|
HCCC 161/2020
[2020] HKCFI 3022
香港特別行政區
高等法院
原訟法庭
刑事案件2020年第161號
________________________
________________________
| 出席人士: |
律政司高級檢控官Mr Michael TSANG，代表香港特別行政區 |
| |
Mr SHER Hon-piu，由法律援助署委派的 Augustine C Y Tong & Co延聘，代表被告人 |
| 控罪: |
販運危險藥物（Trafficking in a dangerous drug） |
________________________
判刑
以下內容乃法庭數碼錄音謄本
________________________
官：
被告承認一項販運危險藥物罪，違反香港法例第134章《危險藥物條例》第4（1）（a）及（3）條。
被告人從馬來西亞乘飛機抵港，佢嘅行李篋被關員搜查，發現篋入面共有四包嘅危險藥物，每兩包被錫紙同埋透明膠紙包裹喺一條長褲中。佢喺警誡下承認，係從吉隆坡將行李箱運嚟香港，稍後會有人安排交收。佢而家承認喺有關嘅時候係非法販運有關嘅危險藥物。
而嗰啲危險藥物經過化驗之後，證實為1,398克嘅磚狀混合劑，內含1,168克海洛英鹽酸鹽，當時嘅市值約為一百五十萬港元。
被告現年23歲，馬來西亞籍，以前並冇刑事紀錄。根據佢嘅身世口供，佢中學畢業之後，做過汽車維修、洗車等工作，與父母同住新山區，係家中嘅獨子。
大律師喺求情嘅時候表示，被告喺來港前半年失業，喺馬來西亞搵唔到工作，佢今次誤以為要帶嚟香港嘅毒品係大麻。咁根據大律師嘅陳詞，亦都指被告人喺案發前約一個月，認識咗一個叫文裕（譯音）嘅人。曾經按文裕嘅指示，將一批大麻煙交畀一名買家，並且獲得支付報酬。今次文裕安排佢帶毒品到香港，並且承諾事成之後，支付3,000馬元嘅報酬，以及香港嘅食宿支出。佢以為嗰個啲毒品一如既往係大麻煙，被捕之後，佢已經感到非常後悔。
大律師指，被告係一個唔成熟嘅年青人，被他人利用。因為一時嘅愚蠢同埋貪婪，造成咗無可逆轉嘅災難性後果，希望法庭可以輕判。
本席喺量刑嘅時候，考慮咗本案嘅案情、毒品嘅種類、重量、量刑指引、被告認罪，以及大律師嘅求情。根據Abdallah一案嘅量刑指引，販運海洛英重量600至到1,200克，起刑點係20至到23年。
就住本案嘅毒品重量係1,168克嘅海洛英鹽酸鹽，本席認為審訊後嘅刑期應該為二十二年半，另加國際性因素，往上調兩年，即係二十四年半嘅量刑基準。至於被告人係如何年輕、不成熟、因為經濟壓力，為當地不法份子利用，呢啲背景並冇任何空間驅使本席唔按照有關嘅量刑指引行事。被告人認罪，給予三分之一嘅認罪扣減，判刑十六年四個月。
|