葉新源
HCCC 256/2011
HCCC256/2011
香港特別行政區
高等法院
原訟法庭
刑事案件2011年第256號
----------------
----------------------
判刑 以下內容乃法庭數碼錄音謄本
官：
第一被告喺聆訊之後被裁定一項非法販運危險藥物罪罪名成立。佢正在將毒品從馬來西亞經香港運番去中國大陸，毒品經過化驗之後證實為內含1.67公斤海洛英鹽酸鹽嘅2.93公斤嘅混合劑。
被告現年39歲，喺干犯本案之前並無刑事紀錄，離咗婚，有一個女。大律師喺求情嘅時候表示根據被告自己喺案件中作供，佢係有正當嘅職業，但係大量毒品有關嘅刑期已經係有例可援，今次係佢第一次犯事，毒品並非以香港為目的地，要求本席盡量輕判。
本席喺量刑嘅時候考慮咗本案嘅案情、毒品嘅種類、重量、量刑指引。根據有關嘅量刑指引，販運海洛英重量係1,200克到4,000克，起刑點係23至到26年，如果有國際性因素則往上調。本案牽涉嘅毒品淨重係以1.67公斤計，被告係親自由東莞出發，經香港去馬來西亞取得毒品，再將毒品由馬來西亞經香港準備運番去中國大陸途中被截查，搜出毒品，所以本案係有住令情節嚴重嘅國際性因素。
考慮所有因素之後，認為24年嘅起刑點係合適嘅，佢喺審訊之後被定罪，不獲任何扣減，第一被告被判監24年。
有關向上訴法庭提出的相關上訴，請參閲CACC97/2012。