HCCC 191/2009
HCCC191/2009
香港特別行政區
高等法院
原訟法庭
刑事案件2009年第191號
--------------------
訴
翟兆林Bernard
-----------------------
判刑
以下內容乃法庭數碼錄音謄本
官： 被告承認一項盜竊罪，違反香港法例第210章《盜竊罪條例》第9條，以及兩項嘅搶劫罪，違反香港法例第210章《盜竊罪條例》第10（1）及（2）條。
案情指被告裝作核實一名16歲男童身分嘅時候，著令佢交出錢包以及手提電話，之後取去300元以及手提電話離去。男童完全不知發生何事，待十分鐘之後，見到被告仍然冇返去，先至曉得報警。呢件事發生之後嘅翌日早上，被告喺一快餐店門口截停一對年紀係15同埋16歲嘅男女，著令男子交出流動電話，男子拒絕，但係被告恐嚇會搵人嚟向佢施以武力，令到該男子害怕，先後交出流動電話以及手袋，內有一張八達通卡，一條鑰匙同埋一條手鏈。而五天之後嘅晚上，被告行劫一名的士司機，期間佢以一刀刃長4吋嘅刀指住的士司機頸部，令司機交出錢箱內嘅410元。再進一步威嚇司機，要佢再度交出銀包入面嘅現金，否則會用刀捅佢。司機拒絕，糾纏期間司機雙手受傷，被告逃離現場期間被截停以及拘捕。的士司機送院之後被發現佢嘅頸部、手指有割傷，同埋肌腱受傷，其中以左手指間隙嘅傷口最深，另外有手指神經切斷，需要立刻進行修補，並且有手指動脈完全撕裂。是次事件令到司機嘅左手指伸展以及內收活動幅度受到嚴重局限，而右手其中一手指嘅活動幅度受到少許局限。
被告現年29歲，已婚，同太太已經分居，同5歲嘅兒子同埋雙親同住，之前喺香港一共有八次嘅刑事紀錄，其中四次同不誠實嘅控罪有關，包括兩次行劫。佢喺本年3月23號因為管有危險藥物被判入獄4個月，該案係本案第三項控罪被告被捕嘅時候同時干犯。
大律師喺求情嘅時候指，被告行劫的士司機嘅時候並非蓄意存心傷害司機，今次事主蒙受傷害純屬意外。另外大律師亦都指出，根據事主最新嘅醫療報告，事主嘅日常生活所受影響不大。大律師又指，被告嘅5歲兒子現在係交由佢嘅父母照顧，咁由於佢之前犯案被判監禁，刑滿出獄之後搵唔到工作，想搵快錢先至鋌而走險，干犯本案嘅。大律師指，本案嘅大部分失物已經尋回，價值亦都不高。大律師要求本席考慮各方面嘅因素，予以一個低嘅起刑點，並且考慮量刑整體性嘅原則，輕判被告，好讓佢早日獲釋，與年老嘅雙親團聚。
本席喺量刑嘅時候考慮咗本案嘅案情、大律師嘅求情、有關嘅量刑指引，亦都考慮咗被告親手撰寫嘅求情信。本案所涉及嘅三次事件發生喺不足一個星期內，被告食髓知味，行徑一次比一次猖獗以及變本加厲，第一次只係涉及佯裝，不涉及武力；第二次係涉及出言恐嚇會使用武力；但係最後一次不但只涉及武力，仲有使用武器。而被告喺被捕時候所指，的士司機係自己反抗而導致受傷，佢並冇存心傷害司機呢一點，根本不構成有利被告嘅求情因素。被告自己攜帶刀，以資指嚇的士司機嘅頸部，司機情急之下反抗以致受傷，並不是完全意料之外嘅事情。而的士司機喺呢一次事件中傷勢不輕，手部嘅活動能力可能受到長期影響。
本席考慮咗香港特別行政區 訴 黎庭華（譯音）CACC 651/1997一案，認為就第三項控罪，應以7年作為量刑起點。至於控罪一係偷竊嘅控罪，不涉武力；而控罪二則涉及威嚇使用武力，但係不涉及武器嘅行劫罪。本席分別以兩年半同埋四年作為控罪一同埋控罪二嘅量刑起點，喺給予三分之一嘅認罪扣減之後，每項控罪嘅判刑如下：控罪一，判刑20個月；控罪二，32個月；控罪三，56個月。本席亦都考慮咗量刑嘅整體性，認為根據本案三項控罪嘅案情而言，一個10年嘅總起刑點係適合，予以三分之一嘅量刑扣減，判刑80個月。下令控罪一中嘅8個月，以及控罪二中嘅16個月，同控罪三嘅刑期分期執行，總刑期80個月。