被告人你承認咗一項販運危險藥物罪，被判罪名成立。本席喺判處嘅時候考慮咗整體嘅情況，包括案件嘅性質同埋情節，尤其是涉案危險藥物嘅性質同埋份量、你嘅個人背景同埋大律師為你所作嘅求情陳詞。
本案嘅案情係簡單嘅，當警員喺監視一個你居住嘅房間嘅時候，你從該房間走出嚟，被警員截停，警員喺嗰個房間裡面搜獲好多物品，包括涉案嘅危險藥物，與及一啲飲管同埋膠樽、錫紙、電子磅、剪刀、膠袋等物件，呢啲物件好多都載有微量嘅危險藥物。當你被以販運危險藥物嘅罪名拘捕之後，喺警誡下，你表示喺涉案嘅房間裡面搜獲嘅所有毒品都係你嘅，你向別人出售嗰啲毒品只係為咗糊口。
你現年32歲，中三程度，曾經任職送貨工人同埋侍應，被捕嘅時候已經失業數年，靠綜援過活。你並非係初犯嘅，之前已經有十三次被定罪，涉及嘅罪行達十八項，包括多次盜竊同埋管有危險藥物，曾經因此被判處監禁同埋進入戒毒所接受治療，不過你之前從來冇干犯販運危險藥物呢一項控罪。喺你干犯本案嘅時候，你仲係受監管令嘅限制，因為不遵守有關規定，被遞捕之後，需要返回喜靈洲戒毒所服刑。
蔡大律師喺為你求情嘅時候向法庭指出，你喺被捕嘅時候，已經立即向警員承認你係販運危險藥物，並且喺裁判法院聆訊嘅時候已經承認控罪。佢亦都指出你喺2011年5月喺戒毒所獲釋之後，雖然曾經嘗試尋找工作，但係因為學業程度同埋工作經驗不足，未能搵到工作，為求生計，所以鋌而走險。佢亦都指出你嘅腦部長咗腫瘤，正在接受身體檢查同埋醫生嘅診斷，法庭因此將聆訊押後，聽取關乎你嘅健康狀況嘅醫學報告。
一般嚟講，即使被告人健康欠佳，呢個並非係應該扣減刑期嘅理由，不過因為蔡大律師指出你現時嘅健康情況並非冇可能係十分嚴峻嘅，所以法庭也許應該考慮呢個情況。本席同意先了解你嘅健康狀況先至作出判處可能係周詳嘅做法。法庭收到嘅醫學報告顯示，你由09年9月開始患有羊癎症，一直都接受治療，現時仍然不時發作，不過你嘅身體主要器官同埋機能都係正常嘅。
以本案嚟講，雖然涉及三種危險藥物，但係最主要嘅係俗稱「冰」毒嘅甲基苯丙胺鹽酸鹽，毒品份量係11.48克，單以呢種危險藥物嚟講，以咁嘅份量，一個7年嘅量刑基準應該足以反映案件嘅嚴重程度，不過顧及案件涉及其他兩種危險藥物，雖然份量都不多，但係畢竟販運多種危險藥物，其中包括小量嘅海洛英，增加咗案件嘅嚴重性，本席認為量刑基準應該提高1年，故此本席採用8年作為量刑基準，被告人你承認咗控罪，應該得到三分一嘅刑期扣減。
上訴法庭一向都指出，即使被告人健康狀況好差，呢個都並非係減刑嘅理由，上訴庭喺不久前嘅案例，香港特別行政區訴吳美花（CACC 420/2009）一案裡面，再次肯定呢個判刑考慮原則。參考咗呢宗案件同埋上訴庭嘅案例，英皇訴Chan Kui Sheung（[1996] 3 HKC 279）一案中所列出嘅考慮原則，本席認為以你現時嘅健康情況同埋展望嚟講，不足以構成可以減刑嘅理由。
考慮咗整體情況，本席認為三分一就係你應該得到嘅刑期扣減幅度，基於上述理由，本席判你就本案監禁五年四個月。