香港特別行政區 訴 關志良

HCCC223/2008

香港特別行政區

高等法院

原訟法庭

刑事案件2008年第223號

------------------

判刑
以下內容乃法庭數碼錄音謄本

官：被告承認一項販運危險藥物罪，即係以凈含毒量計係14.12克嘅「冰」。

情節方面，本案係一宗典型嘅截停搜查而揭發嘅毒品案。喺警誡下，被告承認毒品購自其他人，希望以較高嘅價錢賣出，從中取利。

被告現時29歲，香港出生，同埋受教育至中三，之後曾做過廚房同跟車工人。案發前，與父母同哥哥同住，26歲嘅妻子則居於內地。

此外，佢有三次前科，其中兩項係管有危險藥物同埋管有第I部分管制嘅毒藥。

求情嘅時候，律師只能夠講嘅都係話被告太太有經濟需要，被告想搵啲快錢，但係呢啲都唔係有效嘅求情理由嚟嘅。

無論如何，14.12克嘅「冰」，量刑起點大約應該係七年，被告認罪，可以得到三分一嘅扣減，就下調至四年零八個月，不過就只係咁多，冇其他嘅輕判理由㗎喇。換言之，被告需要為本案入獄四年零八個月。