香港特別行政區 訴 Y.K.L.

HCCC 332/2017

[2018] HKCFI 1164

香港特別行政區

高等法院

原訟法庭

刑事案件2017年第332號

----------------

----------------

-------------------------------------

判刑

以下內容乃法庭數碼錄音謄本

-------------------------------------

官：　

被告人你原本係被控一項亂倫罪，違反香港法例嘅200章《刑事罪行條例》第47（1）條；同埋一條叫做交替控罪，就係猥褻侵犯另一人（俗稱非禮罪），嗰個亦都係違反同一個嘅條例，即係話呢一個《刑事罪行條例》第200章，不過就122（1）條。明喇嘛？

當時問你答辯嘅時候，你就唔認亂倫罪，不過就認非禮罪嘅，而控方就唔接納你認非禮罪，繼續審訊，就抽選咗陪審員嚟審訊呢件案件嘅。案件審結嘅時候，陪審員就裁定你亂倫罪罪名唔成立，就交替控罪非禮罪就罪名成立，明喇嘛？

講番個案情，呢件案件嘅案情，當然喺個法庭度審嘅時候聽到案情，當時顯示X就係你嘅親生女，喺2017年1月28號，嗰日係年初一嚟嘅，被告人你帶咗X就返去你屋企，喺你屋企嘅時候，你就除晒個女嘅衫，亦都除晒自己啲衫，衫褲，除晒，即係大家都赤裸，然後就做叫做模擬性交，即係詐諦，即係詐諦同個女性交，就冇真正係將嗰個陽具擠落去X嘅陰道，即係所謂被告人自己講嘅假假地做，X跟住嗰日就食飯，晚飯嘅時候就冇返到屋企，於是就報咗警，差人嚟喇喎，差人去到屋企嘅時候，X其實已經返咗屋企，於是差人就向佢查問，查問完畢之後，跟住就送咗佢去醫院度檢驗。喺29號，被告人你就被捕，當時差人拉你就係話亂倫罪嘅。

喺警誡之下，被告人你就係認有𡃶過個女嘅胸部，你當時用「波」嚟形容，𡃶個女嘅胸部，就不過個女肯嘅，咁講。後屘就有一個錄影會面，嗰個錄影會面，被告人你就聲稱，就話係個女採取主動，嚟同被告人你有親密嘅行為，因為被告人你係男人，就唔能夠控制自己，所以就凈係同個X係假假地做，就冇真正將個陽具係擺入去X嘅私處嘅，警誡之下你咁講嘅。

而同時，即係當時警方去查件案嘅時候，就攞到被告人你同X之間就喺2017年1月20號去到28號一啲WhatsApp嘅來往嗰啲訊息，呢啲訊息就好露骨嘅，就係被告人你多次同X講話你想同佢做愛，亦都話就會小心做愛嘅，唔會令到佢懷孕嘅，即係有呢啲咁樣嘅對話，好，即係基本上個案情就係咁樣嘅。

被告人你嘅背景，你就喺1971年4月出世，即係而家47歲，就最初第一次結婚就係同一個--即係我哋唔講佢個名，即係X個媽媽，就我哋叫佢做Z嘅，就結咗婚，1997年就生咗X，然後跟住你同X嘅媽媽就喺2001年離咗婚，就大家失去咗聯絡，即係你同X都失去聯絡，跟住你就再結過婚，即係同第二個太太結咗婚，就有個仔嘅，呢個婚姻亦都係失敗嘅，被告最後又再結多次婚，今次就同一個越南籍嘅女士結婚，呢個第三次嘅婚姻都係失敗。即係話喺案發嘅時候，被告你係單身嘅。

被告亦都唔係話冇案底，你喺1997年就試過因為一宗詐騙罪，係罰咗呢個罰款5,000元。更加嚴重嘅就喺2013年，當時你就係被裁定有五項非禮X嘅罪行罪名成立，即係你認罪嘅，當時X係14歲，而當其時亦都有另一項嘅罪名你係承認，然後罪名成立，就係管有呢個兒童色情物品嘅，就畀法官就呢個非禮罪，嗰五項非禮罪，就判咗4年監，就嗰個管有兒童色情物品，就判咗兩年監，夾埋晒坐6年監，喺2016年8月你就放監出嚟。跟住你放咗監出嚟之後，你就係透過呢一個面書（即係Facebook），就搵到X，同佢有聯絡，由2017年1月20號開始，就用WhatsApp同佢聯絡，而嗰啲內容我頭先都講咗，好露骨，令人震驚嘅，被告人你就喺嗰啲訊息入面好多次都講話你好愛佢，又話想同佢做愛，而今次呢件嘅事件就喺1月28號發生嘅，即係話嗰頭同個女聯絡上之後，好快已經發生呢件嘅事件，明喇？

喺未判被告你之前，我就索取咗兩個報告嘅，一個就係被告你本身一個心理學家做嘅報告，另一個就係一個心理學家去睇睇X喺呢件事件有受到咩嘢影響嘅報告。

首先講你嗰個，就你有關嘅心理報告先。根據呢個臨床心理學家，係一位姓鍾嘅鍾小姐，佢話你就你嘅性格而言，就你唔成熟，又孤獨，又輕信他人，自我中心又強，又固執，又短見，好渴望同他人有親密嘅關係，為咗滿足你自己嘅性慾，去猥褻侵犯你個女，被告人你成個腦諗嚟諗去都係同啲性有關嘅行為，就有曾經操控呢一個X。被告人你有一啲扭曲嘅信念，就係將自己做咗不當嘅行為呢個責任，就推喺受害人嘅身上，因為你話係透過X--即係X用呢個WhatsApp向你暗示有關性嘅，是嚟挑逗你，你先做嘅，即係就話賴個女。被告你洞悉力亦都係有限，對受害人係冇同理心。鍾小姐嗰個意見就話，被告人你就對於呢個X，因為X個智力有問題嘅，亦都係冇自我保護能力嘅，所以你對X係構成危險。考慮咗你嘅年齡，你犯案嘅前科，你嘅心理狀況，受害人性格嘅特徵，呢件案件罪行嘅性質，被告人同呢個X嘅接觸呢個能力，即係你能夠去接觸X呢個能力，被告人成日凈係諗住性，被告人再次侵犯女兒嘅機會係高。鍾小姐亦都建議被告你係接受一啲針對你呢啲扭曲信念，幫助你控制你嗰啲衝動嘅情況，防止你再干犯罪行係對你會有用嘅，呢個就係基本上心理學家嗰個嘅建議--係心理學家報告同埋建議。

跟住對X話有咩嘢影響呢個報告，呢個就係另一個臨床心理學家，就曹小姐寫個報告畀我嘅，曹小姐就話，根據佢從X、從X個媽媽、同埋從一啲測試結果去得到嗰個睇法，就話X畀佢嘅父親（即係你）性侵犯之後，對佢冇造成明顯嘅情緒波動，而X佢主要關注，就佢幾時可以同被告你再見面，因為佢好想同被告你同住，亦都好想係被告你做佢監護人嘅，而因為X對於性嘅認知係有限，而佢同你嘅喺你哋大家父女嘅關係，同埋有關性嘅範疇個界限，係有啲扭曲嘅情況出現，而且X又能夠用思考能力嚟達成結論呢個能力係薄弱，唔懂得點樣去自我保護嘅，X個媽媽就係曾經即係向佢提出，就想要求法庭去考慮出一個命令，係禁止被告人你去同呢一個X有接觸嘅。曹小姐就認為有呢一個機會係會--即係被告人你再次會性侵犯呢一個X，所以佢都建議係對X嚟講係有呢個監管，有對於性嗰方面嘅教育，對佢會有幫助嘅。呢個就係就X嘅報告。

好，求情，蘇大律師喺求情嘅時候，就向本席提出，就被告人你一早係認咗非禮罪，即係呢個係個事實嚟嘅，亦都要求本席係畀你三分之一嘅刑期扣減。另外，蘇大律師亦都強調，被告人你係明知道自己做嘅嘢係錯，知道自己做嘅嘢係唔啱，所以你一早都承認係有做到呢啲嘢，即係話警察拉你嘅時候，同埋喺警誡之下，你都承認係有對X做過呢一啲嘅行為，啲行為係唔啱嘅。而蘇大律師亦都喺陳詞嘅時候講話，被告人你嘅智商係屬於即係臨界，即係唔係話智商好高嗰啲人，智商係臨界嘅，而被告人你亦都係相信X係同意同你做呢啲咁嘅行為，即係求情嗰時咁講，仲有喺呢件案件係冇用到暴力。而蘇大律師亦都係陳詞話，被告喺審訊嘅時候係接受咗控方大部分嘅案情，即係對控方個案情係冇提出爭議，亦都話冇去特別用好長嘅時間去盤問X，就要求本席係盡量對你輕判。

好，講判刑，一個人如果係循公訴程序被裁定罪名成立，即係就呢一個非禮罪，猥褻侵犯他人罪罪名成立，係可以被判10年監禁嘅，即係當然呢個係最高刑期，明喇？

呢一件案件，本席認為係一個特別差嘅非禮案件，特別差，即係特別惡劣嘅猥褻侵犯案件，因為被告人你自己都認咗，其實你當時同個女做嘅嘢係模擬性交，即係詐諦性交，但係做出嗰啲行為，其實就即係好似性交，即係爭在就係個陽具未劑落去個女嘅陰道嘅啫。呢件案件其實係有非常之嚴重嘅加刑因素，或者可以講話令到件案件更加嚴重嘅因素，就係話被告人其實你喺個女14歲嘅時候，已經係去猥褻侵犯個女，非禮過個女，已經係判咗夾埋晒係有6年嘅監禁，即係當然呢個係非禮加埋管有呢個色情兒童物品嘅控罪。

本席想知，即係因為我想知多啲，究竟當時係發生過咩嘢事，所以我就攞番當時潘法官審訊呢件案件，判你嘅時候，佢畀嗰個理由，嗰份嚟睇，我當然係睇佢嗰個案情係咩嘢事啫，因為我想知上次發生咩嘢事，喺嗰個判詞嘅2、3、4段係咁講嘅：「案情指，被告係女童嘅親生父親，喺女童4歲嘅時候就同妻子離異，之後就同佢失去聯絡，女童係屬於輕度弱智人士，不過獲安排入讀係主流學校，喺女童14歲嘅時候就與被告相認，並且不時與被告見面，就被告送咗一部手提電話畀佢，女童嘅母親後來翻閱電話中嘅短訊，發現內容曖昧、可疑，女兒同被告以老公、老婆相稱，母親追問之下揭發本案，即係被告曾經喺沙灘、喺佢自己嘅住所、喺公眾地方、喺行人天橋、同埋喺離島係非禮個女童，頭嗰三次行為係包括接吻、撫摸嘅行為，而最後兩次就係涉及被告帶女兒去離島嘅渡假屋度宿，以玩遊戲為名，誘使女兒脫去衣服，互相撫摸對方嘅身體，被告亦都曾經係播放色情電影，教導女兒如何做愛，之後就係臥喺女兒嘅上面模擬性交行為。喺呢一兩次渡假屋度，被告人嘅親密行為期間，並冇使用安全措施，反而係之前有畀女兒服食避孕藥。警方其後拘捕被告嘅時候，就喺佢度撿獲咗一張儲存咗三套兒童色情物品嘅影片，當中涉及幾個不同國籍、非常年幼，大概係五歲至到八歲嘅女童，當中有成人同女童性交嘅片段。」即係呢個就係上次你認罪之後嗰個時候個案情。

根據上次，你總共就係被判咗6年監禁，而係喺2016年，8月你就獲釋，即係放咗監出嚟，2016年8月，不過你就冇話因為坐咗監之後改過，反而就係話，即係因為你自己認嘅，就話你喺面書（即係Facebook）度就搵到個女，跟住就係喺X嘅母親不知情之下，用WhatsApp嚟同X嚟聯絡，而從你哋之間嗰啲嘅對話可以睇到，就係被告你主動向X建議做出呢啲嘅親密行為，不斷向X灌輸呢個嘅念頭就係話，即使你同佢係父女嘅關係，你哋可以做情侶之間嘅行為，好明顯係被告你誘使X接納你作為佢嘅性伴侶。

X係一個弱智嘅人士，而且係喺法律上一個精神上無行為能力嘅人士，雖則被告人你喺錄影會面就話，件事就其實係--即係你喺入面否認以下嘅情況，不過我都裁定事實上就係咁，就係你係利用X係一個弱智人士，你利用佢渴望你成為佢嘅監護人，用同你同住嚟性侵犯佢，以求係嘗你一己之慾嘅，即係我個意思就係話，你喺錄影會面嘅時候就話唔係，你唔係利用個女係弱智去利用佢嚟作出呢一啲嘅行為，但係我唔相信嗰個，我反而係話事實上你真係利用個女係弱智人士，佢唔識得點樣去保護自己，你嚟性侵犯佢，嚟等你可以發洩你自己一己之慾，被告人你呢個咁嘅行為係嚴重違反誠信，你出獄之後冇幾耐就已經搵番X，重施故技嚟性侵犯佢，你嘅行為係令到呢件案件更為嚴重。本席認為，任何人睇到你同X之間嗰啲WhatsApp嘅對話，都可以睇到係你去游說X同你進行性交，同你做愛嘅，而當X係顯示到唔係咁願意嘅時候，你就同佢講話，「我哋會假假地做」，我一啲都睇唔到係X去引誘被告你嘅情況，被告只不過係想去減低你自己喺呢件事件嘅角色，就賴個女，話係個女去引誘你。被告人身為呢個X嘅爸爸，不單止唔係去保護個女，反而係違犯誠信，去利用個女作為佢洩慾嘅工具，被告人呢一個咁樣嘅行為，不單止係違反倫常，而且係令人震驚，亦都係為呢個社會不容嘅。

本席考慮咗呢件案件所有嘅案情，呢個案件嘅性質，同埋頭先已經提咗嗰個加刑嘅因素，即係話令到呢件案件更加嚴重嘅因素，本席就認為喺審訊之後，恰當嘅判刑係8年，而如果被告人當時係有用到暴力喺X身上，或者係同佢做出一啲變態嘅行為，本席係會考慮更高嘅刑期，不過因為都冇，冇呢個打--用暴力，亦都冇呢一個變態嘅行為，被告人的確係喺一早就係即係聽取答辯嘅時候，已經係承認咗非禮罪，猥褻侵犯他人罪，而係控方唔接納嘅，喺審訊之後，被告人係被裁定猥褻侵犯罪罪名成立，喺咁嘅情況之下，我係畀番被告一般嘅三分之一刑期扣減。所以就呢一個猥褻侵犯罪，被告人係要坐監五年四個月。