HCCC 189/2008
HCCC189/2008 & HCCC38/2009
香港特別行政區
高等法院
原訟法庭
刑事案件2008年第189號及2009年第38號
-----------------------
訴
馮利明
判刑
以下內容乃法庭數碼錄音謄本
官：被告經過審訊之後，被判控罪（二）妨礙司法公正罪成立；控罪（一）強姦罪及其交替控罪猥褻侵犯都不成立。
案情方面，被告同事主事發時都係十八九歲嘅人，屬男女朋友關係，有肌膚之親不止，仲要去到時鐘酒店，不過就離離合合。期間，事主又講過普通朋友都可以去街、打電話，甚至有性行為。無論如何，據稱嘅強姦事件，就係發生喺其中一個離嘅時段。被告被加控妨礙司法公正，就係因為事主報警，被告以MSN、短訊同電話直接、間接叫佢銷案。
背景方面，被告今年20歲，香港出生，曾受中學程度嘅教育。之後做過餐廳嘅水吧同物流公司倉務員，冇刑事定罪紀錄，與父母同弟妹同住。
刑期方面，我注意到陪審團以「7：0」嘅一致性裁決，裁定被告強姦罪不成立，繼而再考慮佢猥褻侵犯是否成立，明顯係唔能夠肯定事發時有性交，即係傾向辯方第一線嘅辯護，話自己當時不能勃起。至於陪審團喺考慮猥褻侵犯嗰時，以「6：1」嘅大比數裁定佢罪名不成立，呢個應該就係話被告誤會咗事主嘅意願，因為如果陪審團認為事主係同意被告撫摸、脫衣等等，先容許被告猥褻侵犯脫罪嘅，佢哋就唔應該裁定被告妨礙司法公正罪名成立，因為事主喺同意親熱嘅情況下報警只能夠係誣告，亦即係被告就控罪（二）嘅辯護。
總括而言，陪審團嘅判決顯示，佢哋對事主嘅證供有好大保留，相反，被告就係喺誤會咗對方嘅意願之下先去侵犯事主，只不過後來清醒過嚟，知道自己闖咗禍，先去要求事主銷案。事實上，從呢啲種種搵到嘅通訊紀錄顯示，被告請求事主銷案，表現得頗為卑躬屈膝，不斷道歉認錯，請對方畀機會。反之，則完全冇語帶恐嚇等等呢啲咁嘅行為。
綜觀本案嘅整體情況，包括兩人嘅關係，事發時嘅種種，我認為被告妨礙司法公正嘅行為情節係特殊同輕微，所以雖然理應處以即時監禁，但係刑期唔應該長。
我宣判，被告要為控罪（二），入獄6個月。