HCCC 271/2015
香港特別行政區
高等法院
原訟法庭
刑事案件2015年第271號
----------------
----------------------
判刑
以下內容乃法庭數碼錄音謄本
官：
被告人被控告一項販運毒品罪，佢承認控罪，亦都同意案情嘅。
控方案情撮要指出，喺案發當天嘅下晝，警員根據搜查令進入被告喺呢個青衣長青邨嘅單位進行調查，當時被告係自動咁指出毒品所放置嘅地方，即係喺冷氣機嘅頂部，警員確實就喺冷氣機嘅頂部搵到十二包共約係159克嘅氯胺酮（即係「K仔」），亦都搵到一啲處理毒品嘅工具，警員於是拘捕被告，而在警誡下，被告係承認毒品係佢用作販運用途，與家人無關嘅。其後，被告喺錄影會面時進一步確認同埋交代犯案嘅背景情況，佢透露佢替人運毒可以得到兩千鈫嘅報酬，而佢自己係並冇吸毒嘅習慣。
本案涉及嘅毒品個零售價係大約港幣40,000鈫。
被告今年37歲，佢以往有多次嘅刑事紀錄，其中係包括藏毒，咁同埋係販運毒品等等嘅罪名，在被拘捕前，佢係一名冷氣技工。
代表被告嘅李大律師喺求情嘅時間提出，其實被告係有正當工作嘅，佢就係做冷氣技工，但係到咗冬天嘅時間，佢嘅工作量會減少，入息亦都會受到影響，因此佢係用呢個販毒嘅做法嚟到增加佢嘅入息。李大律師係呈交咗被告、家人同埋僱主嘅求情信，咁本席已經係閱讀過喇。
其實被告已經係成年人，以前亦都因為毒品案被拘捕同埋監禁，佢應該知道販毒嘅後果，唔應該再心存僥倖，以身試法。現時佢被警員上門拘捕，又要面對長時間嘅監禁，令到家人要為佢擔憂。被告用犯法嘅手段去增加收入係非常不智嘅做法，被告之後應該要點樣走落去，佢真係應該要想清想楚。
考慮過有關嘅案例，即係許守城一案嘅指引之後，本席決定以7年作為刑期嘅起點，扣減三分一之後係四年八個月。進一步考慮到被告係即時向警員交代毒品嘅位置，本席會酌情將刑期下調到四年半（即係四年六個月），咁呢個嘅處理方法已經係較為寬鬆嘅判罰，被告係要好自為之。最後個刑期係四年六個月。