香港特別行政區 訴 楊玉蘭

HCCC313/2011

香港特別行政區

高等法院

原訟法庭

刑事案件2011年第313號

----------------

----------------------

判刑
以下內容乃法庭數碼錄音謄本

----------------------

官：　

被告喺聆訊之後被裁定一項非法販運危險藥物罪，罪名成立。

佢正在將毒品從馬來西亞經香港運送番廣州，喺香港國際機場被截查之後發現藏有毒品喺背囊嘅暗格。毒品經過化驗之後證實為內含0.54公斤海洛英鹽酸鹽嘅1公斤混合劑。

被告現年41歲，喺干犯本案之前並冇刑事紀錄。大律師喺求情嘅時候表示，被告已婚，有個女兒15歲，今次係第一次鋌而走險犯事，希望本席能夠盡量輕判。本席喺量刑嘅時候考慮咗本案嘅案情、毒品嘅種類、重量、有關嘅量刑指引同埋大律師嘅求情。根據有關嘅量刑指引，販運海洛英重量係400至到600克起刑點係15至到20年，如果存在國際性嘅因素，可以將有關嘅量刑起點往上調。本案嘅毒品淨重係540克，被告係親自由廣州經香港往馬來西亞取獲毒品，再將毒品由馬來西亞經香港作為一個中轉站準備運送番廣州。

本案有著令案情嚴重嘅國際性因素，本席以十八年半嘅起刑點，本席認為十八年半嘅量刑基準係適合，另外因為國際性因素，將佢往上調至20年。喺聆訊之後被定罪，不獲任何扣減，判刑20年。