HCCC 204/2016
香港特別行政區
高等法院
原訟法庭
刑事案件2016年第204號
----------------
------------------------------------
判刑
以下內容乃法庭數碼錄音謄本
官：
被告承認一項管有危險藥物罪同埋一項販運危險藥物罪。
案情指，佢被警員發現喺一架電單車旁邊徘徊，跟住之後又坐上及坐落該電單車嘅座位，東張西望，警員截查佢喺佢嘅右前褲袋搜出一包「冰」毒，呢包「冰」毒經過化驗之後，證實為內含1.71克甲基苯丙胺鹽酸鹽嘅1.76克晶狀固體，警員又喺佢個電單車座位下嘅儲物格搜出三包「冰」毒，係化驗下證實為40.1克嘅晶狀固體，內含37.7克甲基苯丙胺鹽酸鹽。被告喺被警誡下聲稱所有嘅「冰」毒均係佢自用，但係現在，佢則承認褲袋嘅「冰」毒係佢自用，但係電單車上面嘅「冰」毒係佢作販運用。佢褲袋中嘅「冰」毒嘅零售價係港幣556元，而喺電單車儲物格搜出嘅三包「冰」毒，零售價係12,640元。
被告現在37歲，一共有二十二項嘅刑事紀錄，其中八次涉及毒品，而其中有一次係販運危險藥物嘅紀錄，呢次紀錄係喺2010年，佢基於販運危險藥物，被判處合共八年八個月嘅監禁，而佢係喺2015年6月24日刑滿出獄，但係其後未及四個月，已經干犯本案。大律師喺求情嘅時候指，被告當日喺較早前購入有關嘅毒品，除咗喺佢褲袋嗰一包係供佢自用之外，佢亦都聲稱喺電單車搜獲嘅三包中，其中一包亦都係佢自用，大律師希望本席能夠參考陳暫委法官喺黎明亮一案中（HCCC 261/2016）嘅處理方式，再將第二項販運危險藥物嘅控罪嘅起刑點，因應部分係被告自用，將起刑點往下調整。
本席喺量刑嘅時候考慮咗被告認罪、大律師嘅求情、有關嘅量刑指引及案例，首先，就住本案嘅證供而言，本席不認為有就住第二項控罪部分毒品係被告自用嘅聲稱而應該將量刑基準往下調整嘅空間，事實上，就算有呢一個空間，呢一個空間亦都會因應被告過往同類嘅紀錄作為加刑因素，而兩者互相抵銷。
就住控罪一，本席以18個月作為起刑點，給予被告三分之一嘅認罪扣減，判刑12個月；就住控罪二，本席係以105個月作為量刑起點，扣減三分一，判刑70個月。兩項控罪同期執行。