被告承認一項襲擊引致他人身體造成傷害嘅控罪。
被告同受害人係前度嘅戀人，當時受害人23歲，被告28歲，已經分手五個月。事發之前，兩人相約見面，及後一同前往時鐘酒店，進入房間之後，被告不顧受害人掙扎，除晒佢嘅衫，受害人掌摑咗被告嘅面，被告怒極失控，用手握住受害人嘅頸部，並且掌摑佢兩邊嘅面頰，又扯佢頭髮，用手掩住佢嘅嘴，阻止佢呼叫救命，再扯佢頭髮。後來受害人咬咗被告右肩一下，被告落咗床之後，再用手扯住受害人嘅頭髮，將佢由床頭扯到床尾，又再掌摑佢嘅面部。
受害人雙眼、眼皮同埋眼睛對下位置有紅瘀傷，佢嘅下顎同埋頸部有擦傷，右手手臂亦都有紅嘅瘀傷。
被告有兩次定罪嘅紀錄，包括公眾地方打交、襲擊引致他人身體造成傷害以及刑事毁壞，曾經被判處社會服務令。
代表被告嘅大律師喺求情嘅時候表示，被告一直有穩定嘅工作，及時支付家人家用，而今次嘅事件係由於佢同受害人兩個人以往係戀人關係而衍生，雖然可以算係求愛不遂而動粗，但係受害人喺一定程度上向被告發出誤導嘅訊息，令佢失去理智，而干犯本案。大律師強調，本案並非同類案件中最嚴重嘅，亦都唔係早有預謀，而被告喺應訊嘅時候，得知事主不會出庭作供之後，仍然賠償咗金錢畀事主，由此可見，佢係真正為自己一時衝動嘅作為感到後悔，以及有誠意補償事主嘅損失。而且，大律師強調，可幸今次被告所導致受害人嘅傷勢並非永久性。
本席喺判刑嘅時候，考慮咗本控罪嘅性質、案情，閱讀咗背景同埋心理專家嘅報告、被告同埋被告父母及家人聯名嘅求情信。報告指，被告性情衝動，過往涉及嘅案底亦都源自佢認為被人惹怒、情緒失控而導致。心理專家表示，被告嘅重犯機會屬於中等。
大律師指出，被告同家人喺今次洞悉被告嘅問題之後，無論判刑如何，亦都將會尋求專家嘅輔導，特別係心理嘅輔導。
首先，被告得悉受害人係不會就原先嘅控罪出庭指控佢，之後提出選擇承認本襲擊控罪，並且作出咗金錢嘅賠償，雖然金錢嘅賠償並不能被視作換取自由、毋須入獄嘅籌碼，然而卻可以彰顯被告有真誠嘅悔意。事實上，以被告嘅背景同埋本案嘅案情而言，假若佢唔係過往曾經有過案底，而今次係初犯嘅話，社會服務令應該會係量刑中其中之一適當嘅選擇。然而，被告喺以往已經曾被判社會服務令，睇嚟社會服務令並不能遏止佢喺被惹怒後作出衝動嘅作為，即係話社會服務令對佢並起不了阻嚇嘅作用。
故本席要考慮嘅係，平衡阻嚇性同埋防治性兩方面之後，邊種判刑係適合嘅。被告喺認罪之後，還押期間已經一嘗牢獄生涯兩個星期之久，本席相信呢個鐵窗滋味已經對佢造成一定程度嘅阻嚇，亦都成為對佢嘅當頭棒喝。另外，心理專家認為，側重控制情緒嘅心理輔導，對被告嚟講係有長遠嘅裨益。
本席認為，喺本案同埋喺被告嘅情況而言，一個感化令係一個適合嘅判刑。下令判處感化12個月，並且需要遵從感化官嘅指示，進行有關嘅心理輔導。