黃詩霖（第二被告人）
DCCC 1019B/2009
DCCC1019/2009
香港特別行政區
區域法院
刑事案件2009年第1019號
----------------
判刑理由書
1. 聽過代表大律師嘅求情陳詞，睇過感化官嘅報告，我亦都考慮到被告人喺呢控罪之前冇任何刑事定罪紀錄，亦都考慮埋佢嘅年齡喇，控罪本身係一個管有危險藥物嘅，平衡所有因素之後，我認為一個最合適嘅處理方法就係命令妳接受18個月嘅感化。
（法庭詢問被告人是否願意接受感化令，被告人表示願意）
2. 亦都係妳嘅代表大律師已經向妳解釋咗喇，若然妳係違反嗰啲感化條件嘅話，感化官就會通知我喇，然後我就會命令將妳帶返嚟，到時我會重新將妳處理，我就唔會有任何太多嘅憐憫㗎喇到時，因為機會已經畀咗妳。同埋若然過咗十八個月之後妳覺得搞掂，甩身，然後又去群番嗰啲人，做番同樣嘅事情，再被帶返嚟，未必係一定區域法院嘅，可能係裁判法院，到時妳必定會首先被還押兩個星期喇。如果妳係管有，而唔係販運嘅話，咁跟住然後就會睇下妳有冇毒癮喇，如果好彩嘅，妳冇毒癮嘅，咁可能再進一步感化，或者係到時嘅年齡容許嘅，唔知會唔會教導喇，我唔知道喇，等等，但係最不幸嘅事情就會係若然妳唔理會呢個毒品嘅危險性，妳繼續掂，就算拉唔到妳，妳變成一個有毒癮嘅人士，妳嘅一生基本上可以話未必係完結喇。但係嗰條路唔會容易得去邊㗎喇，最緊要就係唔好再掂毒品，得唔得呀？再強調一次，妳屋企人支持妳，妳要利用佢哋，好好利用佢哋嘅支持，有咩嘢唔開心嘅，嘗試下同佢哋講，唔係逃避去啲朋友嗰度，更加唔係去掂毒品，可唔可以咁做？妳試一試，好唔好？唔該妳。十八個月嘅感化命令，附加條件。