香港特別行政區 訴 沈達榮Arthur

DCCC1164/2009

香港特別行政區

區域法院

刑事案件2009年第1164號

----------------

----------------

----------------

判刑理由書

----------------

1.  法庭睇唔到有任何嘅求情理由，只係可以就呢個案情嚴重性判案，因為你雖然係年輕，但係又已經係29歲，年紀方面唔可以作任何求情理由。冇錯，你律師講得啱，咁你雖然係畀呢個事主年長十歲，唔係用年紀嘅差別嚟達成呢個非禮嘅目的，只不過你係年長、有經驗，所以喺網上物色到對象（受害人）。當然，咁其實你仲要將自己年紀報細，如果將年紀如實報上，可能今次事件唔會發生添，所以法庭正確嘅處理方法就係年紀嘅差別就唔係令到呢件案件更加嚴重嘅因素。呢件案件嚴重就係犯案嘅舖排，係心理上威脅事主，仲嚴重過任何肢體上嘅壓力或者武力嘅侵犯，事主根本係無從反抗，唔懂得點樣處理比你欺壓嘅環境。

2.  法庭亦都要考慮到呢啲侵犯事主嘅猥褻程度，猥褻程度冇分級制，如果有分級制，你都屬於唔係最高級，都屬於高級之列。法庭亦都要考慮到事主對呢樣侵犯嘅厭惡性，法庭亦都睇唔到你有任何悔意，你仲將呢個事主描繪為非禮你嘅元兇，假如警察係相信你，如果你有講話你唔同意，警察相信你所講嘅嘢，即係掉返轉頭，你喺證人台做原告，原告係做被告。

3.  法庭就主要考慮呢個猥褻嘅程度，同埋當時事主嘅感受，同埋你所用嘅方法。咁法庭認為3年監禁就最合適，所以而家法庭判你3年監禁。