HCCC 182/2009
HCCC182/2009
香港特別行政區
高等法院
原訟法庭
刑事案件2009年第182號
----------------
訴
劉耀明
----------------------------------------
判刑 以下內容乃法庭數碼錄音謄本
官： 被告承認兩項販運危險藥物罪，違反香港法例第134章《危險藥物條例》第4（1）（a）及（3）條。
案情指，被告喺離開一大廈後被警員截查，喺佢右腳嘅襪內搜出三小包毒品，又從其內褲搜出五十粒毒品，被告指白粉係佢買嚟自用嘅。其後，警員再喺佢單位嘅房間內搜獲多袋毒品，被告亦都指該些毒品係供自己服用。毒品經過化驗之後，證實佢身上嘅毒品為50.30克嘅混合劑，內含40.33克海洛英鹽酸鹽。而喺佢單位內嘅毒品係21.29克嘅混合劑，內含14.16克海洛英鹽酸鹽。所有毒品總市值，約為港幣57,212鈫。被告承認佢管有所有嘅毒品，係作販運用途。
被告現年係38歲，有十九項嘅刑事紀錄，其中有十二次涉及危險藥物，當中三次涉及販運危險藥物罪。最後一次喺2007年2月27日，因為管有危險藥物罪，被判到戒毒所服刑，喺2007年12月10日獲釋。
大律師喺求情嘅時候表示，被告坦白承認控罪，從佢嘅案底，可以見到佢本身亦都係毒品嘅受害者。由於佢多次被監禁，獲釋之後身為釋囚，難以搵到工作，因為毒癮以及經濟問題，先至干犯本次事件。大律師希望本席能夠予以一個較低嘅起刑點。
本席喺量刑嘅時候，考慮咗本案嘅案情、毒品種類、重量以及量刑指引、被告認罪以及大律師嘅求情。本案兩項嘅控罪，一共涉及嘅係54.49克海洛英鹽酸鹽，根據量刑指引係納入50至到200克，即係判刑界別介乎8至到12年嘅起刑點。本席認為，就住本案總毒品重量而言，一個8年嘅起刑點係合適嘅，予以三分之一嘅認罪扣減，判刑64個月，分配如下：
第一項控罪，48個月；第二項控罪，16個月。分期執行。