|
HCCC 356/2017
[2018] HKCFI 2419
香港特別行政區
高等法院
原訟法庭
刑事案件2017年第356號
----------------
----------------
| 出席人士： |
律政司署理高級檢控官Ms Noelle A CHIT，代表香港特別行政區 |
|
Mr Lawrence HUI，由法律援助署委派的希仕廷律師行延聘，代表被告人 |
| 控罪： |
[1] 販運危險藥物（Trafficking in dangerous drugs） |
---------------------------------------
判刑
以下內容乃法庭數碼錄音謄本
---------------------------------------
官：
被告承認一項販運危險藥物罪，違反香港法例第134章《危險藥物條例》第4（1）（a）及（3）條。
案情指警務人員喺黃大仙竹園街市外埋伏，發現被告人坐喺一張凳上形跡可疑，截停查問之後喺佢個手袋入面搜出合共五十九袋嘅毒品，兩部手提電話，以及現金港幣7,095鈫。其後喺被告嘅住所亦都搜出一啲包裝毒品嘅工具，包括一沓未使用過嘅可再封口膠袋、一個電子磅，以及一支膠匙羹。
被告喺警誡下表示佢喺被捕前曾經同客人交易，而喺被捕嘅時候正在等待下一個客人。佢話每次交毒品畀一個客人，佢係可以獲得100鈫嘅報酬。佢亦都話佢係喺沙田從一名中國籍男子處攞到毒品，然後按照指示將毒品交畀客人，然後將販毒得益交畀唔同嘅男子。佢每日大概可以賺到900元。
有關嘅毒品經過化驗之後證實為內含191克甲基苯丙胺鹽酸鹽嘅195克晶狀固體，內含7.42克可卡因嘅7.89克固體，以及內含2.87克氯胺酮嘅6.6克固體。所有嘅毒品合共嘅零售價係港幣64,204元。
被告現年44歲，過往並冇刑事紀錄。大律師指，佢係因為經濟原因而犯案嘅，大律師希望本席能夠予以一個較低嘅起刑點。另外雖然被告係喺轉介，以致案件管理嘅階段均不認罪。佢係喺案件排期之後經過新嘅法律團隊嘅建議之後，作出控罪協商，然後先至致信法庭要求取消聆訊日期，早日認罪。大律師希望本席喺量刑扣減嘅時候，喺吳文南一案容許嘅空間酌情處理。
本席喺量刑嘅時候考慮咗本案嘅案情、毒品嘅種類、重量，同埋有關嘅每種毒品嘅量刑指引，亦都考慮咗被告認罪。本案係涉及三類嘅毒品，第一，係191克嘅「冰」毒，納入70至到300克11至到15年嘅量刑基準，即係大約13年嘅起刑點。二，7.42克嘅可卡因納入0至到10克5至2年嘅量刑基準，亦都即係約4年嘅起刑點。三，2.87克嘅氯胺酮納入1至到10克2至4年嘅量刑基準，即係兩年嘅起刑點。
本席跟住根據陳旭亮（譯音）案作以下嘅測試，第一，用歸謬法，亦都即係假定所有嘅毒品，即係總重量201.29克全部係「冰」毒，則應該被納入70至到300克11至到15年嘅量刑基準，大概約十三年零兩個月嘅起刑點。第二，換算法，喺呢度嘅2.87克嘅氯胺酮，如果起刑點大約係兩年，可以換算為3克嘅「冰」毒。27.42克嘅可卡因，約4年嘅起刑點則可換算為約5克嘅「冰」毒，咁係191加3加5，即係等於199克嘅「冰」毒，起刑點亦都係約十三年兩個月。第三，比例法，即係以本案嘅「冰」可卡因、氯胺酮嘅比例分配，分別係94個per cent、3.6個per cent以及1.42 per cent。假如全部係「冰」毒，或者全部係可卡因，以及全部係氯胺酮嘅起刑點，再全數加起上嚟，大約係13年嘅起刑點。
喺以上嘅測試之後，本席認為就住本案所有嘅毒品係應該以13年作為量刑基準。而根據吳文南案，如果案件已經喺原訟法庭排期聆訊，而被告係喺首天聆訊之前認罪，量刑嘅扣減應該係20個per cent至到25個per cent之間。本席並不認為法律團隊嘅改變，甚至係控罪協商等可以驅使本席偏離上述嘅指引。假如被告人係真心認罪，及想以及早認罪作為獲得足三分之一量刑扣減嘅基礎，被告人理應一早表示承認販運危險藥物罪，而指示律師為佢與控方進行協商，而非等到協商成功後先至表示認罪。本席認為喺本案所有嘅案情嚟講，23個per cent嘅量刑折扣係適當嘅。13年作為量刑起點，扣減23個per cent係120個月，即係10年監禁。
|