HCCC 32/2017
香港特別行政區
高等法院
原訟法庭
刑事案件2017年第32號
----------------
----------------------
判刑 以下內容乃法庭數碼錄音謄本
官：
被告人在一名裁判官席前承認一項販運危險藥物罪，被交付高等法院原訟法庭判處。本席喺判處嘅時候，考慮咗案件嘅整體情況，包括案件嘅性質同埋情節，尤其是相關危險藥物嘅種類同埋份量、被告人嘅個人背景同埋辯方大律師嘅求情陳詞。
本案嘅案情係簡單嘅，當被告人從一部的士落車嘅時候被截停，喺佢手上攞住嘅一個紙袋裡面有十個紅封包，一共載有內含191克可卡因嘅239克固體。喺警誡之下，被告人招認佢因為欠咗債，所以幫人送可卡因，賺啲錢，報酬會係4,000鈫，但係仲未收到。
被告人現年53歲，曾經任職廚房工作同埋酒保，佢只係有一項刑事定罪紀錄，早喺三十年之前，因為一項賭博罪被判罰款，佢已婚，喺被捕嘅時候同妻子居住。
辯方葉大律師告知法庭，被告人一向都有穩定嘅職業，直至案發之前數月，僱主因為經濟出現問題，先至令到被告人未能夠有穩定嘅長工。被告人嘅妻子患有抑鬱症同埋各樣嘅身體疾病，未能夠工作，十分倚賴被告人。喺案發嗰段日子，被告人嘅繼子女亦都有向佢借錢，喺咁嘅情況之下，被告人欠下咗債項，喺經濟壓力之下，受唔住而接受咗一個熟客嘅介紹，干犯咗本案。葉大律師強調，被告人已經有真誠嘅悔意，被捕嘅時候坦誠招認，喺法庭亦都第一時間承認控罪，之後亦都簽署咗捐贈器官嘅文件。辯方呈遞咗被告人、被告人嘅妻子同埋兒子同埋同事撰寫嘅信件，喺信件裡面，被告人表示悔意，其他各個人都指出被告人嘅品性係良好，對家庭同埋工作都負責，照顧妻子不遺餘力，希望法庭可以輕判。
因為案件嘅性質同埋情節十分嚴重，所以監禁係唯一合適嘅判處，判處一個具有阻嚇性嘅刑罰喺呢一類型嘅案件係必須嘅。被告人販運嘅危險藥物係可卡因，根據AG v Chang Chen Liu Sa（[1995] 1 HKCLR 69）呢一宗案例，法庭喺判處嘅時候應該考慮英皇訴劉德明（[1990] 2 HKLR 370）一案裡面所提出嘅量刑指引。考慮咗本案嘅整體情況，本席睇唔到有咩嘢理由要偏離上述嘅量刑指引。根據劉德明案，販運呢類毒品嘅純含量如果係50至200克嘅話，應該考慮8至12年嘅監禁刑期。被告人販運嘅可卡因純含量係191克，顧及被告人今次係第一次干犯販運危險藥物罪，本席認為採用十一年半作為量刑基準係合適嘅。被告人承認控罪，因此應該得到三分一嘅刑期扣減，顧及整體情況，包括辯方大律師嘅求情陳詞，本席認為呢個就係被告人應得嘅刑期扣減幅度。
被告人，請起立。基於上述理由，本席判你就本案嘅控罪監禁七年八個月。