|
HCCC 313/2015
香港特別行政區
高等法院
原訟法庭
刑事案件2015年第313號
----------------
----------------
| 出席人士： |
傅昶生先生，為外聘律師，代表香港特別行政區 |
|
梁禮浩先生，由趙司徒鄭律師事務所延聘，代表被告人 |
| 控罪： |
販運危險藥物（Trafficking in a dangerous drug） |
----------------------
判刑
以下內容乃法庭數碼錄音謄本
----------------------
官：
被告人經審訊之後，被裁定一項販運危險藥物罪罪名成立。
喺判處嘅時候，本席顧及咗整體情況，包括案件嘅性質同埋情節、所涉危險藥物嘅種類同埋份量、被告人嘅個人背景與及辯方大律師嘅求情陳詞。
本案嘅案情可以簡述如下：2015年4月30日嘅上午，被告人喺沙角邨郵政局投寄一個包裹，期間被警員截停。警員喺包裹裡面發現涉案俗稱「冰」毒嘅毒品，以販運毒品罪拘捕咗被告人。
喺警誡之下，被告人話「我收人哋1,000鈫，攞啲『冰』去郵局寄，我冇做其他嘢㗎。」警員其後將被告人呢個口頭陳述喺記事冊紀錄低。之後，警員喺錄影之後會見咗被告人，被告人喺會見裡面亦都作出咗招認陳述。
涉案嘅危險藥物為內含1.96公斤甲基苯丙胺鹽酸鹽嘅1.99公斤晶狀固體。
被告人現年18歲，中四學業程度，佢曾經任職倉務員，自從喺2014年10月起失業。被告人係初犯嘅。
辯方梁大律師喺求情嘅時候指出，被告人喺犯案嘅時候只係得17歲，尚算年青，佢係被人利用而犯案嘅。梁大律師亦都請法庭顧及被告人喺本案嘅得益微少。法庭被告知，被告人來自一個健康嘅家庭，被告人嘅父親任職廚師，母親係家務助理，而被告人嘅家姐喺大學修讀藥劑學科。梁大律師請法庭顧及上述嘅情況，與及顧及被告人初犯，要求法庭盡量輕判。
上訴法庭喺案例香港特別行政區訴譚伊真（CACC524/2011）一案指出：販運「冰」毒嘅人，如果毒品純含量超過600克嘅話，就應該採用Abdallah一案裡面嘅量刑指引。根據Abdallah（CACC304/2008）一案：如果毒品純含量係600克至到1,200克嘅話，法庭應該考慮一個20至23年監禁嘅判處。被告人於犯案嘅時候，正在將涉案嘅包裹寄往澳洲，因為有跨境嘅成份，刑期應該因此加長18個月。總括嚟講，本席認為一個23年嘅最終量刑基準係合適。顧及辯方大律師嘅求情，本席酌情將刑期扣減半年。
被告人，請起立。基於上述理由，本席判你就本案判監二十二年半。
|