HCCC 120/2009
HCCC120/2009
香港特別行政區
高等法院
原訟法庭
刑事案件2009年第120號
----------------------
主審法官： 高等法院暫委法官彭偉昌
日期： 2009年6月5日上午9時47分
出席人士：
律政司高級檢控官黎婉姬女士，代表香港特別行政區 法律援助署律師方漢權先生，代表被告
控罪： 販運危險藥物（Trafficking in a dangerous drug）
--------------------------------------
判刑 以下內容乃法庭數碼錄音謄本
---------------------------------------
官： 被告早於裁判官席前承認過一項販運危險藥物罪，即係以淨含毒量計143.04克嘅「冰」，而家交由我懲處。
情節方面好簡單嘅啫，就係警方喺停車場嘅一部的士上搵到被告，發現佢身上帶有涉案嘅毒品。警誡之下，被告承認剛剛從大陸將毒品帶入境，當時正等候一男一女到停車場取貨。
背景方面，被告現時53歲，香港出生及受教育至小六程度，之後做過多種藍領嘅工作，被捕前係做散工過活，有一名較年輕嘅妻子喺大陸。最後，佢有十一次共十七項前科，其中十項同吸食同埋管有吸食毒品嘅工具有關。
求情嘅時候，律師指被告喺大陸嘅太太即將獲准來港，祖母又患重病，要錢醫治，再加上自己欠債，所以先鋌而走險，不過呢啲都唔係有效嘅求情理由。
我認為根據涉案毒品嘅份量，量刑起點可以以十一年半為基準。被告認罪，可以得到三分一嘅扣減，就下調至七年零八個月，不過之後就再冇減免嘅理由。
我正式宣判，被告需要為本案入獄七年零八個月。