第二被告係受害人X嘅母親，而受害人當時係15歲。案情指，有一日晚上，X正喺度瞓覺嘅時候，第一被告進入佢嘅房想揭開佢張被，係咁擝佢張被，想伸手摸佢，亦都同X講話佢係契爺，想做乜嘢都得。拉扯咗一陣間，唔成功之後，第一被告先返番入去隔籬房。跟住，第二被告就要求X過去佢哋間房，X唔肯，第二被告就用唔畀零用錢畀X嚟逼佢入房。之後，X瞓喺兩名被告中間，畀第一被告強姦咗。最後，X用力踢開第一被告，離開房間。期間，第二被告一直瞓喺一邊，冇理會佢哋。
幾日之後，第二被告再用同一藉口叫X入佢間房，喺呢一次，第二被告並無入房，凈係將房門關上。咁喺房入面，X再度畀第一被告強姦。X係喺事發七年之後先至報警，呢件事件先至揭露出嚟，現在兩名被告均係49歲。
第一被告有六次嘅案底，其中五次涉及管有危險藥物，最後一次喺2009年12月被判戒毒所令；第二被告並冇刑事紀錄。
本席喺量刑嘅時候，就兩名被告嘅受責性而言，分別考慮咗對佢哋有利，以及對佢哋令案情嚴重嘅因素。就第一被告而言，佢係兩度侵犯X，X當時只有15歲，而第一被告同X年齡上有重大嘅距離，佢對事件既冇承擔、亦冇悔意，而X需要喺事發之後七年挺身而出舉報佢，亦都需要喺庭上重溫慘痛經歷。第一被告係喺嘗試侵犯不遂之後，要求第二被告利用佢作為X母親嘅影響力，逼使X懾於佢嘅淫威之下，乖乖就範。而喺兩次侵犯X嘅過程中，第一被告並冇使用安全措施。喺第一次嘅事件中，當佢起初唔能夠成功插入嘅時候，喺嗰個階段，佢並冇臨崖勒馬，仲要借助其他嘅輔助，至佢成功達至目的為止。然而，本席並冇忽視，除上述而言，本案並不存在策劃性、使用武器或不必要暴力，或其他具侮辱性性變態作為等，逼使X就範嘅惡劣情節。
就作為X母親嘅第二被告而言，佢屬於絕對可以支配、牽制同埋影響X嘅一方，佢濫用咗自己嘅影響力，逼使X屈服喺被告嘅淫威之下，讓被告奪去貞操，第二被告嘅積極參與係促成此惡行不能或缺嘅重要一環。而根據X嘅證供，第二同埋第一被告成日都出去玩，玩到天光先返屋企，凈係畀啲錢佢買飯盒同細佬食，佢當時收到嘅訊息係，如果唔入房，媽媽會唔畀錢佢，佢會冇錢食飯。雖然第二被告對感化官話自己係愚蠢、迷失，先至會干犯今次嘅事件。而大律師亦都指，第二被告對佢個女嘅蒙羞將會係一生不能磨滅，但係事件正正反映，第二被告不但冇盡為人母親嘅責任，反而一手將女兒送羊入虎口，斷送女兒嘅貞操。
而根據X作供嘅時候，佢都話第一次畀性侵犯嘅時候，阿媽都喺床上，佢冇向阿媽求救係因為佢最信任嘅媽媽都冇保護佢，佢覺得背叛，佢接受唔到，所以冇叫。第二被告嘅行為卑劣，枉為人母，嚴重違反誠信，係違反誠信案件同類中情節最差嘅一種。但係第二被告選擇坦白承認控罪，並出庭作供頂證第一被告。姑勿論佢係咪好似背景報告所講真心有悔意又好、係為咗獲得刑期扣減都好，本席係會將佢認罪以及頂證第一被告嘅行動，喺量刑上有所反映。
本席喺量刑時候不容忽視公眾對呢一類案件嘅不恥及憎厭，事發至今已有八年，雖然第一被告有多次管有危險藥物嘅案底，佢並冇干犯任何性侵犯案件，故此並冇證據顯示第一被告有重犯傾向或對社會構成危險。然而，由於事隔多年，X而家已經23歲，呢啲佢嘅童年被性侵犯嘅陰影係仍然存在，根據創傷報告所講，並且喺佢嘅心中形縈繞不去，令到佢自我形象一直都好低，更處於是否會原諒母親及對將來與母親關係存疑嘅兩難局面，事件導致到佢產生抑鬱嘅徵象，令到佢缺乏安全感、對人不信任，亦都影響佢發展正常人際以及男女關係，並且出現強逼性重複嘅行為，身體上亦都出現不少毛病。心理專家認為，X喺事發多年之後，嚴重創傷後遺症仍然存在。X亦都因為母親將會被判入獄，而需要獨力照顧住喺院舍中中度弱智嘅弟弟，心力交瘁，可見兩名被告嘅作為對X嘅負面影響至為深遠。
本案實在係駭人聽聞、情節嚴重，雖然第一被告面對兩項控罪，而第二被告係面對一項控罪。本席認為，兩人嘅受責性不遑多讓。本席認為，12年嘅起刑點係合適。第一被告喺聆訊之後被定罪，不獲任何扣減，每項控罪判刑12年，同期執行。
第二被告認罪以及作供頂證第一被告，本席評定過佢嘅證供質素，認為尚算有用，但並非導致成功檢控舉足輕重嘅證供。事實上，佢對於事實全部仍有保留。本席認為，佢可獲得嘅扣減應該喺百分之四十至到四十五之間，本席給予大約百分之四十一嘅扣減，判刑7年。
最後，X喺事隔多年之後，確實自己已經生活獨立，並且將弟弟安頓喺院舍之後，先至挺身而出，舉報兩名被告，而其中一人係佢嘅生母，大義滅親，勇氣可嘉，本席寄予佢喺法庭程序結束之後，重新建立人生新一頁。