HCCC 388/2016
香港特別行政區
高等法院
原訟法庭
刑事案件2016年第388號
----------------
----------------------
判刑
以下內容乃法庭數碼錄音謄本
官：
被告係被控一項販運毒品罪，涉案嘅係1,671克嘅氯胺酮（即係俗稱嘅「K仔」）。被告承認控罪，亦都同意案情撮要嘅。
簡單講，警員就喺案發當天晚上去到葵涌某運輸公司嘅停車場進行反毒品行動，後來見到被告上咗一架私家車，而當佢落番車嘅時候，警員就將佢截停搜身，其後又上架私家車去搜查嘅，咁就喺被告手上嘅膠袋裡面與及車裡面係搵到控罪所列出嘅毒品。被告在警誡下承認搵到嘅毒品係佢攞嚟賣畀人嘅。被告在稍後嘅會面紀錄中亦進一步透露犯案嘅細節。
被告今年33歲，佢喺香港出生，以往有多次刑事紀錄，但係就冇相同嘅毒品案。
代表佢嘅大律師在求情時呈上被告嘅求情信，亦都澄清咗被告嘅家庭情況。程大律師指出，被告在上次放監之後，就喺呢一間嘅運輸公司工作，一工就有300鈫，而佢都係因為經濟問題而犯案嘅。雙方嘅代表律師喺判案嘅指引原則方面就並冇爭議嘅。在考慮過案例之後，即係許守城（譯音）（[2008] 3 HKC 323）與及單松健（譯音）（[2013] HKLRD 627），本席決定以16年作為刑期起點。被告承認控罪，本席會給予佢三分一嘅扣減，刑期因此會變成十年八個月。除咗認罪可以得到扣減之外，本席不認為喺呢件案中再有其他有效嘅求情因素喇。