|
HCCC 327/2018
[2019] HKCFI 1356
香港特別行政區
高等法院
原訟法庭
刑事案件2018年第327號
----------------
----------------
| 出席人士： |
律政司高級檢控官Ms CHAN Sze-yan，代表香港特別行政區 |
| |
Mr William K F HUI，由法律援助署委派的馮元鉞律師行延聘，代表被告人 |
| 控罪： |
[1] 販運危險藥物（Trafficking in a dangerous drug） |
| |
[2] 管有危險藥物（Possession of a dangerous drug） |
----------------------
判刑
以下內容乃法庭數碼錄音謄本
----------------------
官：
引言
被告人在裁判法院承認一項販運危險藥物罪，涉及46.31克固體，內含43.22克可卡因，及一項管有危險藥物罪，涉及甲基苯丙胺痕跡，被交付本法院判刑。今天被告人在本席席前確認認罪，並同意控方的案情摘要。
案情
簡而言之，在2017年12月2日晚上約十點半，警方人員帶同搜查令，到達控罪所列位於九龍牛頭角啟業邨嘅一個單位進行搜查，當時由被告人應門。警方人員在單位內搵到一批物品，包括一百三十五小袋內有控罪一所列嘅可卡因、9,700元現金、兩束未用嘅可再封膠袋以及三個吸服毒品嘅工具，而每個工具內都有與控罪二相關嘅甲基苯丙胺痕跡。
在次日嘅一個錄影會面中，被告人承認佢以50,000元現金，向一個名叫「阿強」嘅人購買控罪一所列嘅毒品，打算以每小包300元嘅價錢轉賣畀其他人。至於嗰三個吸服毒品嘅工具，係佢自己用嚟吸食「冰」毒之用。
控罪一所列嘅可卡因市值約為港幣50,107元。
被告人背景
被告人現年32歲，香港出生，受教育至中五程度，任職地盤工人。被告人已婚，妻子係內地人士。被告人過往冇任何定罪紀錄。
求情
代表被告人嘅許大律師，求情嘅時候強調被告人有令人同情嘅家庭背景。被告人自幼父母離異，佢一直寄居於母親外家。被告人大約5歲嘅時候，目睹外祖父心臟病發離世。辯方呈遞嘅求情信裡面，亦都提到被告人嘅母親喺1997年一宗火警中不幸罹難，又在17歲嘅時候目睹外婆在家中心臟病發離世。但以上一連串痛苦經歷，並冇令被告人自暴自棄，被告人與母方親友一直關係密切，被捕前一直有穩定工作。
被告人染有吸毒嘅習慣約兩年，但係一直冇刑事定罪紀錄。許大律師指被告人今次犯事係因為欠下巨額賭債，受不良份子唆擺，抵受唔到誘惑，一時糊塗，以致誤墮法網。被告人自去年10月被轉到赤柱監獄還押之後，一直有爭取進修嘅機會，喺監獄裡面進修英文及學習車衣，希望日後能夠有一技之長。辯方呈遞被告人親手所寫、佢親友所寫以及由林祖明神父所寫嘅求情信，本席亦都已經逐一詳細考慮過。總括而言，被告人對今次嘅事件深感後悔，希望法庭給予佢改過自新嘅機會，以及讓佢可以照顧年老嘅舅父。
量刑
在HKSAR v Leung Kwai Ping & Anor（No.2）（[2003] 2 HKC 575）及HKSAR v Kilima Abubakar Abbas（[2018] HKCA 602）等案例，上訴法庭一再重申，販毒罪嘅判刑主要根據相關嘅判刑指引，依照毒品嘅數量，以數學方式計算刑期起點。除非有好嘅理由，否則法庭量刑時不應偏離以該數學方式得出嘅量刑起點。
根據上訴法庭在Attorney General v Rojas[1994] 1 HKC 343，非法販運可卡因嘅判刑，係依循非法販運同等數量海洛英嘅判刑指引。對於販運10至50克海洛英嚟講，適用嘅判刑指引來自R v Lau Tak Ming and others[1990] 2 HKLR 370，係5至8年監禁。呢個判刑指引，亦適用於販運同等數量嘅純可卡因。
本案控罪一涉及43.22克純可卡因，以數學方式計算，量刑起點應為七年五個月，亦即係89個月。被告人現年32歲，佢雖然冇案底，亦有令人同情嘅家庭背景，但即使將以上各樣事情加埋起嚟，仍然未能夠構成足夠嘅理由，讓法庭可以偏離上述量刑起點。
本席相信許大律師已經盡力將所有可以為被告人求情嘅理由，都向法庭陳明。但本席認為被告人除咗及早認罪之外，並冇任何足以減刑嘅求情理由。本席按慣例給予被告人三分之一認罪扣減，判處佢就控罪一入獄59個月監禁。
至於控罪二，基於涉案「冰」毒嘅份量極之輕微，本席以6個月監禁為起點，扣除三分之一嘅量刑折扣之後，判處被告人入獄4個月。
整體刑期方面，考慮到被告人嘅背景與及求情因素，亦為咗鼓勵佢改過自新，本席在有限度嘅酌情空間之內，下令將控罪一同控罪二嘅刑期，全部同期執行。因此被告人就兩項控罪，一共被判入獄59個月。
|