香港特別行政區 訴 黃泔誠

HCCC 314/2018

[2019] HKCFI 1823

香港特別行政區

高等法院

原訟法庭

刑事案件2018年第314號

----------------

----------------

--------------------------------------

判刑
以下內容乃法庭數碼錄音謄本

--------------------------------------

官：　

被告黃泔誠被控一項販運危險藥物罪名，違反香港法例第134章《危險藥物條例》嘅第4（1）（a）同埋（3）條。被告人否認控罪，承認係管有危險藥物。經過審訊之後，被告被陪審團一致裁定販運危險藥物罪罪名成立嘅。

案情顯示，喺案發當日，有一群係葵青特別職務隊嘅警察就喺長亨邨度做一個反毒品嘅行動，當時係著住便裝，咁喺凌晨（即係4月28號嘅凌晨）就截停咗被告。根據警方講，喺被告嘅身上，即係底褲度就係搵到有一包嘅毒品（即係而家涉案嘅毒品），所以就拉咗被告係販運危險藥物。咁當時警誡咗被告之後，被告就聲稱有一個叫做「阿蛇」嘅人叫佢將啲毒品帶畀另外一個人嘅，咁個報酬就係500鈫。咁後屘喺青衣警署一個錄影會面嘅時候，被告就畀更加詳細嘅資料，喺咩嘢情況之下識咗呢個「阿蛇」，呢個「阿蛇」點樣叫佢係將個「冰」毒交畀一個叫做「阿花」嘅女人，就喺嚟呢個青衣嘅，又點樣佢去到咗青衣都未搵到呢個「阿花」就已經畀差人拉咗，結果就係唔成功嘅。而涉案嘅毒品其實係內含24.3克甲基苯丙胺鹽酸鹽嘅25.4克晶狀嘅物體，市價就係17,628鈫。

講被告嘅背景喇，被告38歲，離咗兩次婚，同第一個離咗婚嘅太太有一個8歲嘅仔，就冇養前妻或者係養個仔嘅。讀書讀到中三程度，做嘢就係做呢一個水電嘅冷氣工程。就喺未被拘捕之前，喺石籬第10座1255室度居住，但係而家嗰個地方已經畀呢個房屋署係收番㗎喇。被告唔係冇案底嘅，佢先前啲案底多數係同賣咸碟、賣翻版嗰啲嘅有關，咁而有三次係同毒品有關嘅。而被告雖然仲係父母健在同埋有兄弟姊妹，但係以被告所講，其實屋企人已經因為佢吸毒係離棄佢㗎喇，同佢冇乜嘢來往㗎喇。

咁而代表被告人你嘅曾大律師喺求情嘅時候，就告知本席話被告人你自己本身嘅爸爸以前都係一個海洛英嘅吸毒者，咁被告成長嘅時候，喺一個嘅環境係有爸爸吸毒，所以可能喺咁嘅情況之下影響到你自己都選擇咗去吸毒。

判刑

販運危險藥物係非常之嚴重嘅罪行，一個人係經公訴程序之後被裁定罪名成立係可以判處終身監禁同埋罰款係5,000,000鈫嘅，咁而上訴庭係有畀到啲販運毒品嘅指引，喺「冰」毒嚟講就有一件案例叫做譚伊真（譯音）嘅，呢件譚伊真嘅案例畀咗指引，就係話如果係販運10至到70克嘅「冰」，經過審訊之後個判刑起點係7至11年。咁因為而家涉案嘅係24.3克，即係話喺10至70克呢一個範疇，即係話個量刑起點係喺7至11年之間。

咁我考慮到呢件案件嗰個毒品嘅份量同埋當時被告人你喺咩嘢情況之下畀差人捉到你有嗰啲毒品喺你身上，我就認為一個恰當嘅量刑起點係8年。喺呢件案件就冇其他加刑嘅因素。被告你唔認罪，所以亦都冇減刑嘅因素喇，因為你冇承認到係販運危險藥物吖嘛。咁又冇得加，又冇得減，所以仍然用番呢個8年嘅量刑起點作為呢一個量刑。

就被告你販運危險藥物罪，需要坐監8年。