HCCC 215/2016
香港特別行政區
高等法院
原訟法庭
刑事案件2016年第215號
----------------
----------------------
判刑 以下內容乃法庭數碼錄音謄本
官：
本案被告人喺2月23日出席聆訊嘅時間承認有關嘅控罪，但當佢嘅代表大律師進行求情時，被告似乎係因為緊張而出現痙攣，因此，本席指示將佢係送院治理，咁判刑就押後到今日嘅早上。為咗避免情況係重演，本席建議咗辯方嘅曾大律師先將未完成嘅求情以書面嘅形式係事先呈交，好讓本席今早能夠盡快處理判刑。喺呢一方面多謝曾大律師嘅配合，本席亦都已經收到有關嘅書面求情。
被告被控告嘅係販運毒品罪，涉及約24克嘅「冰」毒，被告承認控罪，亦都同意控方嘅案情撮要。
案情嘅枝節本席唔打算重複，主要嘅情況係被告喺案發當天嘅黃昏時間，喺安樂村嘅路上被警察截停。經搜查下，警員喺被告嘅褲袋入面係搵到相關嘅毒品。被告喺警誡及後來嘅錄影會面時，都坦白承認係販運「冰」毒，佢話係因為欠人哋嘅金錢，而係被誘導去犯案嘅。
被告以往有多次嘅刑事紀錄，但係就冇相同嘅罪行。
大律師喺求情嘅時間提到，被告現年36歲，佢同母親同住嘅。年幼時因為發高燒而影響佢腦部嘅發育，因此係變成有輕度嘅智障，身體亦都出現有其他嘅狀況，例如係痙攣等等。喺工作方面，被告因為智力同埋健康問題，因此，只能夠做到散工之類嘅職業，入息唔高。
代表大律師指出，被告嘅判斷力係比較一般人係低，容易受人唆擺或者係利用嘅。當然被告知道販運毒品係犯法嘅行為，而佢自己以前都有吸食過毒品嘅。至於今次犯案嘅背景呢，被告已經係向警方坦白咁交代咗。大律師強調，被告家人對佢係非常之支持嘅。被告亦有一位未婚妻，未婚妻表示會在被告服刑完畢之後同佢結婚，展開新嘅生活，亦都會搬離粉嶺區，以免再受損友嘅影響。
就判刑基準方面，考慮到相關嘅指引同埋本案毒品嘅數量，本席會以七年半作為量刑嘅起點。被告承認控罪，本席會給予全數三分一嘅扣減。有關被告嘅智力、精神及身體狀況，喺本席面前嘅多份專家報告都有分別作出說明，經考慮後，基於被告嘅個人情況，本席決定酌情將刑期再減8個月，因此刑期係四年四個月。
至於大律師指出被告害怕在獄中被欺凌嘅問題，本席絕對相信懲教署係會作出適當嘅處理同埋安排。呢個係法庭嘅判刑。