被告L.C.面對十四項控罪，係關乎性侵兩名年幼嘅女子，就係X同Y。被告就係喺裁判官嘅席前就承認咗其中嘅六條控罪，呢個就係高等法院刑事案件2022年嘅74號。佢喺本席嘅面前亦都係確認咗佢仍然係承認嗰六項控罪，就由本席係會判刑。另外嗰八項控罪被告就唔認罪，咁就喺呢個高等法院嘅2022年73號嗰件案件係受審。審訊之後，陪審員係裁定被告人全部八項罪名係成立。
本席首先就會處理被告認罪嗰啲嘅罪行同埋案情先，即係高等法院刑事案件2022年嘅74號。
喺嗰宗嘅案件，第一至到第四項控罪係向年齡在16歲以下嘅兒童作出猥褻行為嘅罪行，就係違反香港法例第200章《刑事罪行條例》嘅146（1）條。第五項罪行就係猥褻侵犯罪，就係同樣係《刑事罪行條例》，不過，嗰個條文就係122（1）條。第六項控罪係管有兒童色情物品，就違反咗《防止兒童色情物品條例》，即係香港法例嘅579章第3（3）條。
首先，就係兩件案件都唔爭拗嘅案情先。L.M.就係呢兩個女仔（即係X同Y）嘅媽媽嚟嘅，親生媽媽。X就喺2007年5月30號出世，Y就喺2005年3月18號出世。L.M.就同X同Y嘅生父就喺呢個2014年就離咗婚㗎喇。離咗婚之後，L.M.就同兩個女就喺呢個葵涌一個公屋度居住嘅。而L.M.同呢個被告人（即係L.C.，L.C.就係一個喺內地雲南嚟嘅男士），就喺2015年結咗婚。L.C.如果係嚟親香港嘅時候，就會同埋L.M.同屋企人就住喺葵涌嗰個公屋嘅。喺被告被拉之前，佢就啱啱攞到呢個單程證，就可以嚟到香港定居嘅。
好喇，就講番呢個案件，2022年74號，被告人你承認咗嘅案情係點先。喺2019年11月6號，X就讀間學校就接到通知，話X就𠝹手或者𠝹手腕咁樣喇，於是就將件事件通知咗學校嘅社工係跟進。社工跟進嘅時候，就X同個社工講，就喺2019年嘅4、5月其中一晚，X就去咗瞓覺，同佢阿媽瞓，就同埋呢個被告人同埋一張床嘅。當時阿媽就撳住佢，除咗佢嘅內褲，被告人就用佢嘅舌頭去舔呢一個X嘅私處，同埋亦都用佢自己個陽具係碰或者係撞呢個X嘅私處。X當時唔能夠郁，好驚，唔識出聲。發生咗呢件事後，X就走去沖咗涼同埋就將件事件話咗畀佢家姐聽（即係Y）。跟住，當然學校就係通知警方，咁就報咗案。報咗案之後，就有錄呢個錄影會面嘅，同呢個X同Y都係，咁當時就揭露咗其實呢個後父L.C.同埋佢哋自己親生媽媽L.M.，係對呢兩個細路仔做咗一連串嘅性侵行為。
好喇，第一項控罪，即係原本喺嗰個控罪書上面，即係未分開兩件案件之前第二控罪嚟嘅，但係而家就變咗第一控罪。案情顯示，喺2018年嘅8月同埋呢一個2019年11月6號之間呢段時間，就喺葵涌嗰個公屋嗰度，X就同Y，即係佢哋就瞓咗喺呢個主人房喇，就同L.C.你喎，即係同後父瞓喺嗰個爸爸、媽媽應該瞓嗰間房，而媽媽就瞓咗喺嗰兩個女間房，即係有一晚係咁嘅情況。瞓瞓下覺嘅時候，被告你就除咗自己嘅底褲。突然間，被告你就捉住咗X嘅右手喺去接觸你嘅陽具，仲上下去郁動。做緊呢樣嘢時候，你仲同X講話「叔叔教妳」咁。X就好驚，大聲叫「媽媽，媽咪」咁。X一叫媽咪，被告你即刻縮手喇，跟住阿媽就入咗嚟，就問發生咩嘢事，跟住X就話要同阿媽瞓，就去咗即係本身兩個女嗰間房就同阿媽度瞓。然後，X後來就將呢件事話咗畀Y聽同埋話咗畀媽媽聽嘅。
好喇，就呢件事件，被告拉咗之後，就接受呢個錄影會面。被告點講呢？被告就話X同Y有試過三、四次就無端端就剝咗佢條褲，即係剝咗被告條褲，咁就有時仲係唔知特登吖定係或者係無意咁樣就摸到佢嘅陽具。L.C.你自己就話，就咁嘅情況發生，你都即刻著番條褲㗎喇，你就認為呢個X同Y都可能係同佢玩嘅啫，咁佢哋係笑嘅咁樣，呢個係你嘅答覆。
好喇，第二項控罪，原本嗰個控罪書嘅第三項控罪嚟嘅。今次X就記得喇，Y就冇話佢記得喎，係X記得啫，X記得就喺2018年嘅其中一日去到2019年嘅3月其中一日，當時就喺嗰個葵涌間屋度嘅，即係公屋度嘅，阿媽就話教X同Y，雖然Y唔記得呢件事，但係X記得呢件事，阿媽係教咩嘢呢？教佢哋「嗱，點樣就係會有BB，點樣就係會冇BB嘅」，即係點樣係受孕、點樣唔受孕，叫佢哋「嗱，妳睇住阿媽」，阿媽就點呢？阿媽就同L.C.（即係被告你）就雙雙係完全赤裸嘅情況之下，兩個細路女睇住你兩個進行性交嘅。
第三項控罪，係原本控罪書嘅第四項，今次輪到Y記得，X就冇話記得，Y記得咩嘢事呢？就係又係喺2018年嘅，不過就係7月至到2019年嘅3月呢段時間喺呢個葵涌嘅公屋，L.M.（即係阿媽），又係話教X同Y，當時X、Y在場㗎喎，就話「嗱，教你哋性教育，點樣去進行性行為」，叫X同Y入咗呢個房（即係爸爸、媽媽個主人房），跟住Y就見到被告已經剝晒衫㗎喇，全身赤裸瞓喺張床度，阿媽又除晒佢啲衫，跟住阿媽同埋呢一個被告你就喺張床度就進行性交，而X同Y就坐喺床邊度望，一路觀察咁樣。喺呢個期間，呢個阿媽仲向呢個X同Y係去示範點樣同被告你手淫，點樣同被告你口交。咁做完咗之後，X同Y就離開房間㗎喇，即係你哋做咗，你哋性交之後離開房間。呢個第三項控罪。
第四項控罪係原本嗰個控罪入面嘅第五項。今次輪到Y記得，X就冇話佢記得喇，Y記得乜嘢呢？就記得喺2018年嘅7月至到2019年嘅3月呢段期間其中有一晚，阿媽就話教佢哋兩個點樣用呢個避孕套，四個喺哂主人房入面嘅，X同Y企喺床邊，被告你就瞓咗喺張床度，就下身赤裸，阿媽就攞咗一個避孕套出嚟，開咗個套，然後向佢哋兩個女仔就示範點樣將個避孕套係套上去被告你嘅陽具度。咁做完之後，Y同埋X就離開房間。被告人你喺嗰個警誡之下，係完全否認有上述嗰啲事件發生嘅。
第五項控罪，就係原本個控罪書嘅第六項。呢件事件就喺2019年4月22號喥，當時X就同埋媽媽同埋L.C.你就喺呢個主人房度瞓覺嘅。當時，X就突然間發覺就有人伸隻手喺佢件衫嘅下面去摸佢嘅胸部，亦都有人係將佢件衫係揦高咗，聽到阿媽講，用雲南話講話「你睇」咁。跟住X就想擰轉身去郁佢嘅身體，咁畀阿媽撳住佢雙腳，除咗佢嘅面褲，除咗佢嘅底褲，就用呢個雲南話講就話「快啲喇，快啲喇」咁。跟住，媽媽就叫被告你用舌頭去舔呢個X嘅私處，被告你就照做，而跟住被告你就用你個陽具係去掂X嘅私處，仲上下郁動。X想郁佢嘅身體，話避開被告你，但係郁唔到，亦都太驚，唔敢出聲。後屘，發生完呢件事之後，媽媽就幫X著番佢嘅褲，即係面褲、底褲，跟住X就返番去自己即係兩個女仔瞓嗰間房，就將件事話咗畀Y聽嘅。
就呢件嘅事件，喺嗰個警誡嘅錄影會面嘅時候，被告你講就話喺香港，即係喺2019年嘅2月至4月期間你就逗留喺香港，你係有一次係掂過X嘅胸部，亦都有喺X瞓咗覺嘅時候，係有錫過佢嘅私處，就唔記得咗有冇試過用過嗰個陽具去磨擦X嘅私處喇，就話事件維持咗時間一分鐘喥，X醒咗，就面對被告你，被告你就唔敢出聲，因為知道自己做錯咗。
好喇，第六項控罪，第六項控罪就係原本嘅第十六項控罪嚟嘅。呢項控罪就話喺被告你個手提電話入面就搵到五十一張相，搵嘅時候係2019年11月22號，其中有五十張係涉及兒童色情物品嘅，三十二張就係涉及X，一係就全裸，一係就半裸嘅，仲有兩張就係影到X係半裸同埋影到阿媽嘅，仲有其他嗰啲都睇到，就睇落係似X喺度係啜緊一個女人嘅乳頭或者係摸緊一個女人嘅乳頭，另外有四張係睇到X係啜緊佢媽媽嘅乳頭，雖然佢兩個嘅面都係向下嘅。
關於呢一件嘅罪行，被告你喺警誡之下嘅錄影會面就承認，就話嗰個，即係畀警方撿取咗嗰個手提電話的確係屬於你嘅，你係冇借過人用，你都記得嗰五十一張相，即係五十張涉及色情物品嘅相片。你記得就當時影相嘅時候，就應該係X係即係沖完涼出嚟，所以影到啲裸體相，就話影嗰啲相其實係即係開玩笑嘅啫，後屘都係刪除晒㗎喇。而見到即係話X同另外一個女人，又睇佢個乳房嗰個，即係係阿媽（即係L.M.），佢話當時X已經有成12歲㗎喇，啲照片就係喺呢個即係L.M.屋企，即係話葵涌嗰個屋企度影嘅，但係問到被告你係邊個影呢啲相嘅時候，你就冇回答到嘅。呢個就係你承咗嗰六項控罪嘅案情。
好喇，唔認罪嗰八項控罪嘅案情又點呢？呢個就係2022年73號案件，首先啲控罪先。第一至到第四條都係猥褻侵犯罪，就係違反《刑事罪行條例》嘅200章嘅第122（1）條，同埋加埋係153P第（2）條，因為喺境外發生嘅，喺雲南發生，其實六項都係喺境外發生，第五項就係強姦罪，亦都係違反呢一個香港法例第200章喇，118（1）同埋呢個153P（2），第六項控罪就係向年齡喺16歲以下嘅兒童作出猥褻行為，就係違反200章146（1）同埋153P（2）條，第七項又係強姦罪，呢個就違反香港法例第200章118（1），因為呢個喺香港發生嘅，另外，第八條亦都係向年齡喺16歲以下嘅兒童作出猥褻侵犯罪，呢個亦都喺香港發生嘅，所以係違反146第（1）條。
好喇，案情係點呢？當然要考慮番當時審訊嘅時候Y點講喇。根據Y講法，就話喺2018年嘅7月同8月期間，阿媽就帶咗佢哋兩個上去雲南度，就住喺被告你屋企嘅，當時Y係13歲。喺呢段時間就有六件嘅事件就係被告你係性侵Y嘅，頭嗰三項就係涉及被告你就揸住架電單車，就載咗Y，Y坐喺你後面，Y就話當被告你揸緊架電單車嘅時候，你就用你嘅右手揸住喇，揸住個軚盤，即係揸住嗰個車喇，就左手就伸去你後面，就去摸同埋去撩Y嘅私處。當時Y當然係著住件衫，即係隔住啲衫、隔住條褲去摸佢嘅私處。第四項控罪就喺一間藥材鋪度發生嘅，呢間藥材鋪係被告你一個朋友係老闆嚟嘅。當時，因為阿妹（X）就要去洗手間，阿媽就帶咗阿妹上樓上去嗰個洗手間，留番Y同埋被告你就喺地下個鋪面嗰度。根據Y嘅講法，就被告你就喺佢後面就攬住佢，就用手係攬住，揸住佢嘅乳房，同埋係將你個陽具係喺佢嘅背後就磨擦佢嘅臀部，雖然當時其實個鋪頭入面有其他人喺度打緊麻雀在場嘅，呢個就係第四項控罪。
第五項控罪就係當時喺雲南，Y就喺被告你個屋企入面就喺床度係瞓緊，即係瞓咗喺度，佢當時瞓著咗嘅，佢話，突然間就發覺係有一啲嘅動作係令到佢醒咗。佢擘大眼醒咗嘅時候發覺自己全身赤裸，而被告當時就下半身赤裸，當時就係又摙佢嘅乳房，又去吸啜佢嘅乳房、佢嘅乳頭，而當時被告嗰個陽具直情喺佢個身體入面添。當被告知道佢哎呀，原來醒咗，就即刻將佢陽具褪番出嚟，就離開咗喇。
第六項嘅控罪，當時亦都仲喺雲南嘅，Y就瞓喺張床度，就睇緊自己嘅電話，當時係下晝嚟嘅，即係阿媽（L.M.）同埋X就喺隔離房度瞓咗覺。Y就話，當時自己睇睇下電話，被告就走咗入嚟，就淨係著住條底褲，瞓咗喺佢身邊，隔咗冇幾耐，被告就起身，就除埋條底褲，跟住就將Y嘅電話拎走，就將佢陽具就係塞埋去近Y嘅耳仔，即係喺佢嘅右邊面嗰個位，想質近佢嘅口。Y就咬牙切齒，咁等被告嗰個陽具唔入到佢嘅口，但係個被告仍然將個陽具喺佢個嘴唇嗰度係郁動，跟住最後被告係成功令到Y個口擘開咗，佢就將佢嘅陽具係塞咗落去Y嘅嗰度，仲要係用手撳住，被告用手撳住Y個額頭同埋撳住佢膊頭，然後喺咁嘅情況之下，逼Y同佢口交，最後Y係成功係踢開咗被告你嘅。呢六項就頭先講咗喺雲南發生。
最後嗰兩項控罪，即係第七、第八項控罪就係喺香港，即係Y嘅屋企，喺葵涌屋企發生。首先，第三項先，就有一日下晝，阿媽同X就去咗行街，剩番Y單獨喺屋企同被告，Y就係睇完電視之後有啲攰，就走咗去床度瞓低。被告就入咗佢間房，就將嗰啲窗簾閂埋咗，然後就走去嗰個門個位嗰度就除褲、除底褲，Y就想快啲閂咗個房門，但係就閂唔成，於是佢就走出去，佢就去即係經過被告你嘅時候，就畀被告你係捉住咗，跟住被告你就㧬番佢入房，就喺嗰個下格床嗰度就夾硬係同佢進行咗呢個性行為，所以呢個就係強姦罪。
最後嗰件事件就係當時Y就同被告你同埋X同埋一張床瞓嘅，被告你就瞓喺X同Y中間，Y就覺得被告你，即係感覺到被告你就捉住佢嘅手，就將佢嘅手擺喺被告你嘅陽具嗰度就上下嚟郁動，即係手淫，Y就即刻縮手，就走去就洗乾淨自己嘅手，跟住佢就返番去張床瞓，但係今次就搵個氈就包到自己實晒，等呢個被告唔可以再侵犯佢，呢個就係第八項控罪嗰個情況。呢啲就係全部陪審員喺審訊之後裁定被告人罪名成立八項控罪嘅案情。
好喇，喺判刑之前，我就攞咗一個臨床心理學家嘅報告，睇下被告係咪一個戀童者同埋被告係重犯嘅機會有幾大。呢位臨床心理學家楊小姐，就畀咗一個相當詳盡嘅報告畀我，我唔打算全部講晒出嚟，因為我都考慮到被告你嘅私隱，我淨係講某部分關於佢個結論同埋佢嗰啲建議。
呢位臨床心理學家得到嗰個睇法，喺作出評估之後，就話被告你係較為自我同埋衝動嘅，同埋就嗰個責任感方面就唔係咁夠，因為被告你就而家被控嗰啲控罪，即係起碼八條，大部分係唔認嘅，同埋你就話其實冇乜性慾嘅，自己。另一方面，你又同呢位臨床心理學家講話嗰兩個受害人，其實對性係好有好奇心嘅，又成日對被告你做出一啲係不恰當嘅行為，譬如話剝你條褲、摸你個下體咁嗰啲。心理學家就話，因為你唔承認呢啲控罪，所以變咗佢冇辦法可以去作一個結論，你究竟係有啲乜嘢嘅動機去干犯面對嘅控罪，同埋有啲乜嘢心理嘅狀況係令到你係干犯呢啲控罪。不過，佢就覺得應該你嗰個衝動嗰方面嘅情況都係同呢啲嘅罪行有關，咁懷疑，佢話明係懷疑，即係你就成日掛住性嘅，同埋係對嗰啲直情係未到發育期，同埋已經係發育期間青春期嘅女仔係有呢個性嘅興趣。佢認為你重犯嘅機會就喺中等嗰個範疇嘅較低嗰方面。佢嘅建議係咩呢？就話希望再度去對你做評估，即係喺判咗刑之後，因為判咗刑之後，你知道個判刑之後，可能就會更加開放自己，講清楚啲你究竟個情況點，然後就睇下啲乜嘢心理嗰方面嘅治療係對你有幫助。同埋因為你都試過係喺監獄入面有一個自殘嘅行為，即係上次開唔到庭就因為你係𠝹手吖嘛，有自殘嘅行為，所以都建議係話要睇緊啲你嗰個精神嘅狀況，就等你唔會再有一個自我相殘嘅情況。
好喇，背景同埋求情陳詞。根據證供，即係根據你自己已經畀咗一份嘅書面嘅口供，就係話你就喺1975年內地出世嘅，而家就47歲，就喺香港冇任何嘅刑事紀錄，除咗呢兩件案件涉及嘅罪行之外，冇刑事紀錄嘅，喺內地嘅時候就係做呢一個農夫。
關大律師幫你求情嘅時候，其實畀咗書面嘅求情陳詞畀我。喺嗰書面求情，就係確認咗呢個證供嘅內容係屬實，再加啲其他嘅資料，就係話你喺2019年嘅10月已經攞咗單程證嚟香港，喺內地讀書讀到係中學三年班，就係喺羅湖入境嘅時候就被捕，同埋話你係有呢個甲狀腺問題，要食藥嘅，而喺2015年同L.M.（即係嗰兩個女仔嘅媽媽）結咗婚。
關大律師亦都陳詞，先講啲色情兒童物品先，嗰五十張相睇到就係話嗰個淫褻嘅程度係屬於低級，因為都冇咩嘢顯示到真正係有性行為，而牽涉嘅人除咗X之外，就係X自己媽媽，就話X當時都喺度笑緊，就似乎係似玩多過侵犯佢，起碼係冇話睇落係逼X或者係令到X好唔舒服嘅情況。
關大律師求情亦都話被告你對於干犯咗呢啲嘅行為非常之後悔，你就話好後悔自己喺呢個道德上冇去教好X同Y，就話而家犯咗呢啲咁嘅事，就令到一個良好嘅家庭係拆散晒，咁就好傷心，亦都希望X同Y喺呢啲嘅咁不愉快嘅事件中係快啲係痊癒，就將來係可以好開心、好健康咁樣生活。
而就73，即係2022年73呢一個嘅案件，關大律師嘅陳詞亦都係強調，就係話喺未定罪之前，被告你係冇案底，亦都係強調話呢個臨床心理學家只不過係懷疑被告你對未成年嘅少女有興趣嘅啫，唔係一個真正客觀嘅評估。關大律師亦都係陳詞話，似乎睇落對Y嗰個嘅傷害都唔係咁深。
關大律師基本上都話呢個不認罪定罪之下，係個判刑其實都冇乜嘢可以講到㗎喇，不過都希望本席喺判刑嘅時候考慮到兩件案件，即係十四項控罪加埋晒，一個整體嘅量刑，喺呢方面嘅求情嘅啫。
好喇，而家又再睇睇有關呢個判刑嘅原則先。
首先，就睇番呢個兒童色情物品嗰個控罪，因為根據呢個防止有兒童色情物品嘅條例，呢個嘅案例就係一個叫萬廣財嘅案件。咁萬廣財嗰件案件，一方面就係將呢個兒童色情物品係作咗四項嘅分類，然後亦都就呢四項嘅分類係畀咗呢個量刑指引。
總共有五十張相，有啲就係X就係半裸，有啲全裸，應該都係，如果淨係半裸同全裸，我覺得落去屬第一類，即係話內容刻劃裸體兒童作出帶色情成份嘅姿勢，呢個都幾吻合。不過，我就認為顯示到佢有啜佢媽媽個乳頭、有去摸或者吸啜另外一個女性嘅乳頭，就應該係去到第三類，第三類就係話內容刻劃裸體兒童與成年人之間一些非侵入性嘅性行為。我就唔接納呢一啲照片係影咗嚟係玩嘅，我認為一個恰當嘅量刑起點係12個月。
好喇，關於性侵嗰方面嘅原則。如果講話猥褻侵犯，即係俗稱「非禮」，或者係對呢個16歲以下嘅兒童作出猥褻嘅行為，有呢啲案例，譬如，好似周遠輝或者係曾昭德咁，或者係李漢華，呢啲都係一個恰當嘅案例嚟嘅。其實最主要想顯示，性侵兒童嘅罪行係冇量刑指引，每件案都要睇番佢嗰個案情、犯案嘅手法，即係嚴重嘅程度、犯案長期、時間長定短，同埋嗰個犯罪嗰個人同啲受害人嘅背景關係咁，呢啲冚𠾴唥都係要睇番每一件案嘅，不能一概而論，所以先例對於呢個判刑未必一定有幫助嘅。而上訴庭亦都喺呢個李漢華嗰件案件，嗰個件案件係涉及呢個肛交嘅，同埋係呢個向年齡喺16歲以下嘅兒童作出猥褻侵犯罪嚟判刑，不過，嗰啲量刑嘅因素，我就認為喺呢件案件亦係一樣適合嘅。啲因素係乜嘢呢？一，就係被告人同受害人年齡嘅差距；第二，被告人同受害人嘅關係，包括被告人係咪利用佢嘅職位或者佢身份去犯案，同埋犯案嘅時候有冇破壞別人對佢嘅信任；第三，就係被告人有冇威逼利誘受害人，令呢個受害人就範，畀佢淫辱；第四，就係犯案嘅次數多少同埋犯案時段長短；第五，犯案嘅時候係咪涉及不當、不必要嘅暴力、係咪對呢個受害人造成傷害或者係不適；第六，犯案嘅時候有冇採用到呢個適當嘅安全措施，有冇對受害人同埋大眾嘅衛生安全造成危害；第七，就係罪行有冇對呢個受害人造成身體傷害或者心理嘅創傷；第八，罪行對受害人嘅家人有冇造成影響；第九，被告人有冇涉及其他不當嘅行為，譬如，係邀請或者容許他人在場觀看或者係拍照或者係錄影咁樣；第十，就係被告有冇心理失衡或者戀童嘅癖好、重犯嘅機會高低等等。
仲有，就係一件案件叫做Huang Long Wei，上訴庭就講，喺判呢個性侵兒童，即係大人性侵兒童，係有以下三個重要嘅考慮：第一，就係話要以儆效尤，防止其他嘅人去干犯相類似嘅控罪；第二，就要顯示到社會人士對呢一類案件嗰個厭惡嘅情況；同埋第三，係要安撫番因為呢件嘅罪行，嗰個受害人同埋佢自己嘅家人同埋佢屋企人嗰個嘅情緒，呢個三範疇。
另外，喺一個叫做Kong Yun Chiu嘅案件，上訴庭亦都話當個受害人係一個細路仔嘅時候，呢個係非常之嚴重嘅加刑因素，因為細路仔係我哋社會裡面一個比較容易受傷害嘅份子，好多時呢啲被告人就係會利用呢啲細路仔無知或者係特別信任他人，嚟成功侵犯佢哋。所以當一個大人係特登咁樣去性侵一個兒童嚟係干犯呢個控罪，係令到嗰個案情係特別嚴重，所以一定要重判。仲有一個情況就係，細路仔好多時會相比個大人，係喺受到呢啲咁樣嘅情況嘅時候係默不出聲，唔敢去報，變咗就默默去承受呢啲嘅情況，尤其係當呢個案件係涉及違反誠信嘅情況。如果當然係用到呢個威嚇嗰啲情況，就令到嗰個案情更加嚴重添喇，所以判刑一定係要重嘅，喺呢類案件。
仲有一件案件就係叫做KKK嘅案件，上訴庭其實都係提到，就係話當一個侵犯者其實係嗰個細路仔嘅爸爸、媽媽或者係一個係代入爸爸、媽媽嘅位置嘅人，譬如，好似被告你都係後父，咁係令到呢個案情更加嚴重，法庭一定要採取行動去保護呢個細路仔。點樣去保護佢呢？就係重判囉。
好喇，頭先講咗呢啲嘅量刑嘅因素，咁就要睇番點樣用呢啲嘅因素符合喺呢件案件。被告你就係嗰個兩個細路（X同Y）嘅後父，你不單止唔去保護佢哋，反而就利用你自己後父嗰個嘅職位、身份，違反誠信性侵呢兩個細路，尤其Y添，因為Y，你係完全唔承認，係陪審員裁定你罪名成立嘅。
首先，亦都係處理咗你認罪嗰六項先，即係2022年74。
再講番一次先，提番先。控罪一就被告你要X同你手淫；控罪二就係你同個太太（即係佢哋個媽媽）就喺X同Y面前進行性交，赤裸，當然；第三項就係被告你就同媽媽就係性交嘅時候就叫兩個女睇，仲要阿媽示範點樣將個避孕套擺上你個陽具，即係手淫同埋呢個口交嘅；第四項控罪就係話阿媽係點樣教兩個細路女將嗰個避孕套擺落去，即係擺上去，或者係，套上去被告你個陽具。
好喇，呢四項控罪，考慮到被告你當時四十幾歲㗎喇，兩個細路都係16歲以下嘅，被告你係佢哋兩個細路嘅後父，嚴重違反誠信，頭先都講咗喇，唔去保護佢哋不特意，仲要去性侵佢哋。雖然我都考慮到就冇證據話有氹佢咁嘅情況或者話威脅佢，但係好明顯，你當時嘅身分就係佢哋媽媽嘅丈夫或者係男朋友都好喇，變咗某程度上係對呢兩個細路仔有一啲嘅壓力，即係你去侵犯佢哋嘅時候，係有某程度上係有壓力嘅。仲有，好明顯，你就係利用你自己當時嗰個地位，畀到嗰個機會，去令到X可以去同你手淫，又同兩個細路嘅媽媽進行性行為畀佢兩個睇，同埋係點樣阿媽係將嗰個避孕套擺上去你嗰個陽具嘅時候，同埋同你係進行呢個口交，亦都係畀兩個細路女睇住。
你其實係侵犯咗一連串嘅性侵嘅行為，即係嗰兩個細路女都係你嘅繼女。你嗰啲嘅行為，我就認為好明顯係會令到X同Y係受到創傷嘅，精神上嘅創傷。而X所受嗰個傷害，嗰個創傷去到嘅程度，佢終於係忍受唔住要𠝹手，即係學校度𠝹，畀學校睇到佢𠝹手，好彩就學校睇到佢有𠝹手嘅情況，結果先至係能夠去報警，最後呢件事先至係揭發到出嚟。
被告你自己就話，你之所以做啲咁嘅嘢，因為兩個細路女就係對性好有興趣，本席唔接納一啲咁樣嘅解釋。雖然個心理學家就話懷疑，但係你咁多次去侵犯呢兩個咁細嘅細路女，好明顯，本席就覺得你應該對呢個直情完全未發育嘅少女同埋係已經發育期間嘅少女係有性興趣，亦都接納呢一個臨床心理學家話，你再重犯嗰個機會起碼係喺中等程度嘅較低嗰個，即係最低嗰個部分。
我考慮咗之後，我就認為呢個恰當嘅量刑起點，第一項控罪係兩年、第二項控罪都係兩年、第三項控罪係兩年半、第四項係兩年，呢個起點。好喇，第五項控罪，我就認為嗰個案情更加嚴重，因為有太太幫手，直情撳住個細路女，夾硬除佢啲衫、除佢嗰啲衫褲，即係底褲同埋面褲，被告你仲要係用個舌頭去舔去個私處，仲有就係將你自己嘅陽具係喺佢個私處前面嗰度係上下郁動。根本好難去想像當時呢個X係嗰個受驚嘅程度去到邊，同埋佢受嗰個創傷去到咩嘢程度，所以我就認為恰當嘅量刑起點係三年半。
你認罪喇，都係最早嘅時候認罪，可以得到三分之一嘅刑期扣減。除咗呢個認罪之外，本席睇唔到有其他嘅減刑嘅因素。
畀咗你三分一刑期扣減，嗰六項控罪係乜嘢呢？第一項控罪16個月；第二項控罪都係16個月；第三項控罪20個月；第四項控罪16個月；第五項控罪28個月；第六項控罪8個月，加埋晒等如104個月，即係八年零八個月。
好喇，本席要考慮嗰個整體刑期㗎，本席就認為考慮咗個整體刑期之後，5年（即係60個月）就已經係可以顯示到被告你嗰個罪行嘅情況。為咗達到呢個5年嘅目的，判刑如下：第一項控罪16個月；第二項控罪16個月，同第一項控罪同期執行，即係都係16個月；第三項控罪20個月，同一、二同期執行，即係都係20個月；第四項控罪20個月，呢20個月就要同一、二、三嗰20個月分期執行，即係40個月；第五項控罪28個月，28個月裡面，其中20個月係要同嗰40個月，即係同頭先講咗嗰40個月係分開執行，即係夾埋晒係60個月，而家；而最後嗰條第六條控罪，嗰8個月同其他全部同期執行，夾埋晒係60個月嘅監禁，即係5年監禁。
好喇，講到第2022年73號，被告你其實係超過一段時間去性侵呢個Y嘅，喺呢段時間，初初就係去掂佢嘅私處，跟住就變本加厲，可以講，跟住就用手去摙佢嘅乳頭，又用自己嘅陽具去磨擦佢個臀部，跟住就強姦佢，又逼佢口交，又逼佢同個被告你係手淫。我接納雖然對Y用嗰個武力就唔係話超過咗犯呢啲罪需要用嘅武力，但係被告你兩次強姦Y嘅時候係冇用到避孕套，呢個係加刑因素。
證供亦都顯示，其實Y一路受到性侵之後，佢係啞忍嘅，佢係直至到X同警察講咗關於X嗰方面係點樣畀你性侵之後，佢先至和盤托出其實佢係點樣畀被告你性侵嘅。而根據啲資料話，X喺知道原來唔係淨係自己，原來Y一路都係受到性侵，令到X都好唔開心。我亦都肯定X同Y嘅親生爸爸同埋其他嘅屋企嘅親人或者係朋友，都會係因為被告你對X同Y做咗呢一啲咁嘅罪行係感到唔開心同埋受到影響。我就冇要求到控方係攞任何嘅報告，關於Y，但係好明顯，喺被告手上，佢咁長時間嚟受咗咁多次嘅性侵，一定係會喺呢個精神上係受到創傷嘅。
有一方面，被告其實當時已經係起碼同佢哋兩個嘅媽媽係男、女朋友關係，甚至結埋婚添喇，咁即係話有個太太喺度或者係女朋友喺度，就有一個好正常、合法嘅途徑嚟發洩佢嘅性慾，點解仲要選擇去侵犯Y，係一個16歲以下嘅細路女呢？所以咁樣睇落，你話佢唔係對一個發育期間嘅女孩子有性興趣，我唔知係乜嘢喇。
好喇，考慮番晒，因為本席已經講咗喺判刑方面有啲乜嘢嘅元素要考慮㗎喇嘛，嗰個量刑起點如下：
一至三，即係話喺嗰個電單車上面去非禮Y，全部都係用18個月做量刑起點；第四項控罪，即係喺呢個藥材鋪嗰單就兩年；第五項控罪，即係喺雲南屋企強姦，7年；第六項控罪，喺雲南嘅屋企逼Y口交，三年半；第七項控罪，喺香港葵涌嘅公屋強姦，7年；第八項控罪，就係話逼Y同你手淫嗰個係兩年半。加埋晒之後，我就係計過就係二十六年半，被告因為唔認罪，就冇可能係得到認罪嘅扣減。
好，雖然係被告唔認罪，呢咁多項控罪加埋，呢八項控罪加埋係二十六年半，但係我都要考慮呢個刑期整體㗎。
我考慮晒之後，我就認為20年就係恰當㗎喇，呢20年就顯示到被告呢八項控罪嗰個嘅罪行嗰個情況。咁點樣達到呢一個目的呢？首先，控罪一至三，即係話非禮嗰三項，每項18個月，全部就係同期執行，夾埋晒都係18個月，即係一年半喇；第四項控罪，嗰兩年，我就係裁定係要同呢一個其中1年係分期執行，變咗加埋就係兩年半；第五項控罪就係7年，呢7年要全部同嗰頭先講一至四嘅兩年半係分期執行，即係加埋晒係九年半；到第六項控罪，第六項控罪嗰三年半，其中嘅一年半要同嗰九年半係分期執行，即係加埋係11年。第七項控罪嗰7年，就係係要全部分期執行，即係11加7，就加埋18年；第八項控罪嗰3年，其中兩年要分期執行，即係話加埋就係20年，變咗全部就係20年嘅監禁，okay？
咁就再另外一個，就係話因為始終兩單嘅案件都仲要再考慮個刑期整體性，因為而家呢一個案件就20年，另外嗰件案件，話咗係5年㗎喇嘛，所以要再計一計喇。我考慮晒真係刑期整體性，我就認為喺2022年74嗰件案件嘅5年，就要同呢件案件一齊考慮，其中兩年就要同呢件案件嗰20年係分期執行，即係加埋晒22年監。