HCCC 97/2015
香港特別行政區
高等法院
原訟法庭
刑事案件2015年第97號
----------------
----------------------
判刑 以下內容乃法庭數碼錄音謄本
官：
被告人承認一項販運危險藥物罪，被裁定該項控罪罪名成立。
喺判處嘅時候，本席考慮咗案件嘅整體情況，包括案件嘅性質同埋情節，尤其是所涉危險藥物嘅種類同埋份量、被告人嘅個人背景同埋辯方大律師嘅求情陳詞。本案嘅案情係十分之簡單，被告人承認咗喺一名朋友嘅屋企裡面包裝處理咗涉案嘅危險藥物，即係內含703.54克氯胺酮嘅892.62克粉末。
被告人現年21歲，中二學業程度，喺被捕嘅時候係無業，被告人亦都係冇刑事定罪紀錄。
辯方何大律師喺陳詞嘅時候強調，被告人承認控罪，有真誠悔意，而且佢係主動向警方自首。何大律師指出，被告人嘅父母喺2010年離異，令到被告人大受打擊。被告人曾經任職跟車工人，但係一直開工不足，喺犯案之前嘅日子已經冇收入，喺咁嘅情況之下，被告人被人利誘而犯案，被告人當時只係18歲，易受人利用，而家被告人已經決心改過自新，打算喺服刑期滿之後，跟隨從事裝修嘅父親學習手藝，重回正軌。何大律師指出，同案嘅兩個人亦都喺之前承認咗相同嘅罪行，分別被判監禁七年九個月同埋八年。
根據律政司司長訴許守城（[2009] 1 HKLRD 1）一案，販運氯胺酮嘅人如果毒品純含量係600至1,000克嘅話，應該考慮判處12至14年監禁，本席不認為案中存在足可偏離量刑指引嘅充分理由。
本席亦都顧及咗上訴法庭喺英皇訴劉德明（[1990] 2 HKLR 370）一案裡面指出，法庭喺量刑指引嘅範圍裡面，決定適當嘅量刑基準嘅時候，應該考慮案中嘅所有相關情況。
本席認為，以本案嘅情況嚟講，採用十二年半作為量刑基準係合適，先至足以反映案件嘅嚴重程度。被告人承認控罪，應該得到三分一嘅刑期扣減。除此之外，顧及何大律師盡責稱職嘅求情陳詞所述，本席給予被告人多4個月嘅刑期扣減。
被告人請起立。
基於上述理由，本席判你就本案監禁8年。