被告人，你經審訊後被裁定一項有意圖而傷人罪，罪名成立。本席喺判刑嘅時候考慮咗整體情況，包括案件嘅性質同埋情節，你嘅個人背景，同埋辯方大律師嘅求情陳詞。
本案嘅案情係簡單嘅。事主周艷女士係一名內地人，案發當日佢以訪客嘅身分留喺香港，喺廟街居住同埋工作，從事性服務。當日下晝大約1時30分，周女士喺佢住所樓下遇上你，經過簡短嘅談話之後，你哋兩個人到咗周女士喺樓上嘅房間。之後你入咗洗手間，期間周女士脫咗佢嘅衣服，只係剩下內褲，一心為咗向你提供服務，全無防範。當你從廁所出嚟之後，喺衫袋攞咗一把刀出嚟，首先傷咗周女士嘅臉部，然後再傷佢身體數處地方，令到佢流血。
經過身體檢查之後，發現周女士身上面有五處深度嘅裂傷，一，佢前額有一條11厘米長嘅割傷。二，從佢左眼角至到上唇有一條12厘米長嘅割傷。三，佢右邊腹股溝有一條15厘米長嘅割傷。四，佢兩邊大腿前方各有一條10厘米長嘅割傷。呢啲傷勢全部都係你嘅襲擊造成嘅。周女士需要接受急救手術去修復佢身體上面嘅割傷。佢留院幾日，喺1月3號出院。
本席得知你現年63歲，已婚，同埋妻子與及三名子女同住。以往曾經有工作，但係而家一家人靠領取綜援維生。喺2010年8月你進行咗肺癌手術，健康欠佳。
你干犯嘅罪行係十分嚴重嘅，明顯你係有備而犯案嘅，並非一時理性受蒙蔽先至做出咁嘅事。你帶備咗可以傷害他人嘅刀，藉詞尋求性服務，而令到事主同你獨處一室，而且脫去衣服，放下戒備之心。喺咁嘅情況之下，你竟然不發一言就向一位毫無防範嘅女士施襲，而且不止一次用刀傷佢嘅臉部，亦都傷事主身體其他部位。從呈堂嘅相片可見事主流咗不少血，佢需要接受手術治療，留院三天。
毫無疑問，每一位女士都對佢嘅臉龐會十分珍惜，被人咁樣傷臉部，其傷害同埋憂慮不言而喻。更何況事主從事嘅行業，臉部受傷甚或影響佢嘅生計。呢啲情況被告人你係完全知道嘅，你咁樣出手，居心極為不良。
事主所受嘅傷唔輕，從相片可見，傷勢係嚇人嘅。尤幸醫治得宜，初時留喺臉上面嘅疤痕，現在已經冇當時咁明顯。不過，從事主喺作證時候見到佢自己傷勢嘅照片嘅時候嘅反應，可見佢嘅心靈創傷依舊。
喺呢一類案件，如果控方備有事主嘅醫療進展報告同埋心理創傷報告，對法庭評估恰當嘅判處大有幫助。不過控方冇預先準備，未能向法庭提供呢啲資料。當法庭向控方提出要求，聽取呢一啲資料嘅時候，控方知會法庭，現階段事主周女士急欲返回原居地，不再為事件操心，因此我所講嘅報告已經不能夠提供。喺咁嘅情況之下，本席喺判處嘅時候，只能夠以上述嘅觀察為依歸，即係周女士嘅傷勢並冇引致佢有長遠嘅肉體傷害。不過佢臉上面留有疤痕，雖然已經冇當初咁顯眼，但係原本嘅容貌不再。至於心理創傷，本席認為依然係有嘅，但係因為缺乏資料，所以唔會以心理創傷係屬於嚴重程度嚟考慮。
你立心向一名以俗稱「一樓一鳳」為業嘅女士下手，亦都係法庭不能輕視嘅。因為以咁為業嘅女士處身於一個易被侵犯嘅工作環境，不法之徒利用呢個情況去犯案屢見不爽。上訴庭喺不同嘅案例，都已經指出，呢個係法庭喺判處嘅時候應該考慮嘅因素之一。
本席獲悉，你正在接受精神科治療，所以喺判處之前，聽取咗精神科醫生報告，同埋心理學專家嘅報告。精神科醫生指出，你喺2001年9月因為不勝精神壓力，進入醫院接受精神科治療。當時嘅診斷為嚴重抑鬱，經過醫療之後情況好轉，留院三個月之後出院。但係不足一個月，你再次入院，當時你投訴失眠，情緒低落，缺乏興趣同埋積極性，經過兩周嘅治療之後出院。之後數年你嘅精神狀況係穩定嘅，不過去到2007年你投訴覺得自己被跟蹤，相信有人要殺死你，亦都聽到不存在嘅人叫你去死。當時醫生嘅診斷係你患上思覺失調同埋人格失調，經過服用藥物之後，你嘅精神病病徵已經冇咗，而你亦都一直定時到醫院覆診，亦都遵照處方服食藥物。最後一次覆診喺今年6月25日。醫生指出，你嘅精神健康狀況喺近數年已告緩解，再冇精神病患同埋情緒問題嘅徵狀。醫生未能夠確定，喺案發時候你嘅精神狀況係點樣嘅。
心理學專家指出，你嘅智力係正常嘅，佢認為你係一個缺乏人生目標，同埋容易衝動嘅人。佢亦都認為你可能由於生活上嘅不如意同埋困苦，曾經縱情毒物。資料顯示你吸毒多年，不過後嚟當你成功戒除毒癖之後，對社會不滿嘅情緒已經減輕。專家亦都指出，冇證據顯示喺干犯本案之前你係有一個暴力傾向嘅人。專家亦都未能夠確定，你干犯本案是否同任何心理問題有關；亦都未能夠確定，你係是否有明顯嘅暴力傾向，佢認為你再犯暴力罪行嘅風險，係中度嘅。
你嘅辯護大律師向法庭細說你嘅坎坷人生，佢話畀法庭知你喺十一、二歲嘅時候已經父母雙亡，由舅父養育成人，可惜未受教育，加上結交咗損友，終於沉淪毒海三十年。期間你冇做過甚麼正式嘅工作，而且因為要應付吸毒嘅開支，多次犯案，毀咗人生。你現年62歲，喺牢獄中度過咗不少歲月。結婚之後你育有三名子女，現年分別係15至18歲。初時妻子仍然要喺內地居住，未能夠來港，你要父兼母職，喺種種壓力之下，精神健康出咗問題，不過經過治療之後情況已經大為改善。你而家已經戒除咗毒癮，妻子亦都表示會支持你。
本案嘅情節係嚴重嘅，而且你可以稱得上係案底纍纍。你之前共有三十九次被定罪，干犯嘅罪行林林總總，包括搶劫、襲擊他人、入屋犯法、管有危險藥物等等。你嘅刑事罪行紀錄追溯到1968年。最後一次被定罪喺03年4月，因為兩項搶劫罪被判監禁總共7年。刑滿出獄之後，不過只係三年你又再犯事，而且干犯嘅係嚴重罪行。雖然呢一次係你第一次因為有意圖而傷人罪而被判罪名成立，不過你之前已經多番干犯同使用武力有關嘅罪行，之前嘅判處刑罰其效不彰，本席認為因為呢個緣故，量刑起點應該提高6個月。
總括嚟講，本席認為一個五年半嘅最終量刑基準係合適嘅，先至足以反映本案嘅性質同埋嚴重程度，與及背景情況。本席顧及咗精神科醫生同埋心理學專家為你撰寫嘅報告，雖然你嘅精神健康仍然需要跟進，不過從兩位專家嘅報告，你嘅精神健康狀況與你干犯本案並不見有明顯關係。而且雖然仍然需要跟進，但係醫生認為住院治療並無需要。直至醫生同埋心理學專家會見你嘅時候，你依然沒有半點悔意，依然堅持自己冇干犯本案。喺今日你嘅大律師向法庭表示你現在已感到懊悔，願為自己曾經做過嘅事承受責任，本席對你喺呢一方面嘅誠意大有保留。
被告人請起立。考慮咗整體情況，顧及你嘅大律師嘅求情陳詞，亦都顧及你年紀相當，本席不認為案中存在任何足可減刑嘅因素，因此判處你就本案監禁五年半。