香港特別行政區 訴 曾偉聰

HCCC 77/2018

[2018] HKCFI 1654

香港特別行政區

高等法院

原訟法庭

刑事案件2018年第77號

----------------

----------------

----------------------------------

判刑

以下內容乃法庭數碼錄音謄本

----------------------------------

官：　

被告曾偉聰被控一項販運危險藥物罪，違反香港法例第134章《危險藥物條例》嘅第4（1）（a）同（3）條。被告人喺裁判官嘅席前承認控罪，交付嚟高等法院原訟庭判刑嘅。

睇番承認咗嘅案情係點講，就喺2017年9月13日，當時就係有呢個海關嘅人員，就著住便服，喺呢個洗衣街附近嗰度嚟巡邏，就見到被告人你當時個形跡可疑，於是就截停咗你，當時被告人你就係揸住一個灰色嘅膠袋喺右手，同埋就孭住一個斜孭袋嘅，呢一個海關人員就搜查嗰個灰色嘅膠袋，就發覺入面係有一個可再封口嘅膠袋，而入面又有一個白色嘅袋，載住後屘係經過化驗之後，知道係994克嘅「冰」毒，而嗰個巿值當時嚟講係327,026鈫嘅。拉咗被告人你，警誡你，同埋就喺你身上搵到現金300鈫同埋兩部手提電話。被告人就被帶返屋企度去搜，屋企就搜唔到嘢嘅。

講番被告你個背景同埋求情陳詞。首先根據當時呢個海關人員同被告人你攞嗰份嘅經歷嘅口供，就得知你係喺1993年1月出世，即係而家25歲，就結咗婚，有一個女，個女而家就即係超過1歲，當時9個月大。喺未拉你之前，就係同屋企人住嘅。你讀書就讀完到呢個中學二年級嘅程度，就曾經試過喺2009年至2012年係做呢一個冷氣嘅工人，月入係20,000鈫，但係由2012年開始就已經係失業。

被告人你有六次嘅刑事紀錄，其中一次係管有危險藥物，係2008年嘅事嚟，當時就畀法庭係判你要做呢一個社會服務令96小時。呢啲即係喺嗰個文件度，以我得知嘅。

而你嘅代表大律師陸大律師，就畀多咗關於你嘅背景，同埋點解你會干犯呢件咁嚴重嘅罪行呢方面嘅資料畀我，因為被告你係冇販運危險藥物嘅案底，先前一次係2008年，就係管有危險藥物。陸大律師呈交上嚟，就包括有被告人你自己寫嘅一封信，你呢個印尼籍嘅媽媽，就係透過一位社工幫佢寫嘅一封求情信，即係幫你媽媽寫畀我睇嘅求情信。同埋又有一啲係醫療嘅報告，呢啲醫療報告有一份係你媽媽嘅，其他嗰幾份係關於被告你嘅，我唔會去詳細講話即係信入面嘅內容係乜嘢、嗰個醫療報告內容係咩嘢，我只係畀個總括嘅講法。可以講就係，被告你就係喺屋企裡面，即係爸爸、媽媽就有兩個仔，你係做大仔嘅，爸爸其實已經過咗身，所以媽媽係寡婦嚟嘅。

你細個嘅時候就已經係患咗一個病叫做類風濕性嘅關節炎，然後到咗2015年，就因為即係呢個手腳乏力，就先至發覺原來係患咗一個叫做多發性硬化病，其實英文叫做multiple sclerosis，即係我叫做MS，即係咁嘅症狀，因為有呢個MS，就唔可以去即係做嘢，而根據陸大律師畀我個資料，呢個MS即係呢種多發性嘅硬化病，係暫時冇根治嘅情況，唔可以根治嘅，咁最多可以做嘅就係靠藥物，啲藥物嚟緩解嗰個症狀，即係症狀係包括四肢無力，眼又可能係睇嘢睇得唔好，好多嘅症狀，嗰啲嘅藥物只係會緩解個症狀，同埋係加快呢個復原，嚟改善嗰個患者嘅生活質素嘅啫，即係基本上係冇得根治嘅，我想講嗰個重點就係。而就睇番就係話，因為被告人你--即係睇你嚟講，最主要你因為患咗呢個MS，就係四肢無力，即係身體無力，做唔到嘢，同埋係有因為呢個情況，即係個眼嗰個視力係模糊，仲曾經要去醫院度係接受治療，而家據我理解就係，你係一樣--即係雖然係被囚禁，都有帶到你去醫院度接受呢個覆診嘅，同埋係一路都有藥食緊嘅，就講到即係呢個情況就係而家個情況。

講番點解被告人你干犯呢個控罪，陸大律師嘅求情就話畀我聽，因為被告人你喺2015年就已經發現咗有呢一個MS嘅症狀，就做唔到嘢，要接受呢個綜援去支持生活，就即係唔可以供養自己屋企人，又覺得即係聽到啲人嘅閒言閒語，自己好自責，即係怪責自己點解會有一個咁嘅病，唔可以去盡做仔、做人丈夫或者係做爸爸嘅責任去賺錢呢，一時就諗歪咗，就受到他人嘅利用，所以就去販運毒品，干犯咗而家呢個罪行，被告人而家你已經非常之後悔，你亦都希望自己嗰個MS嘅情況即係會係改善，將來出咗監之後係能夠盡番自己做仔、做丈夫同埋做爸爸嘅責任，即係最主要係呢一方面。

而被告你個媽媽就其實喺2014年已經發覺到佢係患有呢一個嘅抑鬱症，而食咗藥之後情況係改善咗嘅，不過因為被告你就呢件事件被拘捕之後，佢就好擔心你個情況，令到佢復發，又要再返去睇番醫生。當然好明白到，身為媽媽，知道被告人你即係被控干犯咗咁嚴重嘅罪行，好明顯就係會傷心同難過，而媽媽喺嗰封信入面都係要求本席係盡量輕判被告你，等你可以早啲出獄嘅。

而陸大律師亦都非常之正確咁樣喺佢陳詞指出，被告人你本身嗰個嘅背景同埋你嗰個病況，唔係一啲減刑嘅理由嚟，只不過係話就希望本席去明白到，點解被告人你會干犯一個咁嚴重嘅罪行，亦都希望本席係考慮到被告人你喺好早嘅時候已經認罪，畀你一個最大嘅扣減。

好，講呢一個判刑。販運毒品係非常之嚴重嘅罪行，一名人士如果係經過公訴之後被裁定罪名成立，係可以被判終身監禁同埋罰款$5,000,000。呢件案件涉及嘅「冰」毒係994克，根據一件叫做譚伊真嘅案件，同埋呢一個叫做Abdallah嘅案件，就係販運600至到1,200克嘅「冰」毒，經審訊之後嘅判刑起點係20至到23年，即係喺呢個範疇，20至23年。我考慮咗呢件案件嘅案情；考慮對被告人你嗰個喺呢件案件扮演嘅角色，即係幫人帶啲毒品去由一個地方帶到另一個地方；又考慮到呢個「冰」毒嘅份量，994克，其實都好近1公斤；同埋亦都考慮埋你係喺乜嘢嘅情況之下，去干犯呢一個咁樣咁嚴重嘅罪行。我就認為，呢個量刑起點係21年就啱。而被告人你喺最早嘅時候已經承認控罪，所以本席會畀你足足嘅三分之一刑期扣減。除咗呢一個認罪嘅減刑之外，我就睇唔到有其他嘅理由係再減刑，即係雖然本席對被告人你患有呢一個嘅MS係深表同情，但係呢個唔係一個減刑嘅理由。以21年為量刑起點，經過扣減之後，嗰個刑期就係14年。

所以，就呢一個販運危險藥物，被告人你係需要服刑14年嘅。