被告李平被控一項[販運危險藥物]罪，違反香港法例第134章《危險藥物條例》第4（1）（a）及（3）條。
被告喺裁判官席前承認控罪同埋同意案情之後，係交付嚟高院嘅原訟法庭判刑。
睇番案情吖，承認案情顯示被告人當時就離開佢嘅一個住所，就喺大埔錦興樓3字樓B座嘅第五間房，當時喺附近有警員埋伏，警員截停咗被告人。咁警員搜被告人嘅時候，就喺佢個褲袋搵到有十二包懷疑係危險藥物，當時就警誡呢個被告人，拉佢，咁被告人就話呢啲係「冰」毒嚟嘅，就要求係畀次機會。跟住被告人亦都承認喇，話佢會準備係將呢啲「冰」毒賣畀人嘅，同埋話喺佢屋企度，仲有其他嘅危險藥物添，於是警員就帶咗被告人返去佢屋企，即係嗰間，頭先講嗰個第五室嗰度喇。
咁喺嗰個房入面，警員就再搵到另外係有十一包嘅毒品，仲有五包就係喺嗰個紙巾袋嘅，仲有一啲係片劑嘅，二十四片，同埋另外有三個膠樽，係有啲毒品喺度嘅。咁跟住就仲搵到有包裝嘅工具添，咁又再警誡被告人喇，被告人跟住就話「係咁多，冇其他㗎喇」。咁跟住警員就再向個被告係查詢嘅時候，被告人就講到，話有個人叫佢係用嗰間房嘅，即係嗰個人叫做倫仔，就幫佢租咗間房，咁佢就喺度住嘅。咁後屘警員就係去將呢啲毒品帶咗返去差館喇，咁後來就係化驗咗嘅，咁最後證實咗，喺個被告身上搵到嘅，夾埋晒就係內含7.71克甲基苯丙胺鹽酸鹽嘅7.98克嘅晶狀固體，咁而喺個屋企入面搵到嘅，就係夾埋係內含29.77克甲基苯丙胺鹽酸鹽嘅30.69克嘅晶狀固體，咁同埋其他就係有內含67個毫克嘅甲基苯丙胺，就係嗰二十四片嘅片劑喇，同埋0.42克嘅固體。咁而嗰個市價，即係嗰個零售價，係29,669鈫。
咁被告喺警署嘅時候，就係參與一個錄影會面嘅程序，咁當時喺警誡之下嘅。咁佢話間房就係有人用佢個名幫佢租嘅，咁而佢係要靠呢個綜援維生，咁就話當時即係嗰個人，叫做趙海，咁就係呢個趙海畀啲毒品佢嘅，就叫佢幫佢賣，咁佢當時係預備帶啲毒品去賣畀人，同埋去吸食毒品嘅，亦都話畀警方聽喇，佢係失業，靠呢個綜援嘅，咁亦都話嗰啲藥丸係畀佢自己食。咁當然喇，就呢件嘅案件，被告人係承認佢當時係將啲毒品係販運喇，如果唔係都唔會認罪喇。
咁好喇，睇番被告嘅背景同埋求情陳詞喇。被告而家58歲，就唔係話冇案底嘅，都相當多案底㗎喇，咁就試過喺2009年直情係相同嘅添，係販運危險藥物，咁嗰次就判咗16個月監。咁除咗嗰次之外，又試過有一次，嗰個罪行嘅名稱就叫做係管有危險藥物作非法販運用途，咁另外又試過有藏毒嘅，成五次咁多，咁其他就多，又即係勒索、又打劫、又偷嘢、又入屋爆竊，即係企圖入屋爆竊，又有刑事毀壞，又有係自稱為黑社會會員，嗰個即係範疇都相當之廣闊。
咁好喇，被告人，你個代表大律師李律師喺求情嘅時候就話畀我知，咁被告就係喺大陸出世，不過就嚟咗香港住㗎喇，即係冇幾耐就嚟香港住喇，咁喺香港住呢個時候，就冇受到正式嘅教育。咁後屘就結咗婚，就初初同太太就一齊即係住喺深圳，仲有個仔添，不過就唔好彩，佢個仔就過咗身，咁後來太太都成功申請嚟咗香港，咁佢就其實就同佢太太就係住喺大埔另外一個地方，即係唔係住喺而家搵到毒品嗰個地方，搵到毒品嗰個地方就係嗰個所謂趙海，就係佢用被告個名即係租咗間屋，咁就係方便被告去販毒，咁被告時不時都會喺嗰度住嘅，就方便佢自己販毒。咁而嗰個報酬係點呢？就係話每賣500鈫嘅毒品，就會得番30鈫嘅報酬，咁亦都講，被告同佢太太兩個都係受綜援嘅，得嗰5,000鈫嘅啫，咁而被告先前，因為佢係做過，喺地盤做嘅，咁又喺街市做過運送魚，咁喺地盤做嘅時候就傷過個膝頭哥，菠蘿蓋，所以令到行動就唔係太方便，咁變咗又坐咗咁多年監，咁出嚟搵嘢做就有困難，咁又嗰5,000鈫又唔夠使，所以先至會係應承咗幫人販毒，咁就自己而家就知道係將會面對一個相當長時間嘅監禁，所以就終於係而家就係決定咗，即係洗心革面喇，就坐埋今次監，出嚟之後就決定唔再去犯事，會重新做人，咁李律師就要求本席係盡量輕判被告人。
販運危險藥物當然係非常之嚴重嘅罪行，咁就呢件案件，因為基本上係販運「冰」毒喇，咁所以上訴庭其實喺一件叫做程國雄嘅案件已經畀咗量刑指引。咁根據有關嘅指引，而家即係如果係販運10至到70克嘅「冰」毒，經審訊之後，個量刑起點就係7至10年嘅，咁即係呢件案件，因為37.48克，所以就係七--至到十年呢一個範疇。
咁而另外就即係嗰二十四片嘅片裝就有啲嘅甲基苯丙胺，同埋又有啲咁嘅固體，即係我睇落，相比之下，就嗰個份量相當之細。咁因為個份量係咁細，所以我喺量刑嘅時候，就唔考慮嗰啲片劑，唔考慮嗰個固體，我凈係考慮嗰個「冰」毒。咁當然要考慮埋呢件案件，即係成個案情喇，即係當時被告人係點樣被捕咁嘅情況，同埋牽涉咗嘅毒品，「冰」係37.48克，又加埋被告人嗰個背景即係相當之差，犯案纍纍，同埋係屢罰屢犯。仲有更加重要一點，就係被告先前係曾經有販運危險藥物，同埋係管有危險藥物以作非法販運用途呢兩項嘅罪名，係更加令到嗰個罪行係嚴重咗嘅，所以我就認為一個恰當嘅量刑起點係9年，咁被告一早喺裁判官嘅席前已經承認控罪，咁當然係可以得到三分之一嘅刑期扣減，咁除咗呢個之外，我就睇唔到有其他嘅理由係再將個刑期扣減，咁即係好明顯喇，即係唔使講，就係喺財政上有困難，就絕對唔係一個求情嘅理由，係令到一個咁嚴重嘅罪行，販運危險藥物，係遺害社會咁嚴重嘅罪行係得到減刑嘅。
仲有，另一方面，當然本席都好希望，喺呢個被告人，為你自身或者為我哋個社會嚟講，你係真真正正會有心改過，將來唔再犯案，當然我都好希望呢個會係成為事實，但係本席係唔可以考慮你口頭上作一個咁樣嘅承諾，嚟將個刑期係扣減嘅，即係話講嚟講去，除咗三分之一嘅刑期扣減之外，就冇其他減刑嘅理由，咁頭先已經講咗喇，因為嗰個恰當嘅量刑起點，本席認為係9年喇，咁所以扣減咗之後，而家被告人你要就呢一個販運危險藥物嘅罪名，要坐監6年。