整體刑期3年，因為如果用3年，即係用3年係減咗刑，當番轉頭，即係話全部嗰個整體嘅起點咪四年半囉，咁我覺得都適合㗎喇，都已經係反映到妳嗰個嘅罪責。
咁所以嗰個判刑就會咁喇，第一項控罪4個月，第二項控罪16個月，同第一項控罪同期執行，加埋都係16個月喇。咁跟住同第三項控罪就係嗰20個月，又係同期執行，即係夾埋晒頭嗰三項控罪仲係20個月。咁然後第四項控罪嗰24個月，其中16個月就要分開執行，咁即係話呢20個月就係再加多16個月，咁加埋晒就係36個月，明白喇嘛？