香港特別行政區 訴 楊世傑

DCCC558/2009

香港特別行政區

區域法院

刑事案件2009年第558號

----------------

----------------

----------------

判刑理由書

----------------

1.  一般嘅判刑原則，本席不打算多費唇舌，應該從本席與律師對話當中應該都學習到判刑嘅原則，運用呢啲一般嘅判刑原則喺呢件案，正如你律師所用嘅譬如天秤，一邊就係你自己個人嘅私利，另外一邊嘅天秤就係公眾嘅利益，呢啲係過份簡單嘅分類嘅啫。所謂你嘅私利就係輕判--除咗犯罪嘅環境，對今件案最大嘅考慮就係”教”嗰方面，唔係”懲”嗰方面，你自己利益就係可唔可以改過自新呢？公眾利益就當然其實就係講緊係懲罰你，一個人犯咗法應該被懲罰，亦都應該畀人睇到犯罪者係要有應得嘅懲罰。我頭先都講過其實咁樣兩分就好混亂，因為有啲人係咁拗，個罪犯改過自新對公眾亦都係有益嘅，所以對你輕判對公眾可能亦都係有益。調番轉頭，對你重判可能對你自己有益，因為你可以得到一個正式嘅教訓，等你喺犯罪嘅傾向中驚醒過來。呢啲只不過係理論，所常遇到嘅，實際判刑法庭要喺呢件案睇你兩樣嘢，第一，件案件本身係咪嚴重到一定要判坐監，首先法庭考慮到香港有好多案件法庭係冇酌情權嘅，立例規定係冇得傾嘅，係一定要坐監，呢啲入屋犯法（俗稱「爆格」）就唔係呢類案件，唔係法官同埋法庭應該有絕對酌情權嚟決定適合嘅刑期。當然低級法官，即係好似本席咁唔可以天馬行空，要根基本原則同埋已往嘅判例，上訴庭所作出嘅指引，呢啲都係法律嘅一部分。呢啲入屋犯法爆格案件，如果係非住宅樓宇，個判刑係比住宅樓宇係略為輕嘅，當然係要睇好多樣嘢嘅，如果逐樣計就可能就得出一啲謬誤。正如好多人所講屋主損失好少，損失多少唔係一定可以顯示嗰件案件嚴重抑或唔嚴重，係冇人分析過。其實好簡單，如果你自己想像，你有本事潛入香港某大銀行地下保險保庫，功虧一簣，最後個保險庫嗰度門開唔到或者開到之前你就已經畀人捉咗，銀行一啲損失都冇，你估呢件案件會唔會嚴重？可能你律師照念經文話銀行冇損失，但係你自己想像咁堅固嘅金庫、保險庫你都入到去，案件嚴唔嚴重你應該知。咁其實嚴唔嚴重要睇下被爆格嘅建築物入面嘅私隱保護問題，同埋有可能造成嘅傷害，你入到屋會唔會驚嚇到人，實際上驚唔驚嚇到呢，另外一回事，所以點解住宅，有人住嘅住宅，當然，爆格有人住嘅住宅就比較嚴重啲。法庭考慮過呢個係酒樓，同埋一般係冇咩嘢人士留宿，酒樓閂咗門老鼠出現，當然鼠摸好似你自己都時不時出現，你唔好介意人哋叫你做鼠摸，呢個詞彙已經係失效。但係姑勿論點都好，最大機會鼠摸嚇親都係老鼠，所以法庭認為雖然係一個嚴重嘅案件，但係都唔係特別嚴重嘅。

2.  法庭講咁多即係要考慮即係如果我判你坐監，會判幾耐呢？同埋你又已經坐咗3個月監，然後再作比較，你律師要求法庭判嘅社會服務令。如果判社會服務令無可置疑法庭一定要滿意呢個服務令係適合，對你改過自新係有幫助，咁其他所需要嘅條件就已經吻合晒㗎喇，根本，因為你係適合--又可以安排到你做呢個社會服務令。最主要問題就係頭先講過，懲罰你抑或係畀個機會你改過自新，我都講過懲罰完都可以改過自新其實，不過要拗就拗好耐都得。

3.  無可避免要睇番你家庭背景，咁你有好多嘢都講咗，法庭唔需要重複。咁有好多嘢你冇講，就反而證明到你係真正受影響，可能真正受影響你唔願意再講，或者你自己受咗影響都不自覺嘅，就係你離鄉背井去美國讀書。根據感化官嘅蛛絲馬跡，唔係直接你講嘅，可能所需嘅費用唔係兩位家長所能希望負擔到，你亦都可能係希望家庭畀多啲費用你，當然你係冇解釋到點解讀唔成書，咁讀唔成書有好多理由，讀唔成書唔係一個罪過。但係肯定有一樣嘢我就講過就係你要離鄉別井，亦都有可能唔習慣，同埋屋企父母之間有磨擦唔需要任何人直接講，法庭都可以相信兒女會受影響，不自覺受影響亦都唔出奇，尤其是如果係父母嘅爭拗係因為自己留學費用，嗰度就令自己亦都有個罪惡感。咁呢啲都係過咗去，讀完書返嚟香港都係曾經做過穩定個工作，咁至於成日轉工抑或對老闆忠心等等都係見仁見智嘅，有事業野心嘅人可能隨時轉工，冇人想成世喺廸士尼扮米奇老鼠，佢要轉工唔可以話唔忠心呢個禾路廸士尼，最主要佢係有搵工做，新工唔係一定要多錢過舊工咁先至話有上進，我唔接納你律師所講多400鈫就正如你係更上進，要睇下工作嘅性質。

4.  咁睇過晒你嘅人生經歷，法庭係同意你係有機會改過自新，如果去入監獄坐成人監，可能真係對你個改過自新機會係有影響，呢個無可置疑。如果出番嚟接受社會服務令，嘅機會係大啲，改過自新，因為有爸爸、媽媽嘅支持。本席認為幫助年青人改過自新，冇人可以代替，更好咁代替父母嘅責任，因為你兩位父母雖然本身係有婚姻嘅問題，都能夠有一致嘅意願係協助你。本席認為你最大嘅問題就係賭賭癮嘅，但係呢個賭癮你爸爸都應該知道，都曾經做過啲嘢幫你，我諗主要都係賭債，你自認都有幾萬鈫嘅，應該點樣處置啲債務呢，卡數又好，乜都好，我諗你媽媽喺銀行做亦都可以畀到正確嘅意見。咁我認為你嘅賭癮同埋債務係可以解決到，因為有父母嘅幫助。至於犯案嘅機會，法庭唔敢猜測話多抑或唔多，但只可以講係未知之數，冇證據係證明你係十惡不赦，亦都冇證據證明你個前任校長話你離開咗學校之後係咪善良呢，就佢唔知嘅，咁呢個起碼冇證據證明你離開咗學校之後轉咗你個本性。本席認為因為你有家庭上面嘅支持、有你女朋友嘅支持，本席認為值得畀一個機會你改過，喺非監禁式嘅機會你改過，當然坐成年監都係一個改過機會。

5.  仲有個原因，調番轉頭如果係要判你坐監，你所受教嘅機會，如果係用幾多個月、幾多個月嚟比嘅呢，仲短過判你受呢個社會服務令，因為七除八扣你嘅監禁刑期唔會畀呢個社會服務令刑期更長嘅，尤其是要考慮到你已經坐咗3個月監，所以本席係會考慮你係適合呢個社會服務令，同埋睇過晒呢個報告，你亦都係適合同埋亦都有適當嘅工作畀你做。

6.  法庭考慮正式判你感化令仲有啲條件嘅，首先會解釋畀你聽，社會服務令一般人嚟講有個錯誤睇法就係冇懲罰性，咁其實係有懲罰性，因為社會服務令要做冇錢收嘅工作，亦都要受呢個感化官監管，做義工唔係求祈做嘅，一定要好好咁做，要感化官滿意。如果係敷衍咁做唔算數嘅，違反呢個社會服務令可能會罰款，亦都可能會將今次嘅案件重新再判。咁重新再判就乜嘢選擇，可以話埋畀你聽，就即坐監。假如喺呢個社會服務令期間犯其他刑事案件，咁除咗新犯案件會被定罪，而家呢個案件亦都會重新再判刑嘅，咁我亦都講過，都好大可能，亦都可能無所選擇法庭會判你即時監禁。

（法庭詢問被告是否願意接納社會服務令，被告表示願意）

7.  而家第一、第二條控罪都判你社會服務令，係同期執行嘅，呢個社會服務令係240個小時。