被告人係經審訊之後，被陪審團裁定一項販運危險藥物罪，罪名成立。
本案嘅控罪涉及嘅毒品係28.05克晶狀固體，內含25.28克甲基苯丙胺鹽酸鹽，俗稱「冰毒」。控方案情指在2018年11月23日凌晨，深水埗警區特別職務隊第一隊嘅隊員，在欽州街70號9樓外將被告人截停，被告人向警方報稱係住喺9樓B室。後來警方在9樓B室內，發現三大七細合共十包用透明可再封膠袋裝住嘅冰毒。另外，仲有一個透明可再封膠袋，裡面裝住大量嘅透明可再封膠袋，亦都有一個電子磅，於是警方以販毒嘅罪名向被告人宣布拘捕。在警誡之下，被告人講「啲豬肉有啲我自己食，有啲我讓畀朋友」。被告人被帶返警署之後，接受一個警誡之下嘅錄影會面，喺錄影會面裡面，被告人解釋佢所講嘅「豬肉」，即係涉案嘅冰毒，並且係交代更多嘅案情。
關於被告人嘅個人背景方面， 被告人現年50歲，曾經喺大陸結過婚，咁有兩個兒子，都已經成年，咁但係自從被告人係離咗婚之後，到目前為止，就已經同佢內地嘅家人係失去咗聯絡。被告人屋企有一對相當年紀嘅父母，父親據稱係已經中咗風，係70歲以上；母親亦都係有一個嘅肺癌係接受咗手術，健康狀況亦都不好。
被告人係過往曾經有--被告人案發嘅時候，據稱係同佢嘅女朋友居住喺案發嘅地址。被告人喺過往曾經有六次嘅出庭紀錄，係由1989年1月開始，直至到2018年嘅11月為止，合共有六項嘅定罪。最後嗰兩項定罪係2018年6月15日嘅一個管有危險藥物罪，係被判監3個月，緩刑18個月，並且罰款1,000元。最後嘅一項定罪係2018年11月24日，罪名係管有第一類危險藥物，當時係被判罰款1,000鈫嘅。其他嘅案底係同本案不類近，亦都無關。
喺量刑嘅時候，本席係考慮到毒品--本席係依據上訴庭嘅一啲嘅判刑嘅指引。根據香港特別行政區 訴 譚伊真呢件案件，若果係販運純冰毒係10克至到70克，判刑指引係7至11年監禁。喺本案係涉及嘅純冰毒係25.28克，咁如果純粹以數學方式計算，得出嘅量刑起點會係8年監禁，當然呢個監禁只係適用於幫人帶毒或者係幫人藏有毒品，以作非法販運用途嘅人士。若果被告人嘅喺販毒鏈裡面，佢嘅角色係越嚴重，販毒嘅層次越高，咁呢個量刑起點會上調。但係喺本案裡面，係冇證據顯示被告人個角色究竟係啲咩嘢，所以本席會以呢個數學嘅起點8年監禁作為量刑嘅起點。
林大律師求情嘅時候指根據案情，被告人亦都宣稱涉案嘅毒品有啲係佢自己食，有啲係讓畀朋友。控辯雙方同意喺本案裡面，大概有百分之二十嘅毒品係被告人打算自己服用嘅，咁呢個構成一個減刑嘅理由。基於呢個減刑理由，本席係給予被告人一啲嘅減刑。咁本席考慮過相關嘅案例，包括香港特別行政區 訴 黃雪后與及香港特別行政區 訴 周俊生，同埋香港特別行政區 訴 江達隆等案例，考慮到被告人係自用嘅份量係百分之二十，本席給予被告人10個月嘅扣減，咁就將呢個刑期就降為七年兩個月。
我相信林大律師已經為被告人提出所有可以為佢求情嘅理由，咁但係本席睇唔到有任何可以進一步減刑嘅空間，因此，本席宣判被告人係需要入獄七年兩個月。